അമരാവതി: ആന്ധ്രാപ്രദേശിലെ ശ്രീ സത്യസായി ജില്ലയിൽ എടിഎം മെഷീൻ കാറിൽ കെട്ടി വലിച്ചുകൊണ്ടുപോകാൻ മോഷ്ടാക്കളുടെ വിചിത്ര ശ്രമം (Andhra Pradesh ATM robbery). ധർമാവരം ടൗണിലുള്ള ഐഡിഎഫ്സി (IDFC) ബാങ്കിന്റെ എടിഎമ്മിലാണ് ബുധനാഴ്ച പുലർച്ചെ സിനിമാ സ്റ്റൈൽ കവർച്ചാശ്രമം നടന്നത്. ബൊലേറോ കാറിലെത്തിയ മുഖംമൂടി ധരിച്ച മൂന്നംഗ സംഘമാണ് ഈ സാഹസത്തിന് മുതിർന്നത്. ആദ്യം കമ്പിപ്പാര ഉപയോഗിച്ച് മെഷീൻ തകർക്കാൻ ശ്രമിച്ചെങ്കിലും പരാജയപ്പെട്ടു. തുടർന്നാണ് കാറിന്റെ പിൻവശത്ത് കയർ ഉപയോഗിച്ച് മെഷീൻ ബന്ധിപ്പിച്ച ശേഷം കാർ ഓടിച്ച് മെഷീൻ പുറത്തേക്ക് വലിച്ചെടുക്കാൻ ശ്രമിച്ചത്. മെഷീൻ അടിത്തറയിൽ നിന്ന് ഇളകിയെങ്കിലും ലക്ഷ്യം പൂർത്തിയാക്കാൻ ഇവർക്ക് സാധിച്ചില്ല.
വിവരമറിഞ്ഞ് പോലീസ് ഉടൻ സ്ഥലത്തെത്തിയെങ്കിലും കവർച്ചാസംഘം വാഹനം ഓടിച്ചുപോയി. കവർച്ചാശ്രമത്തിന്റെ മുഴുവൻ ദൃശ്യങ്ങളും എടിഎമ്മിലെ സിസിടിവി ക്യാമറയിൽ പതിഞ്ഞിട്ടുണ്ട്. സാധാരണ ഗതിയിൽ ഗ്യാസ് കട്ടർ ഉപയോഗിച്ച് മെഷീൻ മുറിച്ചു പണമെടുക്കുന്നതിന് പകരം, മെഷീൻ മൊത്തമായി കടത്തിക്കൊണ്ടുപോകാനുള്ള നീക്കം പോലീസിനെയും അത്ഭുതപ്പെടുത്തിയിട്ടുണ്ട്. സിസിടിവി ദൃശ്യങ്ങൾ കേന്ദ്രീകരിച്ച് പ്രതികൾക്കായി തിരച്ചിൽ ഊർജിതമാക്കി. അയൽസംസ്ഥാനമായ തെലങ്കാനയിലും സമാനമായ സംഭവങ്ങൾ റിപ്പോർട്ട് ചെയ്തിട്ടുള്ളതിനാൽ അന്തർസംസ്ഥാന കവർച്ചാ സംഘമാണോ ഇതിന് പിന്നിലെന്ന് പോലീസ് സംശയിക്കുന്നു.
Story Summary: A three-member masked gang attempted a bizarre robbery in Andhra Pradesh’s Dharmavaram by trying to pull away an IDFC Bank ATM machine using a Bolero car and a rope. Though they failed to flee with the machine, the entire act was caught on CCTV, leading to a high-alert investigation by the police.
