പ്യോങ്യാങ്: ആഗോള സുരക്ഷാ ഭീഷണികൾ നിലനിൽക്കുന്ന സാഹചര്യത്തിൽ രാജ്യത്തിന്റെ ആണവായുധ ശേഷി ‘എക്സ്പോണൻഷ്യൽ’ നിരക്കിൽ (കുത്തനെ) വർദ്ധിപ്പിക്കുമെന്ന പ്രഖ്യാപനവുമായി ഉത്തരകൊറിയൻ ഭരണാധികാരി കിം ജോങ് ഉൻ (North Korea Nuclear Plant). ആയുധങ്ങൾക്കായി ആണവവസ്തുക്കൾ ഉത്പാദിപ്പിക്കുന്ന രാജ്യത്തെ പുതിയ അത്യാധുനിക പ്ലാന്റ് സന്ദർശിച്ച ശേഷമാണ് കിം ജോങ് ഉൻ ഇക്കാര്യം വ്യക്തമാക്കിയത്. കഴിഞ്ഞ അഞ്ച് വർഷത്തിനിടെ ആയുധങ്ങൾക്കായുള്ള ആണവവസ്തുക്കളുടെ ഉത്പാദന ശേഷി ഉത്തരകൊറിയ ഇരട്ടിയിലധികമായി വർദ്ധിപ്പിച്ചിട്ടുണ്ടെന്നും, ശത്രുക്കളുടെ കടന്നാക്രമണങ്ങളെ പ്രതിരോധിക്കാൻ പുതിയ പ്ലാന്റ് രാജ്യത്തെ കൂടുതൽ കരുത്തരാക്കുമെന്നും ഉത്തരകൊറിയൻ ഔദ്യോഗിക വാർത്താ ഏജൻസിയായ കെസിഎൻഎ റിപ്പോർട്ട് ചെയ്തു. യുണൈറ്റഡ് സ്റ്റേറ്റ്സുമായി മുൻപ് നടത്തിയ ആണവ നിരായുധീകരണ ചർച്ചകൾ പരാജയപ്പെട്ടതിന് പിന്നാലെയാണ് ഉത്തരകൊറിയ ആയുധ ഉത്പാദനം ശക്തമാക്കാനുള്ള അഞ്ച് വർഷത്തെ പദ്ധതിക്ക് തുടക്കമിട്ടത്.
അമേരിക്കൻ കോൺഗ്രഷണൽ റിസർച്ച് സർവീസിന്റെ ഏറ്റവും പുതിയ റിപ്പോർട്ടുകൾ പ്രകാരം ഉത്തരകൊറിയയുടെ പക്കൽ നിലവിൽ 90 ഓളം ആണവ യുദ്ധശിരസ്സുകൾ നിർമ്മിക്കാനുള്ള അസംസ്കൃത വസ്തുക്കളുണ്ട്. ഇതിൽ 50 എണ്ണമെങ്കിലും അവർ ഇതിനകം തന്നെ സജ്ജമാക്കിക്കഴിഞ്ഞതായും കരുതപ്പെടുന്നു. യാങ്ബിയോൺ, കാങ്സൺ എന്നിവിടങ്ങളിലായി ഉത്തരകൊറിയയ്ക്ക് നിലവിൽ രണ്ട് ആണവ സമ്പുഷ്ടീകരണ പ്ലാന്റുകൾ സജീവമായിട്ടുണ്ടെന്ന് ഇന്റർനാഷണൽ അറ്റോമിക് എനർജി ഏജൻസി കഴിഞ്ഞ മാസം വ്യക്തമാക്കിയിരുന്നു. കിം ജോങ് ഉൻ ഇപ്പോൾ സന്ദർശിച്ച പുതിയ പ്ലാന്റ് ഇതിൽ ഏതാണെന്ന് വ്യക്തമല്ലെങ്കിലും, വരിവരിയായി സ്ഥാപിച്ചിരിക്കുന്ന അത്യാധുനിക സെൻട്രിഫ്യൂജുകളും പ്രൊസസിങ് പൈപ്പുകളും നിയന്ത്രണ മുറികളും അടങ്ങുന്ന ചിത്രങ്ങൾ പുറത്തുവിട്ടതിലൂടെ, തങ്ങൾ വൻതോതിലുള്ള ആയുധ ഉത്പാദനത്തിലേക്ക് പൂർണ്ണമായി മാറിയെന്ന് ലോകത്തെ ബോധ്യപ്പെടുത്താനാണ് ഉത്തരകൊറിയ ശ്രമിക്കുന്നത്.
മിസൈൽ പരീക്ഷണങ്ങളോ വൻ സൈനിക പരേഡുകളോ നടത്തുന്നതിനേക്കാൾ, ഇത്തരം അത്യാധുനിക ഉത്പാദന പ്ലാന്റുകൾ പരസ്യപ്പെടുത്തുന്നതിലൂടെ തങ്ങൾക്ക് ദീർഘകാല പ്രതിരോധത്തിനുള്ള ശക്തമായ അടിസ്ഥാന സൗകര്യങ്ങൾ ഉണ്ടെന്നാണ് ഉത്തരകൊറിയ വ്യക്തമാക്കുന്നത്. അമേരിക്കയിൽ എവിടെ വേണമെങ്കിലും ആക്രമണം നടത്താൻ ശേഷിയുള്ള ഇന്റർകോണ്ടിനെന്റൽ ബാലിസ്റ്റിക് മിസൈലുകൾ ഉത്തരകൊറിയ വിജയകരമായി പരീക്ഷിച്ചതായി യുഎസ് ഇന്റലിജൻസും സ്ഥിരീകരിച്ചിട്ടുണ്ട്. നിലവിൽ ലോകത്തിലെ 9 ആണവായുധ രാജ്യങ്ങളുടെ പക്കലായി ആകെ 9,745 സജീവ യുദ്ധശിരസ്സുകൾ ഉണ്ടെന്നാണ് കണക്ക്. ഇതിൽ 5,400 ലധികം ആയുധങ്ങളുമായി റഷ്യ ഒന്നാം സ്ഥാനത്തും, 5,300 ഓളം ആയുധങ്ങളുമായി അമേരിക്ക രണ്ടാം സ്ഥാനത്തുമാണ്. ഇറാൻ ആണവ പദ്ധതികളെ പ്രതിരോധിക്കാൻ അമേരിക്ക ശ്രമിക്കുന്നതിനിടയിലാണ് അന്താരാഷ്ട്ര ആശങ്ക ഉയർത്തി ഉത്തരകൊറിയയുടെ പുതിയ നീക്കം.
Summary: North Korean leader Kim Jong Un inspected a new weapons-grade nuclear material production facility, announcing plans to exponentially increase the country’s nuclear arsenal. According to state media KCNA, North Korea has more than doubled its nuclear material production capacity over the past five years to strengthen its military deterrence. This development comes amid global concerns from the IAEA over North Korea’s expanding facilities at Yongbyon and Kangson, reinforcing predictions that Pyongyang is shifting focus toward mass munitions production.
