കാസർഗോഡ്: കുമ്പളയ്ക്ക് സമീപം അനന്തപുരത്തുള്ള പ്ലൈവുഡ് ഫാക്ടറിയിൽ ശനിയാഴ്ച പുലർച്ചെ വൻ തീപിടുത്തം (Kasaragod Fire News). അനന്തപുരം ഇൻഡസ്ട്രിയൽ എസ്റ്റേറ്റ് പരിസരത്ത് പ്രവർത്തിക്കുന്ന മാർക്ക് വുഡ് പ്ലൈവുഡ് ഫാക്ടറിയിലാണ് തീ പടർന്നത്.
പുലർച്ചെ നാല് മണിയോടെയാണ് ഫാക്ടറിയിൽ നിന്നും പുക ഉയരുന്നത് ശ്രദ്ധയിൽപ്പെട്ടത്. പെട്ടെന്ന് തന്നെ തീ ഫാക്ടറിയിലുടനീളം പടർന്നുപിടിക്കുകയായിരുന്നു.വിവരം ലഭിച്ച ഉടൻ തന്നെ കാസർഗോഡ്, ഉപ്പള എന്നിവിടങ്ങളിൽ നിന്നുള്ള അഗ്നിരക്ഷാസേനാ യൂണിറ്റുകൾ സ്ഥലത്തെത്തി. തീ പൂർണ്ണമായും നിയന്ത്രണവിധേയമാക്കാൻ മണിക്കൂറുകളായി ഉദ്യോഗസ്ഥർ പരിശ്രമിച്ചുകൊണ്ടിരിക്കുകയാണ്.
കാരണം: ഷോർട്ട് സർക്യൂട്ടാണ് തീപിടുത്തത്തിന് കാരണമായതെന്നാണ് പ്രാഥമിക നിഗമനം. ഫാക്ടറിയിൽ സൂക്ഷിച്ചിരുന്ന പ്ലൈവുഡുകളും യന്ത്രസാമഗ്രികളും പൂർണ്ണമായും നശിച്ച നിലയിലാണ്.
അപകടസമയത്ത് തൊഴിലാളികൾ കുറവായിരുന്നതിനാൽ വലിയൊരു ദുരന്തം ഒഴിവായി. നാശനഷ്ടങ്ങളുടെ കൃത്യമായ കണക്ക് തീ പൂർണ്ണമായും അണച്ചതിന് ശേഷമേ വ്യക്തമാകൂ എന്ന് അധികൃതർ അറിയിച്ചു.
