തിരുവനന്തപുരം: കലയുടെ സമസ്ത മേഖലകളിൽ ഉള്ളവരോടും ഒരുപോലെ ഹൃദ്യമായി പെരുമാറി കേരളീയതയുടെയും ഭാരതത്തിന്റെയും തനത് സാംസ്കാരിക പൈതൃകം കാത്തുസൂക്ഷിക്കുന്ന വ്യക്തിത്വത്തിനുപരി, സ്നേഹത്തിന്റെയും മാനവികതയുടെയും കാവൽവിളക്കാണ് ഡോ. പ്രമോദ് പയ്യന്നൂരെന്ന് മുൻ ചീഫ് സെക്രട്ടറിയും പ്രമുഖ സാംസ്കാരിക നായകനുമായ ഡോ. കെ. ജയകുമാർ ഐ.എ.എസ് അഭിപ്രായപ്പെട്ടു (Dr Pramod Payyannur Bharat Bhavan). കേരള സർക്കാരിന്റെ സാംസ്കാരിക വിനിമയ കേന്ദ്രമായ ഭാരത് ഭവന്റെ മെമ്പർ സെക്രട്ടറിയായി വിജയകരമായി 10 വർഷം പൂർത്തീകരിച്ച ഡോ. പ്രമോദ് പയ്യന്നൂരിന് സാംസ്കാരിക കേരളം ഒരുക്കിയ ‘സർഗ്ഗസ്നേഹം’ സ്നേഹാദര സമർപ്പണ ചടങ്ങ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. (ശ്രദ്ധിക്കുക: വാർത്താക്കുറിപ്പിൽ ജയകുമാർ ഐ.പി.എസ് എന്ന് തെറ്റായി രേഖപ്പെടുത്തിയിരിക്കുന്നത് തിരുത്തി ഐ.എ.എസ് എന്ന് ചേർത്തിട്ടുണ്ട്).
കേരളത്തിലെ ശ്രദ്ധേയങ്ങളായ സാംസ്കാരിക ദൗത്യങ്ങൾ ദീർഘവീക്ഷണത്തോടെ നിർവ്വഹിച്ച, കേരളത്തിന്റെ പ്രിയപ്പെട്ട നാടക-ചലച്ചിത്ര സംവിധായകനും തിരക്കഥാകൃത്തുമായ ഡോ. പ്രമോദ് പയ്യന്നൂരിന് ആദരവ് അർപ്പിക്കാനായി അമ്പതിലധികം പ്രമുഖ സാംസ്കാരിക സംഘടനകളാണ് ഒരുമിച്ച് കൈകോർത്തത്.
മെയ് 31 ഞായറാഴ്ച ഭാരത് ഭവൻ ഹൈക്യൂ തിയേറ്ററിൽ വെച്ച് പ്രൗഢഗംഭീരമായ സാംസ്കാരിക ദിനരാത്രങ്ങളോടെയാണ് ചടങ്ങുകൾ അരങ്ങേറിയത്. രാവിലെ 10 മണിക്ക് വൈക്കം മുഹമ്മദ് ബഷീറിന്റെ വിശ്വപ്രസിദ്ധ നോവലായ ‘ബാല്യകാലസഖി’യെ അവലംബിച്ച് പ്രമോദ് പയ്യന്നൂർ തിരക്കഥയും സംവിധാനവും നിർവ്വഹിച്ച്, മെഗാസ്റ്റാർ മമ്മൂട്ടി കേന്ദ്ര കഥാപാത്രമായി അഭിനയിച്ച ‘ബാല്യകാലസഖി’ എന്ന ചിത്രത്തിന്റെ പ്രത്യേക പ്രദർശനം നടന്നു. തുടർന്ന് വിവിധ നാടകാവതരണങ്ങൾ, പ്രമുഖർ അണിനിരന്ന സംഗീത വിരുന്ന്, ആധുനിക നൃത്താവിഷ്കാരങ്ങൾ, ഇംപ്രോ തീയറ്റർ (Impro Theater) അവതരണം, ഭാരത് ഭവന്റെ നാൾവഴികൾ വ്യക്തമാക്കുന്ന ഡോക്യുമെന്ററി പ്രദർശനം എന്നിവ വേദിയിൽ അരങ്ങേറി.
