മുംബൈ: ഐ.പി.എൽ 2026 സീസണിൽ രാജസ്ഥാൻ റോയൽസിനെ നയിക്കുന്ന റിയാൻ പരാഗ് വലിയ വിവാദത്തിൽ. പഞ്ചാബ് കിംഗ്സിനെതിരെയുള്ള മത്സരത്തിനിടെ ഡ്രെസ്സിംഗ് റൂമിലിരുന്ന് വാപ്പിംഗ് (ഇലക്ട്രോണിക് സിഗരറ്റ്) ചെയ്തതാണ് താരത്തെ വെട്ടിലാക്കിയിരിക്കുന്നത് (Riyan Parag Vaping Controversy). മത്സരത്തിന്റെ 16-ാം ഓവറിൽ യശസ്വി ജയ്സ്വാൾ ഉൾപ്പെടെയുള്ള സഹതാരങ്ങളുടെ സാന്നിധ്യത്തിലാണ് പരാഗ് വാപ്പിംഗ് നടത്തിയത്. ഇതിന്റെ ദൃശ്യങ്ങൾ പുറത്തുവന്നതോടെ താരം കടുത്ത നടപടി നേരിടേണ്ടി വരുമെന്നാണ് സൂചന.
ബി.സി.സി.ഐ മാർഗ്ഗനിർദ്ദേശങ്ങൾ അനുസരിച്ച് ഐ.പി.എൽ സ്റ്റേഡിയത്തിനുള്ളിലോ ഡ്രെസ്സിംഗ് റൂമിലോ പുകവലിക്കുന്നതോ വാപ്പിംഗ് നടത്തുന്നതോ കർശനമായി നിരോധിച്ചിട്ടുണ്ട്. പ്രത്യേകമായി അനുവദിക്കപ്പെട്ട ഇടങ്ങളിൽ മാത്രമേ ഇതിന് അനുവാദമുള്ളൂ. 2019-ലെ പ്രൊഹിബിഷൻ ഓഫ് ഇലക്ട്രോണിക് സിഗരറ്റ്സ് ആക്ട് (PECA) പ്രകാരം ഇന്ത്യയിൽ ഇ-സിഗരറ്റുകളുടെ ഉല്പാദനവും ഉപയോഗവും കൈവശം വെക്കുന്നതും നിരോധിച്ചിട്ടുള്ളതാണ്. ഇത് ലംഘിക്കുന്നത് പിഴയ്ക്കും ജയിൽ ശിക്ഷയ്ക്കും കാരണമായേക്കാവുന്ന കുറ്റമാണ്. നേരത്തെ രാജസ്ഥാൻ റോയൽസ് ടീം മാനേജർ റോമി ഭിന്ദറിന് ഡഗ്ഔട്ടിൽ മൊബൈൽ ഫോൺ ഉപയോഗിച്ചതിന് ഒരു ലക്ഷം രൂപ പിഴ ചുമത്തിയിരുന്നു. സമാനമായ രീതിയിൽ സുരക്ഷാ ചട്ടങ്ങളുടെയും പെരുമാറ്റച്ചട്ടങ്ങളുടെയും ലംഘനമായിട്ടാണ് പരാഗിന്റെ പ്രവൃത്തിയെയും കാണുന്നത്.
സഞ്ജു സാംസൺ ചെന്നൈ സൂപ്പർ കിംഗ്സിലേക്ക് മാറിയതിനെത്തുടർന്നാണ് പരാഗ് രാജസ്ഥാന്റെ നായകസ്ഥാനം ഏറ്റെടുത്തത്. എന്നാൽ ബാറ്റിംഗിൽ ഫോം കണ്ടെത്താൻ പ്രയാസപ്പെടുന്ന പരാഗ്, കഴിഞ്ഞ ഏഴ് ഇന്നിംഗ്സുകളിൽ നിന്നായി വെറും 81 റൺസ് മാത്രമാണ് നേടിയത്. കളിക്കളത്തിലെ മോശം ഫോമിനൊപ്പം പുതിയ വിവാദം കൂടി വന്നത് പരാഗിന് തിരിച്ചടിയാകാൻ സാധ്യതയുണ്ട്.
Summary: Rajasthan Royals captain Riyan Parag is facing a potential code of conduct breach after being spotted vaping in the dressing room during an IPL 2026 match against Punjab Kings. BCCI guidelines strictly prohibit smoking and vaping inside stadium premises and dressing rooms. Furthermore, the use of e-cigarettes is illegal in India under the PECA Act of 2019. This controversy adds to Parag’s struggles as captain, following his poor batting performance this season.
