കീവ്: യുക്രൈനിലെ ഡിനിപ്രോപെട്രോവ്സ്ക് മേഖലയിൽ ഖനി തൊഴിലാളികൾ സഞ്ചരിച്ച ബസിനു നേരെ റഷ്യ നടത്തിയ ഡ്രോൺ ആക്രമണത്തിൽ 12 പേർ കൊല്ലപ്പെട്ടു (Russia-Ukraine war). യുക്രൈനിലെ ഏറ്റവും വലിയ സ്വകാര്യ ഊർജ്ജ കമ്പനിയായ ഡി.ടി.ഇ.കെയിലെ (DTEK) ജീവനക്കാരാണ് കൊല്ലപ്പെട്ടത്. ജോലി കഴിഞ്ഞ് മടങ്ങുകയായിരുന്ന തൊഴിലാളികൾ സഞ്ചരിച്ച ബസിനു നേരെ യുദ്ധമുഖത്തുനിന്ന് 65 കിലോമീറ്റർ അകലെയുള്ള പാവ്ലോഗ്രാഡ് ജില്ലയിൽ വെച്ചാണ് ആക്രമണമുണ്ടായത്. ആക്രമണത്തിൽ ഏഴ് പേർക്ക് പരിക്കേൽക്കുകയും ചെയ്തു. ഇതിന് പുറമെ ഡിനിപ്രോ നഗരത്തിലും സപ്പോറീഷ്യയിലെ മെറ്റേണിറ്റി ആശുപത്രിയിലും നടന്ന റഷ്യൻ ആക്രമണങ്ങളിൽ നിരവധി പേർക്ക് പരിക്കേറ്റതായും റിപ്പോർട്ടുകളുണ്ട്.
അമേരിക്കൻ പ്രസിഡന്റ് ഡൊണാൾഡ് ട്രംപ് പ്രഖ്യാപിച്ച റഷ്യൻ വെടിനിർത്തൽ കാലാവധി അവസാനിക്കുന്ന അതേ ദിവസം തന്നെയാണ് ഈ ആക്രമുണ്ടായത് എന്നത് ശ്രദ്ധേയമാണ്. ശൈത്യകാലം പരിഗണിച്ച് കീവിലും മറ്റ് നഗരങ്ങളിലും ആക്രമണം നിർത്തിവെക്കാൻ പുടിൻ സമ്മതിച്ചതായി ട്രംപ് നേരത്തെ അവകാശപ്പെട്ടിരുന്നു. അതേസമയം, റഷ്യ-യുക്രൈൻ യുദ്ധം അവസാനിപ്പിക്കാൻ അമേരിക്കയുടെ നേതൃത്വത്തിലുള്ള രണ്ടാം ഘട്ട ചർച്ചകൾ ബുധനാഴ്ച അബുദാബിയിൽ ആരംഭിക്കുമെന്ന് യുക്രൈൻ പ്രസിഡന്റ് വൊളോഡിമിർ സെലെൻസ്കി അറിയിച്ചു. യുദ്ധം അവസാനിപ്പിക്കാൻ അമേരിക്കയുടെ മധ്യസ്ഥതയിൽ ശ്രമങ്ങൾ നടക്കുന്നുണ്ടെങ്കിലും പ്രദേശങ്ങൾ വിട്ടുകൊടുക്കുന്ന കാര്യത്തിൽ ഇരുരാജ്യങ്ങളും ഇപ്പോഴും വിട്ടുവീഴ്ചയ്ക്ക് തയ്യാറായിട്ടില്ല.
Summary
A Russian drone attack on a bus carrying mine workers in Ukraine’s Dnipropetrovsk region killed at least 12 employees of energy firm DTEK. The strike occurred as a temporary reduction in Russian attacks, brokered by Donald Trump, ended, and just before a second round of peace talks is scheduled to begin in Abu Dhabi.
