അടൂർ: വിദ്യാഭ്യാസ മന്ത്രി വി. ശിവൻകുട്ടിയുടെ പേഴ്സണൽ സ്റ്റാഫും സംഘവും സഞ്ചരിച്ച കാർ മറ്റൊരു കാറുമായി കൂട്ടിയിടിച്ച് ആറുപേർക്ക് പരിക്ക് (Minister Sivankutty Staff Car Accident). അടൂർ–ചവറ റോഡിൽ മണക്കാല ഭാഗത്ത് ശനിയാഴ്ച രാവിലെ 11:30 ഓടെയായിരുന്നു അപകടം. അടൂർ പെരിങ്ങനാട് സ്കൂളിലെ ഉദ്ഘാടന പരിപാടിക്കായി എത്തിയതായിരുന്നു മന്ത്രിയും സംഘവും. മന്ത്രിയുടെ വാഹനത്തിന് പിന്നാലെ വന്ന കാർ എതിരെ വന്ന വാഹനവുമായി കൂട്ടിയിടിക്കുകയായിരുന്നു.
മന്ത്രിയുടെ അഡീഷണൽ പ്രൈവറ്റ് സെക്രട്ടറി രാജീവ് (47), അസിസ്റ്റന്റ് അഖിലേഷ് (30), ഡ്രൈവർ അനുരാജ് (34) എന്നിവർക്കും മറ്റേ കാറിലുണ്ടായിരുന്ന ബിബിൻ (34), റുബിൻ (40), ജിജി സണ്ണി (44) എന്നിവർക്കുമാണ് പരിക്കേറ്റത്. പരിക്കേറ്റവർ അടൂർ ഗവൺമെന്റ് ആശുപത്രിയിൽ ചികിത്സ തേടി. ആരുടെയും പരിക്ക് ഗുരുതരമല്ലെന്നാണ് വിവരം. സ്കൂളിലെ ചടങ്ങിന് ശേഷം മന്ത്രി ആശുപത്രിയിലെത്തി പരിക്കേറ്റവരെ സന്ദർശിക്കുകയും ചികിത്സാ സൗകര്യങ്ങൾ വിലയിരുത്തുകയും ചെയ്തു.