വൈകുന്നേരം പ്രശസ്ത എഴുത്തുകാരൻ ഡോ. ജോർജ്ജ് ഓണക്കൂറിന്റെ അധ്യക്ഷതയിൽ ചേർന്ന സാംസ്കാരിക കൂട്ടായ്മ ഡോ. കെ. ജയകുമാർ ഐ.എ.എസ് ഔദ്യോഗികമായി ഉദ്ഘാടനം ചെയ്തു. ചടങ്ങിൽ പത്മശ്രീ ഡോ. കെ. ഓമനക്കുട്ടി, പാളയം ഇമാം വി.പി. സുഹൈബ് മൗലവി, കൈരളി ടിവി സീനിയർ ഡയറക്ടർ വെങ്കിട്ട് രാമൻ, പ്രശസ്ത സംഗീതജ്ഞൻ പണ്ഡിറ്റ് രമേശ് നാരായണൻ, വട്ടപ്പറമ്പിൽ പീതാംബരൻ, നടൻ എം.ആർ. ഗോപകുമാർ, പ്രശസ്ത നർത്തകി ഡോ. നീനാ പ്രസാദ്, തെന്നിന്ത്യൻ നടൻ അപ്പാനി ശരത്ത്, ചലച്ചിത്ര പിന്നണി ഗായികമാരായ അഖില ആനന്ദ്, അനിതാ ഷെയ്ക്ക്, ഗായകൻ ശ്രീറാം എന്നിവർ പങ്കെടുത്തു.
മാധ്യമ പ്രവർത്തകരായ ബൈജു ചന്ദ്രൻ, വൈക്കം വേണുഗോപാൽ, വിനോദ് വൈശാഖി, ഡോ. രാജാവാര്യർ, ജസീന്താ മോറിസ്, വഞ്ചിയൂർ പ്രവീൺ കുമാർ, സെലിൻ മേരി, അഡ്വ. റോബിൻ സേവ്യർ, മുഹമ്മദ് ഷാ, സിന്ധു രഖുനാഥ്, ഡോ. ജി. രാജ് മോഹൻ തുടങ്ങി സാംസ്കാരിക-സാമൂഹ്യ മേഖലകളിലെ പ്രമുഖ വ്യക്തിത്വങ്ങളും ഇന്ത്യയിലെ വിവിധ ഭാഷാ അസോസിയേഷൻ പ്രതിനിധികളും ആശംസകൾ അർപ്പിച്ചു. കേരളത്തിലെ അറുപതോളം സാംസ്കാരിക സംഘടനകളുടെ പ്രതിനിധികളും, ഭാരത് ഭവന്റെ കഴിഞ്ഞ 10 വർഷക്കാലയളവിലെ ഭരണ നിർവ്വഹണ സമിതി അംഗങ്ങളും, തൈക്കാട് റെസിഡന്റ്സ് അസോസിയേഷൻ പ്രതിനിധികളും, തലസ്ഥാനത്തെ ഓട്ടോ തൊഴിലാളികളും ഈ സ്നേഹാദരക്കൂട്ടായ്മയിൽ സജീവമായി സന്നിഹിതരായിരുന്നു. പങ്കെടുത്ത 60 ഓളം സാംസ്കാരിക സംഘടനകളും വ്യക്തികളും പ്രമോദ് പയ്യന്നൂരിന് വേദിയിൽ വെച്ച് ഹൃദ്യമായ സ്നേഹോപഹാരങ്ങൾ സമർപ്പിച്ചു.
Story Summary: Cultural Kerala honored Dr. Pramod Payyannur with ‘Sargasneham’ on completing 10 years as Member Secretary of Bharat Bhavan. The event held at Bharat Bhavan High Q Theatre was inaugurated by Dr. K. Jayakumar IAS, and attended by prominent cultural, social, and film personalities.
