ലണ്ടൻ: പ്രാദേശിക തെരഞ്ഞെടുപ്പുകളിലെ കനത്ത തിരിച്ചടിക്ക് പിന്നാലെ ബ്രിട്ടീഷ് പ്രധാനമന്ത്രി കീർ സ്റ്റാർമർക്കെതിരെ ഭരണകക്ഷിയായ ലേബർ പാർട്ടിയിൽ പടയൊരുക്കം. സ്റ്റാർമർ പ്രധാനമന്ത്രി സ്ഥാനം ഒഴിയണമെന്ന് ആവശ്യപ്പെട്ട് 70-ലധികം പാർലമെന്റ് അംഗങ്ങൾ രംഗത്തെത്തി. തിങ്കളാഴ്ച നാല് പ്രമുഖ മന്ത്രിതല സഹായികൾ രാജി വെച്ചതോടെ സ്റ്റാർമർക്കെതിരെയുള്ള നീക്കങ്ങൾ ശക്തമായി.(British Prime Minister Keir Starmer Faces Leadership Crisis After Election Defeat)
വിദേശകാര്യ സെക്രട്ടറി യെവെറ്റ് കൂപ്പർ, ആഭ്യന്തര മന്ത്രി ഷബാന മഹ്മൂദ് തുടങ്ങിയ മുതിർന്ന ക്യാബിനറ്റ് അംഗങ്ങൾ പോലും സ്റ്റാമറുടെ നേതൃത്വത്തിൽ ആശങ്ക പ്രകടിപ്പിച്ചതായാണ് റിപ്പോർട്ട്. അധികാരം സുഗമമായി കൈമാറുന്നതിനെക്കുറിച്ച് ആലോചിക്കണമെന്ന് ഇവർ പ്രധാനമന്ത്രിയോട് ആവശ്യപ്പെട്ടു കഴിഞ്ഞു. 2029-ൽ നടക്കാനിരിക്കുന്ന പൊതുതിരഞ്ഞെടുപ്പിൽ സ്റ്റാർമറുടെ നേതൃത്വത്തിൽ പാർട്ടിയെ നയിക്കാൻ കഴിയില്ലെന്ന വികാരമാണ് ഭൂരിഭാഗം നേതാക്കൾക്കുമുള്ളത്.
ഇംഗ്ലണ്ട്, സ്കോട്ട്ലൻഡ്, വെയ്ൽസ് എന്നിവിടങ്ങളിൽ നടന്ന കൗൺസിൽ തെരഞ്ഞെടുപ്പുകളിൽ ലേബർ പാർട്ടിക്ക് വലിയ തിരിച്ചടിയാണ് നേരിട്ടത്. 1999-ന് ശേഷം ആദ്യമായി വെയ്ൽസ് പാർലമെന്റിന്റെ നിയന്ത്രണം പാർട്ടിക്ക് നഷ്ടമായി. തീവ്ര വലതുപക്ഷ കക്ഷിയായ ‘റിഫോം യുകെ’യും ഗ്രീൻ പാർട്ടിയും ലേബർ വോട്ടുകളിൽ വലിയ വിള്ളലുണ്ടാക്കി. പ്രധാനമന്ത്രിയിലുള്ള വിശ്വാസം ജനങ്ങൾക്ക് നഷ്ടപ്പെട്ടുവെന്നും നേതൃമാറ്റം അനിവാര്യമാണെന്നും രാജി വെച്ച സഹായികൾ പരസ്യമായി പ്രതികരിച്ചു.
പാർട്ടിക്കുള്ളിൽ കലാപം പുകയുമ്പോഴും രാജി വെക്കില്ലെന്ന ഉറച്ച നിലപാടിലാണ് കീർ സ്റ്റാർമർ. “എന്നെ സംശയിക്കുന്നവർക്ക് മുന്നിൽ ഞാൻ ആരാണെന്ന് തെളിയിക്കും, പോരാട്ടം തുടരും” എന്ന് ലണ്ടനിൽ അനുയായികളെ അഭിസംബോധന ചെയ്ത് അദ്ദേഹം പറഞ്ഞു. സാമ്പത്തിക മുരടിപ്പും ജീവിതച്ചെലവ് വർദ്ധിച്ചതുമാണ് 2024 ജൂലൈയിൽ അധികാരമേറ്റ സ്റ്റാർമർക്ക് തിരിച്ചടിയായത്. വെസ് സ്ട്രീറ്റിംഗ്, ആഞ്ജല റെയ്നർ തുടങ്ങിയ പ്രമുഖരുടെ പേരുകളാണ് സ്റ്റാമറുടെ പകരക്കാരായി ഇപ്പോൾ ഉയർന്നു കേൾക്കുന്നത്. ലേബർ പാർട്ടിയുടെ നിയമപ്രകാരം 81 എംപിമാർ ഒപ്പിട്ടു നൽകിയാൽ മാത്രമേ ഔദ്യോഗികമായി നേതൃസ്ഥാനത്തേക്ക് പുതിയ തെരഞ്ഞെടുപ്പ് നടത്താൻ സാധിക്കൂ.
Story Summary
British Prime Minister Keir Starmer is facing a severe leadership crisis as over 70 Labour MPs and several ministerial aides demand his resignation following major losses in local elections. Despite the mounting pressure and calls for a transition of power, Starmer has refused to step down, vowing to regain public trust.
