ന്യൂഡൽഹി: ഇന്ത്യയെ ചുട്ടുപൊള്ളിച്ച് റെക്കോർഡ് ഉഷ്ണതരംഗം. അന്താരാഷ്ട്ര വായുനിലവാര-കാലാവസ്ഥാ നിരീക്ഷണ പ്ലാറ്റ്ഫോം പുറത്തുവിട്ട തത്സമയ വിവരങ്ങൾ പ്രകാരം ഏറ്റവും ചൂടേറിയ ആദ്യ 45 നഗരങ്ങളും ഇന്ത്യയിലാണ് രേഖപ്പെടുത്തിയത്. ഈ നഗരങ്ങളിലെല്ലാം തന്നെ താപനില 43 ഡിഗ്രി സെൽഷ്യസിന് മുകളിലായിരുന്നു. രാജ്യത്ത് ഉഷ്ണതരംഗം തീവ്രമാകുന്ന പശ്ചാത്തലത്തിൽ, ഉഷ്ണതരംഗത്തിന്റെ അപകടങ്ങളെക്കുറിച്ച് ജനങ്ങൾക്ക് കടുത്ത ജാഗ്രതാ നിർദ്ദേശം നൽകി പ്രധാനമന്ത്രി നരേന്ദ്ര മോദി രംഗത്തെത്തി.(PM Modi Warns Of Extreme Heatwave India 45 Hottest Cities Globally In India IMD Water Scarcity)
അതിരൂക്ഷമായ ചൂട് രാജ്യത്തുടനീളം വലിയ പ്രതിസന്ധികൾ സൃഷ്ടിക്കുന്ന സാഹചര്യത്തിൽ പ്രധാനമന്ത്രിയുടെ ഓഫീസ് പ്രത്യേക പ്രസ്താവന പുറത്തിറക്കി.”ഇന്ത്യയുടെ വിവിധ ഭാഗങ്ങൾ കടുത്ത താപനിലയ്ക്കും അതോടൊപ്പമുള്ള കല്ലുവെല്ലുവിളികൾക്കും സാക്ഷ്യം വഹിക്കുകയാണ്. ഈ ചൂട് നമുക്കെല്ലാവർക്കും അസഹനീയമാണ്. അതിനാൽ രാജ്യത്തെ എല്ലാ ജനങ്ങളും പരമാവധി മുൻകരുതലുകൾ എടുക്കണമെന്ന് ഞാൻ അഭ്യർത്ഥിക്കുന്നു.” – പ്രധാനമന്ത്രി പ്രസ്താവനയിൽ പറഞ്ഞു.
ശരീരത്തിൽ വെള്ളം വറ്റിപ്പോകുന്ന നിർജ്ജലീകരണം രക്തം കട്ടിയാകാൻ കാരണമാകുമെന്നും, ഗുരുതരമായ സാഹചര്യങ്ങളിൽ ഇത് ആന്തരികാവയവങ്ങളുടെ പ്രവർത്തനത്തെ ബാധിക്കുമെന്നും അദ്ദേഹം ഓർമ്മിപ്പിച്ചു. മുന്നറിയിപ്പുകൾ അവഗണിക്കുന്നത് കാര്യങ്ങൾ വേഗത്തിൽ വഷളാക്കുമെന്നും അത് സൂര്യാഘാതത്തിലേക്ക് നയിച്ചേക്കാമെന്നും അദ്ദേഹം കൂട്ടിച്ചേർത്തു. കുട്ടികൾ, പ്രായമായവർ, പുറംജോലികളിൽ ഏർപ്പെടുന്നവർ എന്നിവർ ഈ സാഹചര്യത്തിൽ പ്രത്യേക ജാഗ്രത പുലർത്തണമെന്നും പ്രധാനമന്ത്രി നിർദ്ദേശിച്ചു.
കഴിഞ്ഞ ആഴ്ച മാത്രം ദക്ഷിണേന്ത്യൻ സംസ്ഥാനമായ തെലങ്കാനയിൽ 16 പേരാണ് സൂര്യാഘാതമേറ്റ് മരണപ്പെട്ടത്. ഉത്തരേന്ത്യൻ സംസ്ഥാനങ്ങളിലും സ്ഥിതി അതീവ ഗുരുതരമായി തുടരുകയാണ്. ഉത്തർപ്രദേശിലെ ബന്ദ നഗരത്തിൽ ചൊവ്വാഴ്ച 47.4 ഡിഗ്രി സെൽഷ്യസ് ചൂടാണ് ഇന്ത്യൻ കാലാവസ്ഥാ വകുപ്പ് രേഖപ്പെടുത്തിയത്. ഇത് സാധാരണ താപനിലയേക്കാൾ 3.8 ഡിഗ്രി കൂടുതലാണ്. ഈ മാസമാദ്യം ഇതേ നഗരത്തിൽ താപനില 48.2 ഡിഗ്രി വരെ എത്തിയിരുന്നു.
തലസ്ഥാനമായ ന്യൂഡൽഹിയിൽ ബുധനാഴ്ച ഉച്ചയ്ക്ക് താപനില 40 ഡിഗ്രി സെൽഷ്യസ് രേഖപ്പെടുത്തി. രാത്രികാലങ്ങളിലും ചൂട് ഒട്ടും കുറയാത്തത് ജനങ്ങളുടെ ദുരിതം ഇരട്ടിയാക്കുന്നുണ്ട്. ഇന്ത്യയിൽ ഔദ്യോഗികമായി രേഖപ്പെടുത്തിയതിൽ വെച്ച് ഏറ്റവും ഉയർന്ന താപനില 2016-ൽ രാജസ്ഥാനിലെ ഫലോദിയിൽ രേഖപ്പെടുത്തിയ 51 ഡിഗ്രി സെൽഷ്യസാണ്. വർഷങ്ങളായി നടക്കുന്ന ശാസ്ത്രീയ പഠനങ്ങൾ വ്യക്തമാക്കുന്നത് കാലാവസ്ഥാ വ്യതിയാനം മൂലം ഉഷ്ണതരംഗങ്ങളുടെ ദൈർഘ്യവും തീവ്രതയും ആവർത്തനവും വർദ്ധിച്ചുകൊണ്ടിരിക്കുകയാണെന്നാണ്.
Story Summary
Prime Minister Narendra Modi issued a stark warning regarding the severe heatwave gripping India, as local authorities reported heatstroke deaths, including at least 16 in Telangana last week. The global platform AQI recorded that the top 45 hottest cities in the world at midday on Wednesday were all in India, with temperatures surging past 43°C.
