ബാങ്കോക്ക്: ഇന്ത്യക്കാർ ഉൾപ്പെടെയുള്ള വിദേശ വിനോദസഞ്ചാരികൾക്ക് പ്രിയപ്പെട്ട ഇടമായ തായ്ലൻഡ് സന്ദർശിക്കണമെങ്കിൽ ഇനിമുതൽ നിർബന്ധിത ആരോഗ്യ ഇൻഷുറൻസ് (Mandatory Health Insurance) ആവശ്യമായി വരുമെന്ന് റിപ്പോർട്ട്. തായ്ലൻഡ് പൊതുജനാരോഗ്യ മന്ത്രി പട്ടാന പ്രോംഫട്ട് ആണ് ഇത് സംബന്ധിച്ച ചർച്ചകൾ നടക്കുന്നതായി അറിയിച്ചത്. വിദേശികൾക്ക് ചികിത്സ നൽകുന്നതിലൂടെ രാജ്യത്തെ സർക്കാർ ആശുപത്രികൾക്കുണ്ടാകുന്ന വലിയ സാമ്പത്തിക ബാധ്യത കുറയ്ക്കാനാണ് ഈ നീക്കം.
എന്തുകൊണ്ട് ഇൻഷുറൻസ് നിർബന്ധമാക്കുന്നു?
തായ്ലൻഡിൽ എത്തുന്ന സഞ്ചാരികൾക്കോ തൊഴിലാളികൾക്കോ ചികിത്സ ആവശ്യമായി വരുന്ന സാഹചര്യത്തിൽ, ബില്ലുകൾ അടയ്ക്കാൻ സാധിക്കാതെ വരുന്നത് സർക്കാർ ആശുപത്രികൾക്ക് ഓരോ വർഷവും കോടിക്കണക്കിന് രൂപയുടെ ബാധ്യതയുണ്ടാക്കുന്നുണ്ട്. വിദേശികളുടെ കുടിശ്ശികയായ ചികിത്സാ ചിലവ് രാജ്യത്തെ ആരോഗ്യമേഖലയെ കാര്യമായി ബാധിക്കുന്നുവെന്ന് മന്ത്രി പട്ടാന പ്രോംഫട്ട് ചൂണ്ടിക്കാട്ടി. സഞ്ചാരികൾക്ക് അടിയന്തര ചികിത്സ ഉറപ്പാക്കാനും അവരുടെ സുരക്ഷ മെച്ചപ്പെടുത്താനും ഇൻഷുറൻസ് സഹായിക്കും.
സഞ്ചാരികളെ ബാധിക്കുമോ?
വിസ നടപടികൾ ലളിതമായതോടെ തായ്ലൻഡിലേക്ക് എത്തുന്ന ഇന്ത്യൻ സഞ്ചാരികളുടെ എണ്ണത്തിൽ വലിയ വർദ്ധനവ് ഉണ്ടായിട്ടുണ്ട്. ഇൻഷുറൻസ് നിർബന്ധമാക്കുന്നത് വിനോദസഞ്ചാര മേഖലയെ ദോഷകരമായി ബാധിക്കുമോ എന്ന ആശങ്ക സർക്കാരിനുണ്ട്. വിനോദസഞ്ചാരികൾക്ക് അമിതഭാരമാകാത്ത രീതിയിൽ വളരെ കുറഞ്ഞ പ്രീമിയത്തിൽ ലഭിക്കുന്ന ഇൻഷുറൻസ് പാക്കേജുകൾ അവതരിപ്പിക്കാനാണ് മന്ത്രാലയത്തിന്റെ തീരുമാനം.
ടൂറിസ്റ്റുകൾക്ക് പുറമെ വിദേശ തൊഴിലാളികൾക്കും ഏകദിന യാത്രക്കാർക്കും ഈ നിയമം ബാധകമാക്കാൻ ആലോചനയുണ്ട്.നിലവിൽ ഇതിന്റെ പ്രായോഗിക വശങ്ങൾ ആരോഗ്യ മന്ത്രാലയം പഠിച്ചു വരികയാണ്. ഔദ്യോഗിക ഉത്തരവ് വരുന്നതോടെ തായ്ലൻഡ് യാത്രയ്ക്കുള്ള രേഖകളിൽ ഇൻഷുറൻസ് കൂടി ഉൾപ്പെടുത്തേണ്ടി വരും.
Story Summary: Thailand’s Ministry of Public Health is considering making health insurance mandatory for all foreign tourists, including Indians. Public Health Minister Pattana Promphat stated that this move aims to reduce the financial burden on government hospitals caused by unpaid medical bills from foreigners. To avoid a decline in tourism, the government plans to introduce insurance packages with very low premiums.
