ലോകകപ്പ് ടിക്കറ്റ് വിലയിൽ വൻ വർധന; ഫൈനൽ കാണാൻ നൽകേണ്ടത് 9 ലക്ഷത്തിലേറെ രൂപ; ഫുട്ബോൾ ഇനി പണക്കാർക്ക് മാത്രമോ? | FIFA World Cup 2026 Ticket Prices

ന്യൂയോർക്ക്: 2026-ലെ ഫിഫ ലോകകപ്പിന് പന്തുരുളാൻ മാസങ്ങൾ ബാക്കിനിൽക്കെ ടിക്കറ്റ് വിലയിലെ വൻ വർധന ലോകമെമ്പാടുമുള്ള ഫുട്ബോൾ ആരാധകരെ അമ്പരപ്പിക്കുന്നു (FIFA World Cup 2026 Ticket Prices). ഫിഫ പുതുതായി അവതരിപ്പിച്ച ‘പ്രീമിയം’ ടിക്കറ്റുകൾ മുൻകാല റെക്കോർഡുകളെല്ലാം തകർത്തിരിക്കുകയാണ്. സ്റ്റേഡിയത്തിലെ മുൻനിരയിലിരുന്ന് കളി കാണാനുള്ള ടിക്കറ്റിന് 10,990 ഡോളർ (ഏകദേശം 9.20 ലക്ഷം രൂപ) വരെയാണ് വില ഈടാക്കുന്നത്.

ടിക്കറ്റ് നിരക്കിലെ മാറ്റങ്ങൾ:

സ്റ്റേഡിയത്തിലെ ആദ്യ നിരയിലിരുന്ന് കളി കാണാനായി ‘ഫ്രണ്ട് കാറ്റഗറി’എന്ന പുതിയ വിഭാഗമാണ് ഫിഫ ഉൾപ്പെടുത്തിയത്. അമേരിക്കയും പരാഗ്വേയും തമ്മിലുള്ള ഉദ്ഘാടന മത്സരത്തിന് ഈ വിഭാഗത്തിൽ 4,105 ഡോളറാണ് (ഏകദേശം 3.40 ലക്ഷം രൂപ) വില. പ്രീമിയം വിഭാഗത്തിലെ രണ്ടാം നിര ടിക്കറ്റുകൾക്ക് 1,940 ഡോളർ മുതൽ 2,330 ഡോളർ വരെ നൽകണം.

ലോകകപ്പ് ഫൈനലിന്റെ ടിക്കറ്റ് നിരക്ക് 8,680 ഡോളറിൽ നിന്ന് 10,990 ഡോളറായാണ് ഉയർന്നിരിക്കുന്നത്. നേരത്തെ ‘കാറ്റഗറി 1’ ടിക്കറ്റുകൾ വാങ്ങിയ പല ആരാധകരും ഇപ്പോൾ വഞ്ചിക്കപ്പെട്ടതായാണ് കരുതുന്നത്. ഏറ്റവും മികച്ച സീറ്റുകൾ ലഭിക്കുമെന്ന് കരുതിയ അവർക്ക് മുന്നിലാണ് ഫിഫ ഇപ്പോൾ ഉയർന്ന നിരക്കിലുള്ള ‘പ്രീമിയം’ സീറ്റുകൾ അവതരിപ്പിച്ചിരിക്കുന്നത്. സാധാരണക്കാരായ ആരാധകർക്ക് താങ്ങാനാവാത്ത വിധം വില ഉയരുന്നത് ഫുട്ബോളിന്റെ ജനകീയ സ്വഭാവത്തെ ബാധിക്കുമെന്ന് വിമർശനമുയരുന്നു. ചില രാജ്യങ്ങളിലെ ശരാശരി വരുമാനത്തേക്കാൾ കൂടുതലാണ് ഒരു മത്സരത്തിന്റെ ടിക്കറ്റ് വില.

ഇത്രയും വലിയ തുകയായിട്ടും ഫൈനൽ മത്സരത്തിന്റെ ടിക്കറ്റുകൾ ഇതിനോടകം വിറ്റുതീർന്നു എന്നത് ഫുട്ബോൾ പ്രേമികളെ കൂടുതൽ അത്ഭുതപ്പെടുത്തുന്നു. അമേരിക്ക, മെക്‌സിക്കോ, കാനഡ എന്നീ രാജ്യങ്ങൾ സംയുക്തമായി ആതിഥേയത്വം വഹിക്കുന്ന ഈ ടിക്കറ്റ് വിൽപനയിലൂടെ മാത്രം ചരിത്രത്തിലെ ഏറ്റവും ലാഭകരമായ ടിക്കറ്റ് വരുമാനം ഫിഫ ലക്ഷ്യമിടുന്നു.

Summary: FIFA has introduced new “premium” ticket categories for the 2026 World Cup, with prices reaching record highs. The top-tier “Front Category” seats for the final are priced at $10,990, while the US-Paraguay opening match costs $4,105. This move has sparked global controversy, with fans feeling priced out and misled by the new seating segments. Despite the steep costs, final tickets are already sold out, raising concerns that the sport is becoming accessible only to the wealthy and corporate elite.