അഹമ്മദാബാദ്: ഗുജറാത്തിലെ അംറേലി ജില്ലയിൽ കാട്ടിൽ അതിക്രമിച്ചു കയറി സിംഹങ്ങളെ നിരീക്ഷിക്കാൻ ശ്രമിച്ച 21-കാരൻ സിംഹത്തിന്റെ ആക്രമണത്തിൽ കൊല്ലപ്പെട്ടു. ലിലിയ താലൂക്കിലെ അന്റാലിയ റവന്യൂ ഭൂമിക്കും ലുവാരിയ റിസർവ് വനത്തിനും ഇടയിലുള്ള അതിർത്തി മേഖലയിൽ ജൂലൈ 8-നായിരുന്നു സംഭവം. സുരന്ദ് നഗർ സ്വദേശിയായ സോഹിൽ മേമൻ എന്ന യുവാവാണ് മരിച്ചത്. സംഭവത്തിൽ വനംവകുപ്പ് വിശദമായ അന്വേഷണം ആരംഭിച്ചു.(Gujarat man killed in lion attack during illegal lion watching in Amreli forest)
ഇണചേരുന്ന സമയമായിരുന്നതിനാൽ അതീവ അക്രമാസക്തരായ സിംഹങ്ങളുടെ അടുത്തേക്കാണ് യുവാക്കളുടെ സംഘം എത്തിയത്. ഇവരുടെ സാന്നിധ്യം സിംഹങ്ങളെ പ്രകോപിപ്പിച്ചതാകാം ആക്രമണത്തിന് കാരണമായതെന്ന് ഷെത്രുഞ്ജി ഡിവിഷൻ ഡെപ്യൂട്ടി കൺസർവേറ്റർ ഓഫ് ഫോറസ്റ്റ് ചിരാഗ് അമിൻ പറഞ്ഞു. സോഹിലിനെ ആക്രമിച്ച ആൺസിംഹം ഇയാളുടെ മൃതദേഹം കാടിനുള്ളിലേക്ക് വലിച്ചിഴച്ചുകൊണ്ടുപോയി. മൃതദേഹത്തിന് കാവലായി അക്രമാസക്തനായി നിന്ന സിംഹത്തെ ഏറെ പ്രയത്നിച്ചാണ് വനപാലകർ മാറ്റിയതും മൃതദേഹം വീണ്ടെടുത്തതും.
തുടർന്ന് നടത്തിയ അന്വേഷണത്തിൽ സോഹിലിനൊപ്പമുണ്ടായിരുന്ന രണ്ട് യുവാക്കളെ വനംവകുപ്പ് കസ്റ്റഡിയിലെടുത്തു. പിടിയിലായവരുടെ മൊബൈൽ ഫോണുകൾ പരിശോധിച്ചപ്പോൾ, നിയമവിരുദ്ധമായി സിംഹങ്ങളുടെ ദൃശ്യങ്ങൾ പകർത്തിയ ചിത്രങ്ങളും വീഡിയോകളും ഡിലീറ്റ് ചെയ്തതായും ഫോൺ ഫോർമാറ്റ് ചെയ്തതായും കണ്ടെത്തി. തെളിവ് നശിപ്പിക്കാൻ ശ്രമിച്ച സാഹചര്യത്തിൽ ഈ ഫോണുകൾ ഫോറൻസിക് സയൻസ് ലബോറട്ടറിയിലേക്ക് അയക്കും. വന്യമൃഗങ്ങളെ അവയുടെ സ്വാഭാവിക വാസസ്ഥലത്ത് കയറി ശല്യം ചെയ്യുന്നത് വന്യജീവി സംരക്ഷണ നിയമപ്രകാരം ഗുരുതരമായ കുറ്റകൃത്യമാണെന്നും പ്രതികൾക്കെതിരെ കർശന നിയമനടപടിയുണ്ടാകുമെന്നും വനംവകുപ്പ് വ്യക്തമാക്കി. കഴിഞ്ഞ 20 ദിവസത്തിനിടെ സൌരാഷ്ട്ര മേഖലയിൽ റിപ്പോർട്ട് ചെയ്യുന്ന നാലാമത്തെ സിംഹാക്രമണമാണിത്.
Story Summary
A 21-year-old man named Sohil Memon was killed by a male lion in Gujarat’s Amreli district after a group engaged in illegal lion watching entered the reserve forest. The agitated lion dragged the body deep into the forest, and following the rescue, the Forest Department detained two youths who had deleted mobile digital evidence from the scene.
