ന്യൂഡൽഹി: അമേരിക്കയിൽ ട്രംപ് ഭരണകൂടം അധികാരമേറ്റെടുത്ത ശേഷം കഴിഞ്ഞ 17 മാസത്തിനിടെ 4,600-ലധികം ഇന്ത്യക്കാരെ യുഎസിൽ നിന്ന് ഇന്ത്യയിലേക്ക് നാടുകടത്തിയതായി ഔദ്യോഗിക കണക്കുകൾ വ്യക്തമാക്കുന്നു. വിദേശകാര്യ മന്ത്രാലയ വക്താവ് രൺധീർ ജയ്സ്വാളാണ് ഇതുസംബന്ധിച്ച വിവരങ്ങൾ പുറത്തുവിട്ടത്.(More Than 4600 Indians Deported From US In 17 Months)
2025-ൽ 3,567 ഇന്ത്യക്കാരെയാണ് യുഎസിൽ നിന്ന് തിരിച്ചയച്ചത്. 2026-ൽ ഈ വർഷം ഇതുവരെ 1,076 പേരെയും നാടുകടത്തി. വിദേശത്ത് നിയമവിരുദ്ധമായി താമസിക്കുന്ന പൗരന്മാരെ തിരികെ സ്വീകരിക്കുക എന്നത് ഓരോ രാജ്യത്തിന്റെയും ബാധ്യതയാണെന്ന് വിദേശകാര്യ മന്ത്രാലയം നേരത്തെ തന്നെ വ്യക്തമാക്കിയിട്ടുണ്ട്. എന്നാൽ, തിരിച്ചയക്കുന്ന വ്യക്തികളുടെ പൗരത്വം കൃത്യമായി പരിശോധിച്ച ശേഷം മാത്രമേ ഇന്ത്യ അവരെ സ്വീകരിക്കാറുള്ളൂ. യുഎസ് അധികൃതർ കൈമാറുന്ന പട്ടികയിലെ ഓരോ വ്യക്തിയുടെയും വിവരങ്ങൾ ഇന്ത്യൻ ഏജൻസികൾ കർശനമായി പരിശോധിക്കാറുണ്ട്.
നിയമവിരുദ്ധമായി അതിർത്തി കടന്നവർ, വിസ കാലാവധി കഴിഞ്ഞിട്ടും തുടരുന്നവർ, രേഖകളില്ലാതെ കഴിയുന്നവർ എന്നിവരെ തിരികെ എത്തിക്കുന്നതിനായി അമേരിക്കൻ അധികൃതരുമായി ഇന്ത്യൻ സർക്കാർ നിരന്തരമായ ആശയവിനിമയം നടത്തിവരികയാണ്. കുടിയേറ്റ വിഷയത്തിൽ ട്രംപ് ഭരണകൂടം സ്വീകരിക്കുന്ന കർശന നടപടികളുടെ ഭാഗമായാണ് ഈ നാടുകടത്തലുകൾ നടക്കുന്നത്.
Story Summary
In the last 17 months, over 4,600 Indian nationals have been deported from the United States under the Trump administration’s stricter immigration policies. The Indian government has confirmed these figures, reiterating its commitment to taking back verified nationals while maintaining close coordination with U.S. authorities.
