തിരുവനന്തപുരം: സിങ്കപ്പൂർ എയർലൈൻസിന്റെ കീഴിലുള്ള ബജറ്റ് വിമാന സർവീസായ ‘സ്കൂട്ട്’ (Scoot Airlines), സോണി പിക്ചേഴ്സുമായി സഹകരിച്ച് വിപണിയിലെത്തിക്കുന്ന പുതിയ ‘സ്പൈഡർമാൻ: ബ്രാൻഡ് ന്യൂ ഡേ’ തീമിലുള്ള വിമാനങ്ങൾ അവതരിപ്പിച്ചു. സിങ്കപ്പൂരിലെ പ്രശസ്തമായ ചാങി എയർപോർട്ടിൽ നടന്ന ചടങ്ങിൽ സ്കൂട്ട് ചീഫ് കൊമേഴ്സ്യൽ ഓഫീസർ കാൽവിൻ ചാൻ, സോണി പിക്ചേഴ്സ് പ്രതിനിധികൾ, മറ്റ് ഏവിയേഷൻ പങ്കാളികൾ എന്നിവർ പങ്കെടുത്തു.
അവതരണത്തിന് പിന്നാലെ, ജൂൺ 30-ന് സിങ്കപ്പൂരിൽ നിന്നും ടോക്കിയോയിലേക്കായിരുന്നു ഈ സ്പെഷ്യൽ തീം വിമാനത്തിന്റെ ആദ്യ സർവീസ്. സ്കൂട്ടിന്റെ എയർബസ് A321നിയോ, ബോയിങ് 787 ഡ്രീംലൈനർ എന്നീ രണ്ട് മോഡൽ വിമാനങ്ങളിലാണ് യാത്രക്കാർക്കായി ഈ അത്യപൂർവ്വ സ്പൈഡർമാൻ അനുഭവം ഒരുക്കിയിരിക്കുന്നത്. ഓസ്ട്രേലിയ, ചൈന, ജപ്പാൻ, ഫിലിപ്പൈൻസ്, തായ്ലൻഡ് തുടങ്ങിയ രാജ്യങ്ങളിലെ തിരഞ്ഞെടുത്ത നഗരങ്ങളിലേക്കായിരിക്കും ഈ തീംഡ് ഫ്ലൈറ്റുകൾ സർവീസ് നടത്തുക.
വിമാനത്തിനുള്ളിൽ കയറുന്നത് മുതൽ യാത്രക്കാർക്ക് ഈ തീമിന്റെ സവിശേഷതകൾ ആസ്വദിക്കാനാകും. ‘സ്പൈഡർമാൻ: ബ്രാൻഡ് ന്യൂ ഡേ’ സിനിമയിലെ പശ്ചാത്തല സംഗീതത്തിനൊപ്പം ബോർഡിങ് സമയത്ത് സ്പൈഡർമാന്റെ പ്രത്യേക സ്വാഗത സന്ദേശവും യാത്രക്കാരെ കാത്തിരിക്കുന്നുണ്ട്. ഇതിനുപുറമേ, ‘സ്കൂട്ടീസ്’ എന്ന് വിളിക്കപ്പെടുന്ന വിമാനത്തിലെ കാബിൻ ക്രൂ അംഗങ്ങൾ യാത്രക്കാർക്കായി സ്പൈഡർമാൻ തീമിലുള്ള പ്രത്യേക വിനോദ പരിപാടികളും ഫ്ലൈറ്റിൽ സംഘടിപ്പിക്കും.
2026 സെപ്റ്റംബർ 13 വരെ മാത്രമായിരിക്കും ഈ പ്രത്യേക തീംഡ് ഫ്ലൈറ്റുകൾ സർവീസ് നടത്തുകയെന്ന് കമ്പനി അറിയിച്ചു. താല്പര്യമുള്ള യാത്രക്കാർക്ക് സ്കൂട്ടിന്റെ ഔദ്യോഗിക വെബ്സൈറ്റ്, മൊബൈൽ ആപ്പ്, വീചാറ്റ് മിനി പ്രോഗ്രാം എന്നിവയിലൂടെ ടിക്കറ്റുകൾ ബുക്ക് ചെയ്യാവുന്നതാണ്.
Story Summary:
Singapore’s budget carrier Scoot, in partnership with Sony Pictures, launched a special ‘Spider-Man: Brand New Day’ themed aircraft experience. The themed flights, featuring special music, boarding announcements, and cabin activities, will operate on select routes across Asia and Australia until September 2026.
