കൊച്ചി: വിദേശ ആഡംബര കാറുകൾ നികുതി വെട്ടിച്ച് ഇന്ത്യയിലേക്ക് കടത്തിയെന്ന കേസുമായി ബന്ധപ്പെട്ട ‘ഓപ്പറേഷൻ നംഖോർ’ (Operation Numkhor) അന്വേഷണത്തിന്റെ ഭാഗമായി നടൻ ദുൽഖർ സൽമാന്റെ ഒരു വാഹനം കൂടി കസ്റ്റംസ് പിടിച്ചെടുത്തതായി റിപ്പോർട്ട് (Dulquer Salmaan Luxury Car Case). കളമശ്ശേരിയിലെ ‘സിഗ്നേച്ചർ കാർസ്’ എന്ന സ്ഥാപനത്തിൽ സൂക്ഷിച്ചിരുന്ന നിസ്സാൻ പട്രോൾ (Nissan Patrol) കാറാണ് കസ്റ്റംസ് കസ്റ്റഡിയിലെടുത്തത്. ദുൽഖർ അഭിനയിച്ച ‘ലക്കി ഭാസ്കർ’ എന്ന സിനിമയിൽ ഉപയോഗിച്ച വാഹനമാണിത് എന്നാണ് വിവരം.ഈ കേസിന്റെ അന്വേഷണവുമായി ബന്ധപ്പെട്ട് ദുൽഖർ സൽമാന്റെ മൂന്ന് ആഡംബര വാഹനങ്ങൾ കസ്റ്റംസ് നേരത്തെ പിടിച്ചെടുത്തിരുന്നു. അതിന് പിന്നാലെയാണ് ഇപ്പോൾ നാലാമത്തെ വാഹനവും കസ്റ്റഡിയിലെടുത്തിരിക്കുന്നത്.
കാർ കള്ളക്കടത്തുമായി ബന്ധപ്പെട്ട് കോഴിക്കോട് എം.എസ്. റോഡ് ‘വേ കാർസി’ന്റെ (Way Cars) പങ്കാളിയായ സൈൻ മാർവേയെ കസ്റ്റംസ് അറസ്റ്റ് ചെയ്തു.ഇന്ത്യ-ഭൂട്ടാൻ അതിർത്തി വഴി വ്യാജ രേഖകളും വിവിധ വിദേശ എംബസികളുടെ പേരുകളും ഉപയോഗിച്ച് ആഡംബര കാറുകൾ നികുതി വെട്ടിച്ച് ഇന്ത്യയിലേക്ക് കടത്തിയെന്നാണ് കസ്റ്റംസിന്റെ കണ്ടെത്തൽ. ഭൂട്ടാനിൽ നിന്ന് വ്യാജ രേഖകൾ ചമച്ചാണ് ഈ കാറുകൾ കൊണ്ടുവന്നതെന്നാണ് ആരോപണം.
എന്നാൽ തനിക്കെതിരെയുള്ള ആരോപണങ്ങൾ ദുൽഖർ സൽമാൻ നിഷേധിച്ചു. ഇന്ത്യയിലെ മുൻ ഉടമസ്ഥരിൽ നിന്നും കൃത്യമായ ബാങ്ക് ഇടപാടുകളിലൂടെയും പൂർണ്ണമായും നിയമപരമായ രേഖകളോടെയുമാണ് താൻ ഈ വാഹനങ്ങൾ വാങ്ങിയതെന്ന് അദ്ദേഹം വ്യക്തമാക്കി. പിടിച്ചെടുത്തവയിൽ ഉൾപ്പെട്ട ലാൻഡ് റോവർ ഡിഫെൻഡർ കാർ, അന്താരാഷ്ട്ര റെഡ് ക്രോസ് സംഘടന ഡൽഹിയിലേക്ക് കൊണ്ടുവന്നതാണെന്നും താൻ അത് നിയമപരമായാണ് വാങ്ങിയതെന്നും അദ്ദേഹം കോടതിയെ ബോധിപ്പിച്ചിട്ടുണ്ട്.
News Summary: As part of the ongoing ‘Operation Numkhor’ investigation into luxury car tax evasion, the Customs Department has seized another vehicle linked to actor Dulquer Salmaan. A Nissan Patrol car, which was reportedly used in his movie ‘Lucky Baskhar’ and parked at Signature Cars in Kalamassery, was taken into custody. This marks the fourth luxury vehicle seized from the actor in connection with this case. Meanwhile, Customs officials made the first arrest in the smuggling racket, detaining Zain Marve, a partner of Way Cars based on MS Road, Kozhikode. The probe reveals that luxury cars were smuggled into India via the India-Bhutan border using forged documents and embassy names to evade import duties. Dulquer Salmaan has maintained his innocence, stating in court that the cars—including a Land Rover Defender—were purchased legally via proper bank channels from previous Indian owners.
