ഒരു വിമാനയാത്രയ്ക്കിടെ ബിസിനസ് ക്ലാസ് സീറ്റിലിരുന്ന് വിതുമ്പുന്ന കാനഡ ആസ്ഥാനമായി പ്രവർത്തിക്കുന്ന ഇന്ത്യൻ വംശജനായ സംരംഭകൻ ആഷ് ലാംബയുടെ വീഡിയോ സമൂഹമാധ്യമങ്ങളിൽ വൈറലാവുന്നു. താൻ കുട്ടിക്കാലത്ത് ആഗ്രഹിച്ചിരുന്ന ജീവിതം ഇന്ന് യാഥാർത്ഥ്യമായതിലെ അതിയായ സന്തോഷവും വികാരനിർഭരമായ നിമിഷങ്ങളുമാണ് അദ്ദേഹം പങ്കുവെച്ചത്. (Ash Lamba Viral Video)
കുട്ടിക്കാലത്ത് വിമാനത്താവളങ്ങളെയും വിമാനങ്ങളിലെ ബിസിനസ് ക്ലാസിനെയും വളരെ കൗതുകത്തോടെയാണ് താൻ നോക്കി കണ്ടിരുന്നതെന്ന് ആഷ് പറയുന്നു. എക്കണോമി ക്ലാസ്സിൽ യാത്ര ചെയ്യുമ്പോൾ വാഷ്റൂമിലേക്ക് പോകുന്ന വഴി ബിസിനസ് ക്ലാസ്സിലേക്കൊന്ന് ഒളിഞ്ഞുനോക്കാറുണ്ടായിരുന്ന ആ പഴയ കാലം അദ്ദേഹം ഓർത്തെടുത്തു. ഒപ്പം, വമ്പൻ കാറുകളിൽ സ്കൂളിൽ വരുന്നവരെയും ലണ്ടനിലെ വേനൽക്കാല അവധിക്കാലത്തെക്കുറിച്ച് സംസാരിക്കുന്ന സമ്പന്നരായ കൂട്ടുകാരെയും കണ്ടു വളർന്ന ആ കാലവും അദ്ദേഹം പങ്കുവെച്ചു.
“അന്ന് കണ്ട സ്വപ്നങ്ങൾ ഇന്ന് യാഥാർത്ഥ്യമായിരിക്കുന്നു. കുട്ടിക്കാലത്ത് ആഗ്രഹിച്ച കാർ, വീട്, യാത്രകൾ എന്നിവയെല്ലാം ഇന്ന് സ്വന്തമാക്കാൻ സാധിച്ചു. വിമാനത്തിലെ ബിസിനസ് ക്ലാസ് സീറ്റിലിരിക്കുമ്പോൾ ഞാൻ ഓർക്കുന്നത് ആ പഴയ കൊച്ചു ബാലനെയാണ്,” ആഷ് ഇൻസ്റ്റാഗ്രാമിൽ കുറിച്ചു.
തന്റെ മാതാപിതാക്കൾ നൽകിയ മനോഹരമായ ബാല്യത്തെക്കുറിച്ച് ആഷ് വാചാലനായി. അവർ കഠിനാധ്വാനം ചെയ്താണ് തന്നെ വളർത്തിയത്. എന്നാൽ തനിക്ക് കൂടുതൽ അനുഭവങ്ങളും സ്വാതന്ത്ര്യവും വേണമെന്ന് അന്ന് ആഗ്രഹിച്ചിരുന്നു. ലോകം കാണണമെന്നും ജീവിതം മാറ്റിമറിക്കുന്ന എന്തെങ്കിലും ചെയ്യണമെന്നുമുള്ള ആഗ്രഹം ഒരു അഭിനിവേശമായി തന്നിലുണ്ടായിരുന്നു. ഇന്ന് ആ ലക്ഷ്യങ്ങൾ പൂർത്തീകരിക്കാനായതിൽ താൻ കൃതാർത്ഥനാണെന്നും അദ്ദേഹം പറയുന്നു.
സ്വപ്നങ്ങൾ മാറിയെങ്കിലും തന്റെയുള്ളിലെ ആ ‘വിശപ്പ്’ ഇപ്പോഴും മാറിയിട്ടില്ലെന്ന് അദ്ദേഹം കൂട്ടിച്ചേർത്തു. ഈ വീഡിയോ ലക്ഷക്കണക്കിന് ആളുകളാണ് ഇതിനകം കണ്ടുകഴിഞ്ഞത്. കഠിനാധ്വാനം ചെയ്താൽ ഏത് വലിയ സ്വപ്നവും യാഥാർത്ഥ്യമാക്കാം എന്നതിന് തെളിവാണ് ആഷിന്റെ ഈ യാത്രയെന്നാണ് സോഷ്യൽ മീഡിയ അഭിപ്രായപ്പെടുന്നത്.
Summary: Ash Lamba, a Canada-based entrepreneur of Indian origin, went viral after sharing an emotional video of himself breaking down during a flight. He realized he was finally living the life he had dreamed of as a child, reflecting on his journey from admiring luxury and business-class travel from afar to achieving the goals he once thought were impossible. His message of perseverance and gratitude for his humble beginnings has resonated deeply with social media users worldwide.
