ലാത്തൂർ: ഭർത്താവിനുള്ള അവിഹിത ബന്ധത്തിലുള്ള വൈരാഗ്യം തീർക്കാൻ ഏഴുവയസ്സുകാരനെ കൊലപ്പെടുത്തി തട്ടിക്കൊണ്ടുപോകൽ നാടകം സൃഷ്ടിച്ച സംഭവത്തിൽ പ്രതി അറസ്റ്റിൽ (Child Murder Maharashtra).ഭർത്താവിന്റെ കാമുകിയെന്നു സംശയിക്കുന്ന സ്ത്രീ കുട്ടികളെ തട്ടിക്കൊണ്ടുപോയെന്ന് വരുത്തിത്തീർക്കാന് ശ്രമിച്ച അനിത സ്വാമി എന്ന യുവതിയെയാണ് പോലീസ് അറസ്റ്റ് ചെയ്തത്.
ഞായറാഴ്ച രാവിലെ ഏഴ് മണിയോടെയാണ് അനിതയുടെ മകൻ സായ് ചരൺ (10), സഹോദരപുത്രൻ ദേവാൻഷ് (7) എന്നിവരെ കാണാതാകുന്നത്. ക്ഷേത്ര പുരോഹിതന്റെ കൊച്ചുമക്കളായ ഇവർക്കായി വീട്ടുകാർ തിരച്ചിൽ നടത്തിയെങ്കിലും കണ്ടെത്താനായില്ല. ഉച്ചയ്ക്ക് 2.10-ഓടെ വീടിനടുത്തുള്ള ഒരു പഴയ വീടിന് സമീപത്തെ പറമ്പിൽ ദേവാൻഷിന്റെ മൃതദേഹം കണ്ടെത്തി. കഴുത്തറുത്ത നിലയിലായിരുന്നു മൃതദേഹം.
കാണാതായ പത്തുവയസ്സുകാരൻ സായ് ചരണിനെ ഞായറാഴ്ച രാത്രി വൈകി ലാത്തൂർ നഗരത്തിൽ നിന്ന് പോലീസ് കണ്ടെത്തി. ഒരു മെക്കാനിക്കിന്റെ ഫോണിൽ നിന്ന് പിതാവിനെ വിളിച്ചതാണ് കുട്ടിയെ കണ്ടെത്താൻ സഹായിച്ചത്. ഒരു സ്ത്രീ തങ്ങളെ തട്ടിക്കൊണ്ടുപോയെന്നും താൻ അവിടെനിന്ന് രക്ഷപ്പെട്ടതാണെന്നുമായിരുന്നു സായ് ചരൺ ആദ്യം പോലീസിനോട് പറഞ്ഞത്.
എന്നാൽ പോലീസിന്റെ വിശദമായ ചോദ്യം ചെയ്യലിൽ കുട്ടി സത്യം വെളിപ്പെടുത്തി. അമ്മയാണ് തന്നോട് ഇങ്ങനെയൊക്കെ പറയാൻ പഠിപ്പിച്ചതെന്നും അമ്മ തന്നെ ബസ്സിൽ കയറ്റി അമ്മാവന്റെ വീട്ടിലേക്ക് അയച്ചതാണെന്നും സായ് ചരൺ മൊഴി നൽകി. ഇതോടെ അനിതയെ പോലീസ് കസ്റ്റഡിയിലെടുത്തു.
ഭർത്താവിന്റെ അവിഹിത ബന്ധം തന്നെ മാനസികമായി തളർത്തിയിരുന്നെന്നും ഇത് അവസാനിപ്പിക്കാൻ ഭർത്താവിന്റെ കാമുകിയെ ഒരു കൊലക്കേസിൽ കുടുക്കുക എന്നതായിരുന്നു തന്റെ ലക്ഷ്യമെന്നും അനിത സമ്മതിച്ചു. ദേവാൻഷിനെ ശ്വാസം മുട്ടിച്ചു കൊലപ്പെടുത്തിയ ശേഷം അയൽവാസിയായ സ്ത്രീയാണ് കുട്ടികളെ തട്ടിക്കൊണ്ടുപോയതെന്ന് വരുത്തിത്തീർക്കാൻ ഇവർ ശ്രമിക്കുകയായിരുന്നു.
പ്രതിയെ കോടതിയിൽ ഹാജരാക്കി റിമാൻഡ് ചെയ്തു. ചക്കൂർ പോലീസ് കേസിൽ കൂടുതൽ അന്വേഷണം നടത്തിവരികയാണ്.
Story Summary: In a horrific incident in Latur, Maharashtra, a 34-year-old woman named Anita Swami killed her 7-year-old nephew, Devansh, to falsely implicate her husband’s alleged lover in a murder case. She initially fabricated a story that a woman had kidnapped her son and nephew. However, her plot was exposed when her son, whom she had secretly sent to Latur, told the police that his mother had coached him to lie. Anita has been arrested and confessed to the crime.
