കൊച്ചി: മലയാള സിനിമാ വ്യവസായത്തിൽ തനിക്കെതിരെ ചില കേന്ദ്രങ്ങൾ മനപ്പൂർവ്വം പ്രവർത്തിക്കുന്നുണ്ടെന്നും അതിന്റെ ഭാഗമായി വലിയ വിവേചനങ്ങൾ നേരിടേണ്ടി വന്നിട്ടുണ്ടെന്നും നടൻ ഷെയ്ൻ നിഗം (Shane Nigam Interview). തന്റെ പുതിയ ചിത്രമായ ‘ദൃഢം’ റിലീസിന് തയ്യാറെടുക്കുന്നതിനിടെയാണ് ഇൻഡസ്ട്രിയിലെ ചിലരുടെ ഇടപെടലുകളെക്കുറിച്ച് താരം മനംതുറന്നത്.
തനിക്ക് സംഭവിക്കുന്ന ചെറിയ പ്രശ്നങ്ങളെപ്പോലും നൂറായി പർവ്വതീകരിച്ച് കാണിക്കാൻ ആളുകളുണ്ടെന്നും തന്നെ കാണാത്തവർ പോലും ഒരു ‘ഭീകര ജീവിയായാണ്’ ചിത്രീകരിച്ചിരിക്കുന്നതെന്നും ഷെയ്ൻ പറയുന്നു. ഒരാളെ ഉയർത്താനും തകർക്കാനും നല്ലൊരു പി.ആർ (PR) ടീമിന് സാധിക്കുമെന്നതിന് ഉദാഹരണമാണ് തന്റെ ജീവിതമെന്നും അദ്ദേഹം കൂട്ടിച്ചേർത്തു.
താൻ നേരിടുന്ന ബോയ്ക്കട്ടിംഗിനെക്കുറിച്ച് ഷെയ്ൻ ഒരു ഉദാഹരണവും പങ്കുവെച്ചു: “ഒരു തെലുങ്ക് സിനിമയുടെ ഷൂട്ടിനായി ഹൈദരാബാദിൽ പോയപ്പോൾ അവിടുത്തെ ഒരു ക്യാമറമാൻ എന്നോട് പറഞ്ഞു, എന്നെ വെച്ച് സിനിമ ചെയ്യാൻ ആഗ്രഹിച്ച ചിലർ എന്റെ ഫോൺ നമ്പർ ചോദിച്ചിട്ട് ഇൻഡസ്ട്രിയിൽ ഉള്ളവർ നൽകിയില്ലെന്ന്. നമ്മളെക്കുറിച്ച് മുൻവിധികൾ ഉണ്ടാക്കി മാറ്റിനിർത്തുന്ന അവസ്ഥയാണിത്.”
മുൻപുണ്ടായ വിവാദങ്ങളിൽ തന്റെ ഭാഗത്തും തെറ്റുകൾ സംഭവിച്ചിട്ടുണ്ടെന്ന് ഷെയ്ൻ സമ്മതിച്ചു. അന്ന് സാഹചര്യങ്ങൾ കൈകാര്യം ചെയ്യാൻ അറിയില്ലായിരുന്നു. നല്ല തിരക്കഥയുണ്ടെങ്കിൽ നല്ല സിനിമയാകുമെന്ന അമിത ആത്മവിശ്വാസം പണ്ട് ഉണ്ടായിരുന്നു. എന്നാൽ ഇപ്പോൾ സിനിമകൾ തിരഞ്ഞെടുക്കുന്നതിലും പ്രൊഡക്ഷൻ ഹൗസുകൾ നോക്കുന്നതിലും താൻ കൂടുതൽ ശ്രദ്ധാലുവാണെന്നും കാര്യങ്ങളെ പക്വതയോടെ കാണാൻ പഠിച്ചുവെന്നും താരം വ്യക്തമാക്കി.
നവാഗതനായ മാർട്ടിൻ ജോസഫ് സംവിധാനം ചെയ്യുന്ന ‘ദൃഢം’ എന്ന ചിത്രത്തിൽ പോലീസ് വേഷത്തിലാണ് ഷെയ്ൻ എത്തുന്നത്. ഇ ഫോർ എക്സ്പെരിമെന്റ്സും ജീത്തു ജോസഫും ചേർന്നാണ് ചിത്രം അവതരിപ്പിക്കുന്നത്. മുകേഷ് ആർ. മേഹ്ത, സി.വി. സാരഥി എന്നിവർ ചേർന്നാണ് നിർമ്മാണം.
Story Summary: Ahead of the release of his film ‘Dridham’, actor Shane Nigam alleged that a section of the Malayalam film industry is working against him to tarnish his image. He revealed that people even refused to share his contact number with filmmakers from other industries and portrayed him as a “menacing figure” without even meeting him.
