Follow on Google News
ഇസ്ലാമാബാദ്: ഇന്ത്യ നടത്തിയ ‘ഓപ്പറേഷൻ സിന്ദൂർ’ ആക്രമണത്തിൽ തകർന്ന നൂർ ഖാൻ എയർ ബേസ് അതീവ സുരക്ഷാ സന്നാഹങ്ങളോടെ പുനർനിർമ്മിക്കാൻ പാകിസ്താൻ. ഭാവിയിൽ ഇന്ത്യയിൽ നിന്നുള്ള ആക്രമണങ്ങളെ പ്രതിരോധിക്കുന്നതിനായി പാക് സൈനിക മേധാവി ജനറൽ അസിം മുനീറിന്റെ നേതൃത്വത്തിൽ ബേസിനെ ഒരു ‘കോട്ട’യായി മാറ്റാനാണ് നീക്കം. നൂർ ഖാനിൽ നടക്കുന്ന പുതിയ നിർമ്മാണ പ്രവർത്തനങ്ങളുടെ സാറ്റലൈറ്റ് ദൃശ്യങ്ങൾ ഇപ്പോൾ പുറത്തുവന്നിട്ടുണ്ട്.(Pakistan’s Nur Khan air base gets surveillance shield wary of India )
ഭൗമ-രഹസ്യാന്വേഷണ വിദഗ്ധനായ ഡാമിയൻ സൈമൺ പുറത്തുവിട്ട സാറ്റലൈറ്റ് ചിത്രങ്ങൾ പ്രകാരം, റാവൽപിണ്ടിയിലെ ഈ വ്യോമതാവളത്തിൽ വിമാനങ്ങൾക്കായി പുതിയ ‘ഹാർഡൻഡ് ഹാങ്ങറുകൾ’ നിർമ്മിക്കുന്നുണ്ട്. കേവലം വിമാനങ്ങൾക്ക് സംരക്ഷണം നൽകുക എന്നതിലുപരി, ഇന്ത്യ ഉൾപ്പെടെയുള്ള ശത്രുരാജ്യങ്ങളുടെ നിരീക്ഷണ സംവിധാനങ്ങളിൽ നിന്ന് വിമാനങ്ങളെ മറച്ചുപിടിക്കുക എന്നതാണ് ഈ കടുപ്പമേറിയ ഹാങ്ങറുകളുടെ ലക്ഷ്യം. തുറസ്സായ സ്ഥലത്ത് വിമാനങ്ങൾ പാർക്ക് ചെയ്യുന്നത് ഇന്ത്യൻ ഡ്രോണുകൾക്കും മിസൈലുകൾക്കും എളുപ്പത്തിൽ ലക്ഷ്യം വെക്കാൻ സാധിക്കുമെന്ന് പാകിസ്താൻ തിരിച്ചറിഞ്ഞിട്ടുണ്ട്.’
പഹൽഗാം ഭീകരാക്രമണത്തിന് മറുപടിയായി ഇന്ത്യ നടത്തിയ ഓപ്പറേഷൻ സിന്ദൂറിൽ പാകിസ്താന്റെ 11 പ്രധാന സൈനിക താവളങ്ങൾ തകർന്നിരുന്നു. ഇതിൽ ഏറ്റവും തന്ത്രപ്രധാനമായിരുന്നു ഇസ്ലാമാബാദിന് വെറും 25 കിലോമീറ്റർ അകലെയുള്ള നൂർ ഖാൻ എയർ ബേസ്. റൺവേയിലെ കൂറ്റൻ ഗർത്തം, ഓപ്പറേഷൻ റൂം, ഇന്ധന ട്രക്കുകൾ, ഹാങ്ങറുകൾ, ഒരു IL-78 എയർ ടാങ്കർ എന്നിവ ഈ ആക്രമണത്തിൽ തകർന്നു. 36 മണിക്കൂറിനുള്ളിൽ ഇന്ത്യ 80-ഓളം ഡ്രോണുകൾ അയച്ചതായി പാക് ഉപപ്രധാനമന്ത്രി ഇഷാഖ് ദാർ സമ്മതിച്ചിരുന്നു.
പാകിസ്താന്റെ ആണവായുധങ്ങളുടെ മേൽനോട്ടം വഹിക്കുന്ന സ്ട്രാറ്റജിക് പ്ലാൻസ് ഡിവിഷന് സമീപമാണ് ഈ ബേസ് സ്ഥിതി ചെയ്യുന്നത്. കൂടാതെ, വിദേശ നയതന്ത്ര പ്രതിനിധികൾ എത്തുന്നതും ഇവിടേക്കാണ്. കഴിഞ്ഞ ആഴ്ച യുഎസ് വൈസ് പ്രസിഡന്റ് ജെ.ഡി. വാൻസ് ഇറാനുമായുള്ള സമാധാന ചർച്ചകൾക്കായി നൂർ ഖാൻ എയർ ബേസിലാണ് വിമാനമിറങ്ങിയത്. ഇത് നയതന്ത്രപരമായി വലിയ പ്രാധാന്യം നേടിയിരുന്നു. എന്നാൽ, ഇന്ത്യയുടെ നിരീക്ഷണ കണ്ണുകളിൽ നിന്ന് തങ്ങളുടെ യുദ്ധവിമാനങ്ങളെ ഒളിപ്പിക്കാനുള്ള പാകിസ്താന്റെ തിടുക്കം, അവർക്ക് ഇന്ത്യയോടുള്ള ഭയം വ്യക്തമാക്കുന്നതാണെന്ന് പ്രതിരോധ വിദഗ്ധർ ചൂണ്ടിക്കാട്ടുന്നു.
