ന്യൂഡൽഹി: ഇന്ത്യൻ ടെസ്റ്റ് ക്രിക്കറ്റ് ടീമിന്റെ വൈസ് ക്യാപ്റ്റൻ സ്ഥാനത്തുനിന്ന് വിക്കറ്റ് കീപ്പർ ബാറ്റ്സ്മാൻ ഋഷഭ് പന്തിനെ നീക്കിയ ബിസിസിഐ നടപടിയിൽ നിലപാട് വ്യക്തമാക്കി ഇന്ത്യൻ മുഖ്യ പരിശീലകൻ ഗൗതം ഗംഭീർ (Gautam Gambhir on Rishabh Pant Sacking). അഫ്ഗാനിസ്ഥാനെതിരെയുള്ള ഏക ടെസ്റ്റ് മത്സരത്തിന് മുന്നോടിയായി നടത്തിയ വാർത്താ സമ്മേളനത്തിലാണ് ഗംഭീർ പന്തിന്റെ മാറ്റത്തെക്കുറിച്ച് തുറന്നുപറഞ്ഞത്. ഒരു മുതിർന്ന കളിക്കാരൻ എന്ന നിലയിലുള്ള പന്തിന്റെ പെരുമാറ്റത്തെക്കുറിച്ചും മത്സര സാഹചര്യങ്ങൾക്ക് അനുസരിച്ച് ബാറ്റിംഗിൽ വരുത്തേണ്ട മാറ്റങ്ങളെക്കുറിച്ചും താൻ താരവുമായി ദീർഘനേരം സംസാരിച്ചിട്ടുണ്ടെന്ന് ഗംഭീർ വെളിപ്പെടുത്തി. പന്തിന്റെ സ്വാഭാവിക ശൈലി മാറ്റാൻ തങ്ങൾ ആഗ്രഹിക്കുന്നില്ലെന്നും എന്നാൽ അന്താരാഷ്ട്ര ക്രിക്കറ്റിൽ കളിക്കുമ്പോൾ മത്സരത്തിന്റെ സാഹചര്യം എന്താണെന്ന് മനസ്സിലാക്കി അതിനെ ബഹുമാനിക്കാൻ താരങ്ങൾ തയ്യാറാകണമെന്നും ഗംഭീർ കർശനമായി ഓർമ്മിപ്പിച്ചു.
ടെസ്റ്റ് ക്രിക്കറ്റിൽ ഇന്ത്യയ്ക്കായി നിരവധി ചരിത്രവിജയങ്ങൾ നേടിത്തന്നിട്ടുള്ള പന്തിന്റെ അഗ്രസീവ് ബാറ്റിംഗ് ശൈലിക്ക് ആരാധകരേറെയുണ്ടെങ്കിലും, പലപ്പോഴും നിർണ്ണായക ഘട്ടങ്ങളിൽ വലിയ ഷോട്ടുകൾക്ക് ശ്രമിച്ച് വിക്കറ്റ് കളയുന്നത് വലിയ വിമർശനങ്ങൾക്ക് കാരണമായിരുന്നു. അഫ്ഗാൻ പരമ്പരയ്ക്ക് തൊട്ടുമുൻപാണ് പന്തിനെ മാറ്റി കെ.എൽ. രാഹുലിനെ പുതിയ ടെസ്റ്റ് വൈസ് ക്യാപ്റ്റനായി നിയമിച്ചത്. ഇതിന് പിന്നാലെ, ഐപിഎല്ലിൽ ലഖ്നൗ സൂപ്പർ ജയന്റ്സ് പോയിന്റ് പട്ടികയിൽ ഏറ്റവും ഒടുവിൽ ഫിനിഷ് ചെയ്തതിനെത്തുടർന്ന് ടീമിന്റെ നായകസ്ഥാനത്തുനിന്ന് തന്നെ ഒഴിവാക്കണമെന്ന് പന്ത് മാനേജ്മെന്റിനോട് ആവശ്യപ്പെട്ടിരുന്നു. ടെസ്റ്റിൽ മികച്ച റെക്കോർഡുണ്ടെങ്കിലും പരിമിത ഓവർ ക്രിക്കറ്റിൽ പന്തിന്റെ പ്രകടനം മോശമാണ്. ഗംഭീർ പരിശീലകനായെത്തിയ ശേഷം ഏകദിന, ട്വന്റി20 ടീമുകളിൽ കെ.എൽ. രാഹുൽ, ഇഷാൻ കിഷൻ, സഞ്ജു സാംസൺ എന്നിവർക്കാണ് പന്തിനേക്കാൾ മുൻഗണന ലഭിക്കുന്നത്.
Summary: India head coach Gautam Gambhir has broken his silence on Rishabh Pant’s removal as the Test team’s vice-captain ahead of the one-off Test against Afghanistan. Speaking at a press conference, Gambhir emphasized that while the team doesn’t want Pant to alter his natural style, international cricket demands players to respect and adapt to match situations. Following his removal from the leadership role, which has now been handed to KL Rahul, Pant also requested to step down as Lucknow Super Giants captain post IPL 2026. Under Gambhir’s tenure, Pant has fallen behind in white-ball selection, with selectors preferring KL Rahul, Sanju Samson, and Ishan Kishan.
