കോഴിക്കോട്: കേരള ക്രിക്കറ്റ് അസോസിയേഷൻ (KCL fan league kozhikode) സംഘടിപ്പിക്കുന്ന കേരള ക്രിക്കറ്റ് ലീഗിന്റെ (KCL) മൂന്നാം സീസണിന് മുന്നോടിയായി നടന്ന കെസിഎൽ ഫാൻ ലീഗ് ടൂർണമെന്റിന്റെ കോഴിക്കോട് ജില്ലാ മത്സരങ്ങളിൽ യുവ രാമനാട്ടുകര ക്രിക്കറ്റ് ക്ലബ് ജേതാക്കളായി. ആവേശം അവസാന ഓവർ വരെ നീണ്ടുനിന്ന ഫൈനൽ പോരാട്ടത്തിൽ കാപ്സ് നെവർമൈൻഡിനെ തകർത്താണ് യുവ രാമനാട്ടുകര കിരീടം ചൂടിയത്. നിലവിൽ കെസിഎല്ലിലെ ആറ് ടീമുകൾ പ്രതിനിധീകരിക്കുന്ന പ്രധാന ജില്ലകളിലാണ് ഈ ജനകീയ ഫാൻ ലീഗ് മത്സരങ്ങൾ നടക്കുന്നത്. തിരുവനന്തപുരം ജില്ലയിലെ മത്സരങ്ങൾ നേരത്തെ വിജയകരമായി പൂർത്തിയായിരുന്നു.
ഫൈനൽ മത്സരത്തിൽ ടോസ് നേടി ആദ്യം ബാറ്റിങ്ങിന് ഇറങ്ങിയ കാപ്സ് നെവർമൈൻഡ് നിശ്ചിത ആറ് ഓവറിൽ ഏഴ് വിക്കറ്റ് നഷ്ടത്തിൽ 60 റൺസെന്ന ഭേദപ്പെട്ട സ്കോറാണ് പടുത്തുയർത്തിയത്. മറുപടി ബാറ്റിങ്ങിന് ഇറങ്ങിയ യുവ രാമനാട്ടുകര അനായാസമായ ബാറ്റിങ് പ്രകടനത്തോടെ വെറും 4.5 ഓവറിൽ മൂന്ന് വിക്കറ്റ് മാത്രം നഷ്ടപ്പെടുത്തി ലക്ഷ്യം കണ്ടു. വെടിക്കെട്ട് ബാറ്റിങ്ങിലൂടെ വെറും 14 പന്തുകളിൽ അഞ്ച് കൂറ്റൻ സിക്സറുകൾ അടക്കം 34 റൺസുമായി പുറത്താകാതെ നിന്ന വിവേക് മോഹനനാണ് ടീമിനെ അനായാസ വിജയത്തിലേക്ക് നയിച്ചത്. മാച്ച് വിന്നിങ് പ്രകടനം പുറത്തെടുത്ത വിവേക് മോഹനൻ തന്നെയാണ് ഫൈനലിലെ പ്ലെയർ ഓഫ് ദി മാച്ചായി തിരഞ്ഞെടുക്കപ്പെട്ടത്.
ടൂർണമെന്റിലുടനീളം മികച്ച ബാറ്റിങ് ഫോം തുടർന്ന അഭിലാഷ് യു.എസ്. മികച്ച ബാറ്ററായും ടൂർണമെന്റിലെ മികച്ച താരമായും (Player of the Tournament) തിരഞ്ഞെടുക്കപ്പെട്ടു. എതിരാളികളെ കൃത്യമായ സ്പെല്ലുകളിലൂടെ കെട്ടിപ്പൂട്ടിയ മുഹമ്മദ് ഹാദിയാണ് ടൂർണമെന്റിലെ മികച്ച ബൗളർ. ആകെ 32 പ്രമുഖ പ്രാദേശിക ടീമുകളാണ് കോഴിക്കോട് ജില്ലാതല ഫാൻ ലീഗ് ടൂർണ്ണമെന്റിൽ മാറ്റുരച്ചത്. വരും ദിവസങ്ങളിൽ മറ്റ് ജില്ലകളിലെയും മത്സരങ്ങൾ പൂർത്തിയാകുമെന്നും ക്രിക്കറ്റ് ആരാധകർക്കിടയിൽ വലിയ ആവേശം സൃഷ്ടിക്കാൻ ഫാൻ ലീഗിന് സാധിക്കുന്നുണ്ടെന്നും കെസിഎ അധികൃതർ വ്യക്തമാക്കി.
Story Summary: Yuva Ramanattukara Cricket Club emerged champions in the Kozhikode district matches of the KCL Fan League, defeating Caps Nevermind in the final. Chasing a target of 61 runs in 6 overs, Yuva Ramanattukara reached the mark in 4.5 overs, powered by Vivek Mohanan’s unbeaten 34 off 14 balls, who won the Player of the Match award.
