ഭോപ്പാൽ: മധ്യപ്രദേശിലെ ഉജ്ജയിനിൽ സ്വത്തുതർക്കത്തെത്തുടർന്ന് രണ്ട് കുട്ടികളുടെ അമ്മയായ യുവതിയോട് ഭർതൃവീട്ടുകാരുടെ കൊടുംക്രൂരത (Ujjain Woman Stripped Paraded). യുവതിയുടെ തലമുടി ക്രൂരമായി മുറിച്ചുമാറ്റിയ ശേഷം വിവസ്ത്രയാക്കുകയും, കഴുത്തിൽ ചെരിപ്പുമാല അണിയിച്ച് ഗ്രാമത്തിലെ തെരുവിലൂടെ പരസ്യമായി നടത്തിക്കുകയുമായിരുന്നു. മനുഷ്യ മനസ്സാക്ഷിയെ ഞെട്ടിക്കുന്ന ഈ ദാരുണ സംഭവം ഉജ്ജയിനിലെ ഝർദ പോലീസ് സ്റ്റേഷൻ പരിധിക്ക് കീഴിൽ വരുന്ന ഹർണിയ ഖേദി ഗ്രാമത്തിലാണ് അരങ്ങേറിയത്.
യുവതി ഭീകരമായി ആക്രമിക്കപ്പെടുന്നതിന്റെയും ജനമധ്യത്തിലൂടെ അപമാനിച്ച് നടത്തിക്കുന്നതിന്റെയും ദൃശ്യങ്ങൾ സാമൂഹികമാധ്യമങ്ങളിൽ വ്യാപകമായി പ്രചരിച്ചതോടെയാണ് സംഭവം പുറംലോകം അറിയുന്നത്. വീഡിയോ ശ്രദ്ധയിൽപ്പെട്ടയുടൻ തന്നെ പോലീസ് സ്വമേധയാ കേസ് രജിസ്റ്റർ ചെയ്ത് അന്വേഷണം ആരംഭിക്കുകയായിരുന്നു. സംഭവത്തിൽ ഭർത്താവിന്റെ കുടുംബാംഗങ്ങൾ ഉൾപ്പെടെ 11 പേരെ പ്രതികളാക്കി കേസ് രജിസ്റ്റർ ചെയ്തതായും, അതിൽ പ്രധാനികളായ മൂന്ന് പ്രതികളെ ഇതിനകം അറസ്റ്റ് ചെയ്തതായും ഉജ്ജയിൻ എസ്പി പ്രദീപ് ശർമ്മ ഔദ്യോഗികമായി സ്ഥിരീകരിച്ചു.
കുടുംബപരമായ പ്രശ്നങ്ങളെത്തുടർന്ന് കുറച്ചുകാലമായി ഭർത്താവിൽനിന്നും ഭർതൃവീട്ടുകാരിൽനിന്നും പൂർണ്ണമായും അകന്നുകഴിയുകയായിരുന്നു ഈ യുവതി. കഴിഞ്ഞ രണ്ട് ദിവസം മുൻപാണ് ഇവർ ഹർണിയ ഖേദിയിലെ ഭർത്താവിന്റെ വീട്ടിലെത്തുകയും തന്റെയും കുട്ടികളുടെയും ഭാവി മുൻനിർത്തി കുടുംബസ്വത്തിൽ അർഹമായ അവകാശം ചോദിക്കുകയും ചെയ്തത്. സ്വത്തിൽ പങ്ക് ചോദിച്ചതിൽ പ്രകോപിതരായ ഭർത്താവിന്റെ മാതാപിതാക്കളും മറ്റ് ബന്ധുക്കളും ചേർന്ന് യുവതിയെ ക്രൂരമായി മർദ്ദിക്കുകയും, തുടർന്ന് സ്ത്രീത്വത്തെ വ്രണപ്പെടുത്തുന്ന രീതിയിലുള്ള അതിക്രമങ്ങൾ അഴിച്ചുവിടുകയുമായിരുന്നെന്ന് ഉജ്ജയിൻ എസ്പി കൂട്ടിച്ചേർത്തു. ഒളിവിൽ പോയ ബാക്കി എട്ട് പ്രതികൾക്കായി പോലീസ് തെരച്ചിൽ ഊർജ്ജിതമാക്കിയിട്ടുണ്ട്. യുവതിക്ക് നിലവിൽ പോലീസ് സംരക്ഷണവും വൈദ്യസഹായവും ഉറപ്പാക്കിയിട്ടുണ്ട്.
Story Summary:
In a shocking incident in Ujjain, Madhya Pradesh, a woman was brutally assaulted, stripped, her hair chopped off, and paraded through the streets with a garland of shoes over a family property dispute. The incident occurred in Harnia Khedi village under the Jharda police station limits. Following a viral video of the assault, Ujjain SP Pradeep Sharma confirmed that a case was registered against 11 people, and three suspects have been arrested so far.
