ക്വറ്റ: പാകിസ്താനിലെ ബലൂചിസ്താൻ പ്രവിശ്യയിലുണ്ടായ ശക്തമായ ചാവേർ ബോംബ് സ്ഫോടനത്തിൽ കുറഞ്ഞത് 24 പാകിസ്താൻ സൈനികർ കൊല്ലപ്പെട്ടു. നൂറിലധികം പേർക്ക് പരിക്കേറ്റിട്ടുണ്ട്. ഞായറാഴ്ച രാവിലെ ക്വട്ട മിലിട്ടറി കന്റോൺമെന്റിൽ നിന്ന് യാത്രക്കാരെ കയറ്റി അല്പം ദൂരം മുന്നോട്ട് നീങ്ങിയ ഷട്ടിൽ ട്രെയിനാണ് ഭീകരാക്രമണത്തിന് ഇരയായത്. ‘ചമൻ ഫട്ടാക്’ എന്ന സ്ഥലത്തിന് സമീപം വെച്ചായിരുന്നു ട്രെയിൻ ലക്ഷ്യമിട്ട് വൻ സ്ഫോടനം നടത്തിയത്.(Pakistan Quetta Train Blast 24 Military Personnel Killed BLA Majeed Brigade Claims Responsibility)
ബലൂചിസ്താൻ കേന്ദ്രീകരിച്ച് പ്രവർത്തിക്കുന്ന വിഘടനവാദി സംഘടനയായ ബലൂച് ലിബറേഷൻ ആർമിയുടെ കീഴിലുള്ള ‘മജീദ് ബ്രിഗേഡ്’ ആക്രമണത്തിന്റെ ഉത്തരവാദിത്തം ഏറ്റെടുത്തു. ട്രെയിനിൽ യാത്ര ചെയ്തിരുന്ന പാകിസ്താൻ സൈനികരെ ലക്ഷ്യമിട്ടാണ് ഈ ‘ഫിദായീൻ ആക്രമണം’ നടത്തിയതെന്ന് അവർ അവകാശപ്പെട്ടു. സ്ഫോടനം നടക്കുമ്പോൾ മുന്നൂറിലധികം പാകിസ്താൻ സൈനികർ ഈ ട്രെയിനിൽ ഉണ്ടായിരുന്നുവെന്നാണ് വിവരം. സ്ഫോടനത്തിന്റെ ആഘാതത്തിൽ ട്രെയിനിന്റെ മൂന്ന് ബോഗികളിലൊന്ന് പൂർണ്ണമായി തകരുകയും തീപിടിക്കുകയും ചെയ്തു. ശക്തമായ സ്ഫോടനത്തെ തുടർന്ന് ട്രെയിൻ പാളം തെറ്റി.
റെയിൽവേ ട്രാക്കിന് സമീപമുള്ള നിരവധി വീടുകൾക്കും വാഹനങ്ങൾക്കും കേടുപാടുകൾ സംഭവിച്ചിട്ടുണ്ട്. തകർന്ന ബോഗിയുടെ അവശിഷ്ടങ്ങൾക്കിടയിൽ ഇനിയും ആളുകൾ കുടുങ്ങിക്കിടക്കാൻ സാധ്യതയുള്ളതിനാൽ മരണസംഖ്യ ഇനിയും ഉയർന്നേക്കാമെന്നാണ് റിപ്പോർട്ടുകൾ. “ഇന്ന് രാവിലെ, ബലൂച് ലിബറേഷൻ ആർമിയുടെ ഫിദായീൻ വിഭാഗമായ മജീദ് ബ്രിഗേഡ്, ക്വട്ട കന്റോൺമെന്റിൽ നിന്ന് അധിനിവേശ സേനാംഗങ്ങളെ കൊണ്ടുപോകുകയായിരുന്ന ട്രെയിൻ ലക്ഷ്യമിട്ട് ആസൂത്രിതമായ ആക്രമണം നടത്തി. ഈ ഓപ്പറേഷന്റെ പൂർണ്ണ ഉത്തരവാദിത്തം ബലൂച് ലിബറേഷൻ ആർമി ഏറ്റെടുക്കുന്നു. ശത്രുക്കൾക്ക് സംഭവിച്ച നാശനഷ്ടങ്ങളുടെ കൃത്യമായ വിവരങ്ങൾ ഉടൻ തന്നെ ഔദ്യോഗിക മാധ്യമ പ്രസ്താവനയിലൂടെ പുറത്തുവിടും,” എന്നാണ് പ്രസ്താവനയിൽ പറയുന്നത്.
സംഭവം നടന്ന ഉടൻ തന്നെ പ്രാദേശിക നിവാസികളും അത്യാഹിത വിഭാഗങ്ങളും സ്ഥലത്തെത്തി രക്ഷാപ്രവർത്തനം ആരംഭിച്ചു. പരിക്കേറ്റവരെ ഉടൻ തന്നെ ക്വറ്റയിലെ ലോക്കൽ സിവിൽ ഹോസ്പിറ്റൽ, എഫ്.സി ഹോസ്പിറ്റൽ, സി.എം.എച്ച് എന്നിവിടങ്ങളിലേക്ക് മാറ്റി. സുരക്ഷാ സേന പ്രദേശം പൂർണ്ണമായി വളയുകയും സ്ഫോടനം നടന്ന ട്രാക്കിൽ വിശദമായ അന്വേഷണം ആരംഭിക്കുകയും ചെയ്തിട്ടുണ്ട്.
Story Summary
At least 24 Pakistani military personnel were killed and over 100 injured in a massive Suicide Vehicle-borne IED (SVB-IED) blast targeting a shuttle train near ‘Chaman Phatak’ in Quetta, Balochistan. The train was carrying over 300 military personnel from the Quetta military cantonment when the explosion caused it to derail and catch fire, completely destroying one of its bogies.
