വാഷിംഗ്ടൺ: ലോകത്തിലെ പ്രകൃതി അത്ഭുതങ്ങളിലൊന്നായ അമേരിക്കയിലെ ഗ്രാൻഡ് കാന്യൻ എങ്ങനെ രൂപപ്പെട്ടുവെന്നതിനെക്കുറിച്ച് നിർണ്ണായക വിവരങ്ങൾ പുറത്തുവിട്ട് ഗവേഷകർ (Grand Canyon Geological History). കൊളറാഡോ നദി ദശലക്ഷക്കണക്കിന് വർഷങ്ങളായി പാറക്കെട്ടുകൾക്കിടയിലൂടെ ഒഴുകി രൂപപ്പെടുത്തിയതാണ് ഈ ഗർത്തം. പുതിയ പഠനമനുസരിച്ച്, ഏകദേശം 66 ലക്ഷം വർഷങ്ങൾക്ക് മുൻപാണ് കൊളറാഡോ നദി ഈ മേഖലയിലൂടെ ഒഴുകാൻ തുടങ്ങിയത്.
66 ലക്ഷം വർഷങ്ങൾക്ക് മുൻപ് കൊളറാഡോ നദി വടക്കുകിഴക്കൻ അരിസോണയിലെ ഒരു വലിയ താഴ്ന്ന പ്രദേശത്തേക്ക് ഒഴുകുകയും അവിടെ വിശാലവും ആഴം കുറഞ്ഞതുമായ ഒരു തടാകം രൂപപ്പെടുകയും ചെയ്തു. 150 കിലോമീറ്ററോളം വീതിയുണ്ടായിരുന്ന ഈ തടാകത്തെ ശാസ്ത്രജ്ഞർ ‘ബിദഹോച്ചി തടാകം’ എന്നാണ് വിളിക്കുന്നത്. ഏകദേശം 56 ലക്ഷം വർഷങ്ങൾക്ക് മുൻപ് ഈ തടാകം നിറഞ്ഞു കവിയുകയും വെള്ളം പുറത്തേക്ക് ഒഴുകിത്തുടങ്ങുകയും ചെയ്തു. ഈ കുത്തൊഴുക്കാണ് പിൽക്കാലത്ത് ഗ്രാൻഡ് കാന്യൻ എന്ന അത്ഭുതമായി മാറിയത്. ഏകദേശം 48 ലക്ഷം വർഷങ്ങൾക്ക് മുൻപ് ഈ നദി മെക്സിക്കോയിലെ കാലിഫോർണിയ ഉൾക്കടലിൽ ചെന്നുചേർന്നതായും ഗവേഷകർ കണ്ടെത്തി.
മണൽത്തരികളിലെ ‘സിർക്കോൺ’ (Zircon) എന്ന ധാതുവും പുരാതന അഗ്നിപർവ്വത സ്ഫോടനങ്ങളിൽ നിന്നുള്ള ചാരവും പഠിച്ചാണ് ശാസ്ത്രജ്ഞർ നദിയുടെ പഴയ പാതകൾ കണ്ടെത്തിയത്. ഓരോ സിർക്കോൺ തരിയും ആ മണൽ എവിടെ നിന്ന് വന്നുവെന്നതിന്റെ ചരിത്രം സൂക്ഷിക്കുന്ന വിവരശേഖരമാണെന്ന് യുസിഎൽഎ (UCLA) ഭൗമശാസ്ത്രജ്ഞൻ ജോൺ ഹെ പറഞ്ഞു. ഗ്രാൻഡ് കാന്യന് ഏകദേശം 450 കിലോമീറ്റർ നീളവും 29 കിലോമീറ്റർ വരെ വീതിയുമുണ്ട്. കഴിഞ്ഞ പത്ത് ലക്ഷം വർഷങ്ങളായി നദി പാറകൾ തുരക്കുന്നത് തുടരുകയാണ്. ഓരോ പത്ത് ലക്ഷം വർഷത്തിലും 100 മുതൽ 160 മീറ്റർ വരെ ആഴത്തിൽ നദി പാറകൾ കാർന്നെടുക്കുന്നുണ്ടെന്ന് യുഎസ് ജിയോളജിക്കൽ സർവേയിലെ ഗവേഷകനായ റയാൻ ക്രോ പറഞ്ഞു.
‘സയൻസ്’എന്ന ജേണലിലാണ് ഈ പഠനം പ്രസിദ്ധീകരിച്ചിരിക്കുന്നത്. പ്രകൃതിയുടെ ഈ മഹാത്ഭുതം എങ്ങനെ രൂപപ്പെട്ടുവെന്ന ദശാബ്ദങ്ങളായുള്ള തർക്കങ്ങൾക്ക് ഈ പഠനം വലിയൊരു പരിധി വരെ ഉത്തരം നൽകുന്നു.
Summary: Researchers have deciphered the geological history of the Grand Canyon, revealing that the Colorado River began carving the iconic landscape about 6.6 million years ago. By studying zircon crystals and volcanic ash, geologists from UCLA and the U.S. Geological Survey traced the river’s ancient path, finding that it initially formed a massive lake called Bidahochi Lake before spilling over 5.6 million years ago to carve the canyon. The study clarifies the timeline of this natural wonder, noting that the river continues to erode rock at a rate of over 100 meters per million years.
