തിരുവനന്തപുരം: കരിയറിലെ പതിനൊന്നാം വർഷത്തിൽ, നാട്ടുകാരുടെ മുന്നിൽ ആദ്യ അന്താരാഷ്ട്ര മത്സരം കളിക്കാൻ സഞ്ജു സാംസൺ (Sanju Samson) ഒരുങ്ങുന്നു. ഇന്ന് രാത്രി ഏഴ് മണിക്ക് കാര്യവട്ടം ഗ്രീൻഫീൽഡ് സ്റ്റേഡിയത്തിൽ നടക്കുന്ന ഇന്ത്യ – ന്യൂസീലൻഡ് ട്വന്റി-20 പരമ്പരയിലെ അവസാന മത്സരത്തിനായുള്ള കാത്തിരിപ്പിലാണ് ആരാധകർ. അഞ്ച് മത്സരങ്ങളുടെ പരമ്പര ഇന്ത്യ നേരത്തെ തന്നെ സ്വന്തമാക്കിയിരുന്നെങ്കിലും, ടി20 ലോകകപ്പിന് മുൻപുള്ള ഈ സന്നാഹമത്സരം ഇരു ടീമുകൾക്കും നിർണ്ണായകമാണ്. ശനിയാഴ്ച നടന്ന പരിശീലനത്തിനിടെ സഞ്ജുവും ഇഷാൻ കിഷനും വമ്പൻ ഷോട്ടുകളുമായി നെറ്റ്സിൽ തിളങ്ങിയത് ആരാധകരുടെ പ്രതീക്ഷ വർദ്ധിപ്പിക്കുന്നു.
അന്താരാഷ്ട്ര ക്രിക്കറ്റിൽ അരങ്ങേറി 56 മത്സരങ്ങൾക്ക് ശേഷമാണ് സഞ്ജു തന്റെ ഹോം ഗ്രൗണ്ടിൽ ഇന്ത്യൻ ജേഴ്സിയണിയുന്നത്. പരമ്പരയിലെ ആദ്യ നാല് മത്സരങ്ങളിൽ നിന്നുമായി 40 റൺസ് മാത്രമാണ് സഞ്ജുവിന് നേടാനായത് എന്നതിനാൽ, ഇന്ന് സ്വന്തം മണ്ണിൽ വമ്പൻ പ്രകടനം പുറത്തെടുത്ത് ലോകകപ്പിന് മുൻപ് ഫോം വീണ്ടെടുക്കാനാകും സഞ്ജുവിന്റെ ശ്രമം. സൂര്യകുമാർ യാദവ്, അഭിഷേക് ശർമ തുടങ്ങിയ മുൻനിര ബാറ്റർമാർ മികച്ച ഫോമിലാണ്. മുഴുവൻ ടിക്കറ്റുകളും വിറ്റുതീർന്നതിനാൽ നിറഞ്ഞ ഗാലറിക്ക് മുന്നിലാകും ഇന്നത്തെ വെടിക്കെട്ട് പോരാട്ടം നടക്കുക. 2017-ൽ ഇതേ മൈതാനത്ത് നടന്ന ആദ്യ അന്താരാഷ്ട്ര മത്സരത്തിലും ന്യൂസീലൻഡ് തന്നെയായിരുന്നു ഇന്ത്യയുടെ എതിരാളികൾ.
Summary
Sanju Samson is set to play his first-ever international match at his home ground in Thiruvananthapuram as India faces New Zealand in the final T20I tonight. While India has already secured the series, all eyes are on Sanju, who impressed in the nets and looks to regain his form ahead of the T20 World Cup.
