തിരുവനന്തപുരം: ലോകമെമ്പാടും വൻ ഡിമാൻഡുള്ള സെമികണ്ടക്ടർ ഉപകരണങ്ങൾക്കായുള്ള അഡ്വാൻസ്ഡ് കൺട്രോൾ സിസ്റ്റംസ് സോഫ്റ്റ്വെയർ രംഗത്തേക്ക് കേരളത്തെ അടയാളപ്പെടുത്തി ‘കായ്സെമി (KaiSemi Control Systems Technopark Trivandrum) കൺട്രോൾ സിസ്റ്റംസ് പ്രൈവറ്റ് ലിമിറ്റഡ്’ ടെക്നോപാർക്കിൽ പുതിയ ഓഫീസ് പ്രവർത്തനം ആരംഭിച്ചു. ടെക്നോപാർക്ക് ഫേസ് വണ്ണിലെ കല്ലായി ബിൽഡിംഗിൽ സജ്ജീകരിച്ചിരിക്കുന്ന അത്യാധുനിക സൗകര്യങ്ങളോടു കൂടിയ പുതിയ ഓഫീസ് സമുച്ചയം വ്യവസായ-വിവരസാങ്കേതിക, എ.ഐ വകുപ്പ് മന്ത്രി പി.കെ കുഞ്ഞാലിക്കുട്ടി ഔദ്യോഗികമായി ഉദ്ഘാടനം ചെയ്തു. മുൻപ് ടെക്നോപാർക്കിലെ എസ്.ടി.പി.ഐ (STPI) ബിൽഡിങ്ങിൽ വെറും ഏഴംഗ സംഘവുമായി പ്രവർത്തനം ആരംഭിച്ച കായ്സെമി, ചുരുങ്ങിയ കാലം കൊണ്ട് മുപ്പതിലധികം വിദഗ്ദ്ധ ജീവനക്കാരുള്ള മികച്ച ഒരു കമ്പനിയായി വളർന്നാണ് പുതിയ വലിയ സൗകര്യങ്ങളിലേക്ക് മാറിയത്. ആഗോള സെമികണ്ടക്ടർ വിപണിയിൽ ഇന്ത്യയുടെ സാന്നിധ്യം ശക്തമാക്കുക എന്ന ലക്ഷ്യത്തോടെയാണ് കമ്പനിയുടെ ഈ നിർണ്ണായക ചുവടുവെപ്പ്.
നേരിട്ട് ചിപ്പുകൾ നിർമ്മിക്കുന്നതിന് പകരം, ചിപ്പ് നിർമ്മാണത്തിന് ഉപയോഗിക്കുന്ന അതിസങ്കീർണ്ണമായ ഭീമൻ മെഷീനുകളെ (പ്രത്യേകിച്ച് അയോണിക് ഇംപ്ലാന്റേഴ്സിനെ) കൃത്യമായി നിയന്ത്രിക്കുന്ന ലോകോത്തര സോഫ്റ്റ്വെയർ സംവിധാനമാണ് കായ്സെമി വികസിപ്പിക്കുന്നത്. ‘കെസിഎസ്’ (KCS – KaiSemi Control Systems) എന്ന ബ്രാൻഡിൽ അറിയപ്പെടുന്ന ഈ സോഫ്റ്റ്വെയറാണ് കമ്പനിയുടെ പ്രധാന പ്രൊഡക്റ്റ്. ചിപ്പുകൾ നിർമ്മിക്കുന്ന വൻകിട ഫാക്ടറികളിലെ (Fab) റോബോട്ടിക്സ്, വാൽവ് കൺട്രോളിങ്, ബീം ട്യൂണിങ് തുടങ്ങിയ സങ്കീർണ്ണമായ പ്രക്രിയകളെല്ലാം അതീവ കൃത്യതയോടെ നിയന്ത്രിക്കുന്നത് ഈ ഡിജിറ്റൽ സംവിധാനമാണ്. കേരളത്തിലെ കഴിവുള്ള യുവതലമുറയ്ക്ക് മുതൽക്കൂട്ടായാണ് സെമികണ്ടക്ടർ പോലുള്ള ഏറ്റവും പ്രധാനപ്പെട്ട മുൻനിര മേഖലകളിലേക്ക് കായ്സെമി പോലുള്ള മികച്ച കമ്പനികൾ കടന്നുവരുന്നതെന്ന് ഉദ്ഘാടന ചടങ്ങിൽ മന്ത്രി പി.കെ കുഞ്ഞാലിക്കുട്ടി പറഞ്ഞു. കേരളത്തിലുള്ള അവസരങ്ങളും അന്താരാഷ്ട്ര സൗകര്യങ്ങളും ഏറ്റവും മികച്ച രീതിയിൽ ഐടി മേഖല ഉപയോഗപ്പെടുത്തണമെന്നും അദ്ദേഹം കൂട്ടിച്ചേർത്തു.
