അമരാവതി: ആന്ധ്രാപ്രദേശിലെ വിശാഖപട്ടണത്ത് പ്രാദേശിക ക്രിക്കറ്റ് ടൂർണമെന്റിനിടെയുണ്ടായ തർക്കത്തെത്തുടർന്ന് യുവ അമ്പയർ കുത്തേറ്റ് മരിച്ചു (Visakhapatnam Cricket Umpire Murder). 21 വയസുകാരനായ ഡോള അജിത് ബാബുവാണ് കൊല്ലപ്പെട്ടത്. റൺ ഔട്ട് തീരുമാനത്തെച്ചൊല്ലിയുണ്ടായ തർക്കമാണ് ദാരുണമായ കൊലപാതകത്തിൽ കലാശിച്ചത്.
ഞായറാഴ്ച പ്രാദേശിക ടീമുകൾ പങ്കെടുത്ത ടൂർണമെന്റിനിടെയാണ് സംഭവം. ഒരു മത്സരത്തിൽ അജിത് ബാബു എടുത്ത റൺ ഔട്ട് തീരുമാനത്തോട് ഒരു ടീമിലെ അംഗങ്ങൾ കടുത്ത വിയോജിപ്പ് പ്രകടിപ്പിച്ചു. ഇത് കളിക്കളത്തിൽ വലിയ വാഗ്വാദങ്ങൾക്കും കൈയാങ്കളിക്കും കാരണമായി. അക്രമത്തിൽ മറ്റ് രണ്ട് പേർക്കും പരിക്കേറ്റിട്ടുണ്ട്.
കളി അവസാനിച്ചതിന് ശേഷം പ്രശ്നം പരിഹരിക്കാനെന്ന വ്യാജേന അജിത് ബാബുവിനെ എതിർസംഘം വിളിച്ചുവരുത്തുകയായിരുന്നു. തുടർന്നുണ്ടായ വാക്കേറ്റത്തിനൊടുവിൽ സംഘം അജിത്തിനെ കത്തി ഉപയോഗിച്ച് നെഞ്ചിൽ കുത്തി വീഴ്ത്തി. ഗുരുതരമായി പരിക്കേറ്റ അജിത് ബാബുവിനെ ഉടൻ തന്നെ അടുത്തുള്ള ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചു. പ്രതികളെ തിരിച്ചറിഞ്ഞതായും ഇവർക്കായി തിരച്ചിൽ ഊർജിതമാക്കിയതായും വിശാഖപട്ടണം പോലീസ് അറിയിച്ചു. കായിക വിനോദത്തിനിടെയുണ്ടായ നിസാര തർക്കം കൊലപാതകത്തിൽ അവസാനിച്ചത് പ്രദേശത്ത് വലിയ ഞെട്ടലുണ്ടാക്കിയിട്ടുണ്ട്.
Story Summary:
A 21-year-old cricket umpire, Dola Ajith Babu, was stabbed to death following a dispute over a run-out decision during a local tournament in Visakhapatnam, Andhra Pradesh. The argument, which started on the field, escalated after the match when the opposing group summoned Ajith under the pretext of resolving the issue and attacked him with a knife. Two others were also injured in the clash. Police have launched a manhunt for the suspects.
