ന്യൂഡൽഹി: ഇന്ധന ഉപഭോഗം കുറയ്ക്കുന്നതിനും ഭരണനിർവ്വഹണം കാര്യക്ഷമമാക്കുന്നതിനുമായി ഡൽഹിയിലെ സർക്കാർ ഓഫീസുകളിൽ ആഴ്ചയിൽ രണ്ട് ദിവസം വർക്ക് ഫ്രം ഹോം പ്രഖ്യാപിച്ചു (Delhi Work From Home). ആഗോളതലത്തിൽ ഇന്ധനവില വർദ്ധിക്കുന്ന സാഹചര്യത്തിൽ പ്രധാനമന്ത്രി നരേന്ദ്ര മോദി നടത്തിയ ആഹ്വാനത്തെത്തുടർന്നാണ് ഡൽഹി മുഖ്യമന്ത്രി രേഖാ ഗുപ്തയുടെ ഈ തീരുമാനം. ഉത്തരവ് നാളെ മുതൽ പ്രാബല്യത്തിൽ വരും.
ഇന്ധന സംരക്ഷണത്തിനായി “മേരാ ഭാരത് മേരാ യോഗ്ദാൻ” (എന്റെ ഇന്ത്യ എന്റെ സംഭാവന) എന്ന പേരിൽ പുതിയ പ്രചാരണ പരിപാടിക്കും സർക്കാർ തുടക്കം കുറിച്ചു. ഇതിന്റെ ഭാഗമായി എല്ലാ തിങ്കളാഴ്ചയും “മൺഡേ മെട്രോ” ആയി ആചരിക്കും. അന്നേ ദിവസം മന്ത്രിമാരും ഉദ്യോഗസ്ഥരും ജീവനക്കാരും മെട്രോ ട്രെയിനുകളിൽ മാത്രമേ യാത്ര ചെയ്യാവൂ എന്ന് നിർദ്ദേശമുണ്ട്. പൊതുജനങ്ങളോട് ആഴ്ചയിൽ ഒരു ദിവസം “നോ വെഹിക്കിൾ ഡേ” ആയി ആചരിക്കാനും സർക്കാർ അഭ്യർത്ഥിച്ചു.
മറ്റ് പ്രധാന പ്രഖ്യാപനങ്ങൾ:
വാഹനങ്ങൾക്ക് നിയന്ത്രണം: അടുത്ത ആറ് മാസത്തേക്ക് സർക്കാർ ആവശ്യങ്ങൾക്കായി പുതിയ പെട്രോൾ, ഡീസൽ, ഇലക്ട്രിക് വാഹനങ്ങൾ വാങ്ങില്ല.
യാത്രാ വിദേശയാത്ര നിരോധനം: മന്ത്രിമാർക്കും ഉദ്യോഗസ്ഥർക്കും അടുത്ത ഒരു വർഷത്തേക്ക് ഔദ്യോഗിക വിദേശയാത്രകൾക്ക് നിരോധനം ഏർപ്പെടുത്തി.
വൈദ്യുതി ലാഭിക്കൽ: സർക്കാർ ഓഫീസുകളിലെ എയർ കണ്ടീഷണറുകൾ 24 മുതൽ 26 ഡിഗ്രി സെൽഷ്യസിനിടയിൽ ക്രമീകരിക്കണം. അനാവശ്യമായി വൈദ്യുതി പാഴാകുന്നത് തടയാൻ ഓഫീസുകളിൽ മാസ്റ്റർ സ്വിച്ചുകൾ സ്ഥാപിക്കും.
യാത്രാബത്ത വർദ്ധിപ്പിച്ചു: ജീവനക്കാരുടെ ട്രാൻസ്പോർട്ട് അലവൻസ് പത്ത് ശതമാനം വർദ്ധിപ്പിക്കാനും സർക്കാർ തീരുമാനിച്ചു.
പശ്ചിമേഷ്യയിലെ സംഘർഷങ്ങൾ കാരണം ആഗോള തലത്തിൽ ഇന്ധനവില വർദ്ധിക്കുന്നതും സപ്ലൈ ചെയിൻ തടസ്സപ്പെടുന്നതും ഇന്ത്യൻ സമ്പദ്വ്യവസ്ഥയെ ബാധിക്കാതിരിക്കാൻ പൗരന്മാർ സഹകരിക്കണമെന്ന് പ്രധാനമന്ത്രി ആവശ്യപ്പെട്ടിരുന്നു. ഇതിന്റെ അടിസ്ഥാനത്തിലാണ് ഡൽഹി സർക്കാരിന്റെ ഈ അടിയന്തര നടപടികൾ.
Summary: Delhi Chief Minister Rekha Gupta has announced two days of work-from-home per week for government offices to conserve fuel, following PM Narendra Modi’s appeal. The government is launching the “Mera Bharat Mera Yogdan” campaign, introducing “Monday Metro” for officials and a ban on new vehicle purchases and official foreign trips for a year. Electricity conservation measures, such as setting ACs to 24-26°C, have also been implemented.