വലിയ തൊഴിലവസരങ്ങൾക്ക് വഴിതുറക്കുന്നു
ചടങ്ങിൽ ഇ ആൻഡ് ഐ.ടി വകുപ്പ് സെക്രട്ടറി സീറാം സാംബശിവ റാവു, ടെക്നോപാർക്ക് സി.ഇ.ഓ സന്ദീപ് കുമാർ ഐ.എ.എസ്, കിംഗ്സ്റ്റോൺ സെമികണ്ടക്ടറിന്റെ സ്ഥാപകനും കായ്സെമി മാനേജിംഗ് ഡയറക്ടറുമായ ജെഫ് സ്കോട്ട് ബോയ്ക്കർ, ഡയറക്ടർമാരായ അനു ജോസഫ്, ഫഹദ് അബ്ദുൾ സലാം, ടോണി ജോസഫ് തുടങ്ങിയ പ്രമുഖർ പങ്കെടുത്തു. കേരളത്തിലെ ഐടി ഉദ്യോഗാർഥികളുടെ മികച്ച സാങ്കേതിക നൈപുണ്യവും ടെക്നോപാർക്കിന്റെ ലോകോത്തര അടിസ്ഥാന സൗകര്യങ്ങളുമാണ് തങ്ങളുടെ ആദ്യ ഇന്ത്യൻ ബ്രാഞ്ച് തിരുവനന്തപുരത്ത് തന്നെ ആരംഭിക്കാൻ കാരണമായതെന്ന് കമ്പനി മാനേജ്മെന്റ് വ്യക്തമാക്കി.
അന്താരാഷ്ട്ര സെമി മാനദണ്ഡങ്ങൾ (SEMI Standards) കർശനമായി പാലിച്ചുകൊണ്ട് കൺട്രോൾ സിസ്റ്റം ഡിസൈനിങ്, എക്യുപ്മെന്റ് ഇന്റഗ്രേഷൻ, 24×7 മെയിന്റനൻസ് പിന്തുണ തുടങ്ങിയവ നൽകുന്ന കായ്സെമി, നിലവിൽ ആഗോളതരത്തിൽ തങ്ങളുടെ സോഫ്റ്റ്വെയർ പ്രോഡക്റ്റുകൾ വൻതോതിൽ കയറ്റുമതി ചെയ്യുന്നുണ്ട്. ഭാവിയിൽ ഇന്ത്യയിൽ തന്നെ നേരിട്ട് മെഷീൻ നിർമ്മാണം ആരംഭിക്കുന്നതോടെ മെക്കാനിക്കൽ, ഇലക്ട്രോണിക്സ്, പ്രോസസ്സ് എൻജിനീയർമാർക്കും ഐടി പ്രൊഫഷണലുകൾക്കും ഫിസിക്സിൽ പിഎച്ച്ഡി/ബിരുദാനന്തര ബിരുദമുള്ളവർക്കും വലിയ തൊഴിലവസരങ്ങളാണ് കായ്സെമി വഴി കേരളത്തിൽ തുറക്കപ്പെടാൻ പോകുന്നത്.
Story Summary:
KaiSemi Control Systems Pvt Ltd has expanded its footprint in the semiconductor software sector by opening a state-of-the-art office at the Kallai Building in Technopark Phase 1, Thiruvananthapuram. Inaugurated by Industry and IT Minister P.K. Kunhalikutty, the company has grown from a 7-member team to over 30 employees. KaiSemi specializes in developing ‘KCS’ software used to control complex chip-manufacturing machines like ionic implanters and robotics. Management cited Kerala’s skilled talent pool as the reason for choosing Technopark for their first Indian branch, promising future job opportunities across IT, engineering, and physics streams.
