കൊല്ലം: കൊല്ലം കടയ്ക്കലിൽ യുവാവിനെ ഒരു സംഘം വെട്ടിക്കൊന്നു. കടയ്ക്കൽ വയല ശരത് ഭവനിൽ ശരത് (28) ആണ് കൊല്ലപ്പെട്ടത് (Kadakkal Murder Case Kollam). ശനിയാഴ്ച വൈകുന്നേരം കടയ്ക്കലിലെ ഒരു ബാറിലുണ്ടായ തർക്കത്തിന്റെ തുടർച്ചയായാണ് ക്രൂരമായ ഈ കൊലപാതകം നടന്നതെന്ന് പോലീസ് സ്ഥിരീകരിച്ചു. കടയ്ക്കൽ അഞ്ചുമുക്കിലെ ഭാര്യവീട്ടിൽ താമസിച്ചുവരികയായിരുന്നു ശരത്. ശനിയാഴ്ച വൈകുന്നേരം കടയ്ക്കലിലെ ബാറിലെത്തിയ ശരത്തും അവിടെയുണ്ടായിരുന്ന രാഹുൽ എന്ന യുവാവും തമ്മിൽ വാക്കേറ്റമുണ്ടായി. ബാർ ജീവനക്കാർ ഇടപെട്ട് ഇരുവരെയും അവിടെനിന്നും പറഞ്ഞുവിട്ടു.
ബാറിൽ നിന്നിറങ്ങിയ ശരത്തിനെ നാലംഗസംഘം ഓട്ടോറിക്ഷയിൽ പിന്തുടർന്നു. പന്തളംമുക്കിൽ വെച്ച് സംഘം ശരത്തിനെ തടഞ്ഞുനിർത്തുകയും ആയുധങ്ങൾ ഉപയോഗിച്ച് വെട്ടുകയും കുത്തുകയും ചെയ്തു. മാരകമായി വെട്ടേറ്റ ശരത് ജീവൻ രക്ഷിക്കാനായി സമീപത്തെ ഒരു വീട്ടിലേക്ക് ഓടിക്കയറിയെങ്കിലും അക്രമിസംഘം പിന്തുടർന്നെത്തി. വീടിനുള്ളിലിട്ട് ശരീരമാസകലം വെട്ടിയും കുത്തിയും ശരത്തിനെ പരിക്കേൽപ്പിച്ച ശേഷം സംഘം കടന്നുകളഞ്ഞു.
നാട്ടുകാർ ചേർന്ന് ശരത്തിനെ ഉടൻ തന്നെ കടയ്ക്കൽ താലൂക്ക് ആശുപത്രിയിലും തുടർന്ന് തിരുവനന്തപുരം മെഡിക്കൽ കോളേജ് ആശുപത്രിയിലും എത്തിച്ചെങ്കിലും ജീവൻ രക്ഷിക്കാനായില്ല. ആശുപത്രിയിലെത്തിക്കുമ്പോഴേക്കും ശരത്ത് മരണപ്പെട്ടിരുന്നു. നിലവിൽ മൃതദേഹം മെഡിക്കൽ കോളേജ് മോർച്ചറിയിൽ സൂക്ഷിച്ചിരിക്കുകയാണ്. പ്രതികൾക്കായി കടയ്ക്കൽ പോലീസ് അന്വേഷണം ഊർജിതമാക്കിയിട്ടുണ്ട്. കൊലപാതകത്തിൽ നേരിട്ട് പങ്കെടുത്തവരെയും സഹായിച്ചവരെയും കണ്ടെത്താനായി പോലീസ് സിസിടിവി ദൃശ്യങ്ങൾ പരിശോധിച്ചുവരികയാണ്.
Story Summary:
A young man named Sarath was hacked to death in Kadakkal, Kollam, following a dispute at a local bar. The conflict began between Sarath and another youth named Rahul at the bar, and despite staff intervention, a four-member gang followed Sarath in an auto-rickshaw and attacked him with weapons at Panthalammukku. Sarath, who tried to hide in a nearby house, was brutally stabbed and hacked inside the premises. He succumbed to his injuries while being shifted to Thiruvananthapuram Medical College. Police have launched an intensive search for the culprits.
