ലഖ്നൗ: കാണാതായ പതിനാറുകാരിക്കായുള്ള തിരച്ചിൽ അവസാനിച്ചത് പിതാവ് തന്നെ നടത്തിയ ക്രൂരമായ കൊലപാതകത്തിന്റെ വെളിപ്പെടുത്തലിൽ. പ്രണയബന്ധത്തിൽ നിന്ന് പിന്മാറാൻ വിസമ്മതിച്ചതിനെത്തുടർന്ന് വന്ദന ചൗബേ എന്ന പെൺകുട്ടിയെ പിതാവ് വിജയ് കുമാർ ചൗബേ ശ്വാസംമുട്ടിച്ച് കൊലപ്പെടുത്തുകയായിരുന്നു. തിരിച്ചറിയാതിരിക്കാൻ പെൺകുട്ടിയുടെ മുഖത്ത് ആസിഡ് ഒഴിച്ച ശേഷമാണ് മൃതദേഹം റോഡരികിൽ തള്ളിയത്.(Father Killed UP teen, Poured Acid On her Face)
കഴിഞ്ഞ വർഷം ഓഗസ്റ്റിൽ വന്ദന തന്റെ കാമുകനൊപ്പം വീടുവിട്ടിറങ്ങിയിരുന്നു. തുടർന്ന് പെൺകുട്ടിയെ വീട്ടുകാർ തിരികെ കൊണ്ടുവരികയും യുവാവിനെ മൂന്ന് മാസത്തേക്ക് ജയിലിലടയ്ക്കുകയും ചെയ്തു. എന്നാൽ നവംബറിൽ യുവാവ് ജയിൽ മോചിതനായ ശേഷവും വന്ദന ഇയാളുമായി ബന്ധം തുടർന്നു. ലഖ്നൗവിലെ ഒരു സർവ്വകലാശാലയിൽ ബസ് ഡ്രൈവറായ വിജയ് കുമാർ ചൗബേ, മകളുടെ ബന്ധം കാരണം കുടുംബത്തിനുണ്ടായ മാനക്കേട് ഭയന്ന് പലതവണ വീട് മാറി താമസിച്ചിരുന്നു. എന്നാൽ പ്രണയത്തിൽ നിന്ന് പിന്മാറാൻ പെൺകുട്ടി തയ്യാറായില്ല.
മകളെ ഇല്ലാതാക്കാൻ തീരുമാനിച്ച ചൗബേ, സുഹൃത്തായ അബ്ദുൽ മന്നാനുമായി ചേർന്ന് ഗൂഢാലോചന നടത്തി. ഏപ്രിൽ 13-ന് ‘ബാധ ഒഴിപ്പിക്കാനെന്ന’ വ്യാജേന പെൺകുട്ടിയെ രാജസ്ഥാനിലേക്ക് കൊണ്ടുപോകാൻ ഇവർ കാർ വാടകയ്ക്കെടുത്തു. രാത്രി ബാരാബങ്കിയിലെ വിജനമായ റോഡരികിൽ കാർ നിർത്തിയ ശേഷം, ഉറങ്ങിക്കിടക്കുകയായിരുന്ന പെൺകുട്ടിയെ ഇരുവരും ചേർന്ന് ശ്വാസംമുട്ടിച്ച് കൊന്നു. തുടർന്ന് തിരിച്ചറിയാതിരിക്കാൻ മുഖത്ത് ആസിഡ് ഒഴിച്ചു. ശാരദ കനാലിൽ മൃതദേഹം തള്ളാനായിരുന്നു പദ്ധതിയെങ്കിലും വാഹനങ്ങൾ വരുന്നത് കണ്ട് ഭയന്ന പ്രതികൾ മൃതദേഹം വഴിയിൽ ഉപേക്ഷിച്ച് കടന്നുകളയുകയായിരുന്നു.
കൊലപാതകത്തിന് ശേഷം ഏപ്രിൽ 16-ന് തന്റെ മകളെ കാണാനില്ലെന്ന് കാണിച്ച് ചൗബേ തന്നെ പോലീസിൽ പരാതി നൽകി. എന്നാൽ അന്വേഷണത്തിനിടെ ഫോൺ രേഖകൾ പരിശോധിച്ച പോലീസിന് പിതാവിന്റെ മൊഴികളിൽ സംശയം തോന്നി. തുടർന്ന് നടത്തിയ ചോദ്യം ചെയ്യലിൽ ചൗബേ കുറ്റം സമ്മതിച്ചു. സമൂഹത്തിന് മുന്നിലുള്ള അപമാനം ഭയന്നാണ് മകളെ കൊന്നതെന്ന് ഇയാൾ പോലീസിനോട് പറഞ്ഞു. 34-കാരനായ വിജയ് കുമാർ ചൗബേയെയും സഹായിയായ അബ്ദുൽ മന്നാനെയും പോലീസ് അറസ്റ്റ് ചെയ്തു. പ്രതികൾക്കെതിരെ കൊലപാതകം, തെളിവ് നശിപ്പിക്കൽ തുടങ്ങിയ കുറ്റങ്ങൾ ചുമത്തി നിയമനടപടികൾ ആരംഭിച്ചു.
