മുംബൈ: ബോളിവുഡ് താരം സഞ്ജയ് ദത്തിന് പങ്കാളിത്തമുള്ള മുംബൈയിലെ പ്രമുഖ റെസ്റ്റോറന്റ് ബാർ ഇപ്പോൾ വലിയ വിവാദത്തിലായിരിക്കുകയാണ്. കോക്ടെയ്ൽ ഗ്ലാസിൽ അലങ്കാരത്തിനായി ജീവനുള്ള മീനിനെ ഉപയോഗിച്ചതാണ് മൃഗസ്നേഹികളെയും സോഷ്യൽ മീഡിയയെയും ചൊടിപ്പിച്ചത് (Sanjay Dutt Mumbai Restaurant Controversy). മുംബൈയിലെ ‘അൽത്ത സ്റ്റെല്ല’ എന്ന ലക്ഷ്വറി റെസ്റ്റോറന്റിനെതിരെയാണ് മൃഗങ്ങളോടുള്ള ക്രൂരത ആരോപിച്ച് പ്രതിഷേധം ഉയരുന്നത്. നക്ഷത്രസമൂഹങ്ങളെ പ്രമേയമാക്കി അടുത്തിടെയാണ് സഞ്ജയ് ദത്തും സംരംഭകനായ അഭിമന്യു ജാക്കറും ചേർന്ന് ഈ റെസ്റ്റോറന്റ് ആരംഭിച്ചത്. ഇതിന്റെ പ്രത്യേകമായ ഇന്റീരിയറും അവതരണ ശൈലിയും ഇൻഫ്ലുവൻസർമാർക്കിടയിൽ വലിയ ശ്രദ്ധ നേടിയിരുന്നു.
എന്നാൽ, ഒരു കോക്ടെയ്ൽ ഗ്ലാസിനുള്ളിൽ ജീവനുള്ള മീനിനെ ഇട്ടിരിക്കുന്ന വീഡിയോ പുറത്തുവന്നതോടെ കാര്യങ്ങൾ മാറിമറിഞ്ഞു. ഒരു വീഡിയോയിൽ മീൻ അകത്തിരിക്കുമ്പോൾ തന്നെ ഗ്ലാസിന് മുകളിൽ തീ കൊളുത്തുന്നത് കാണാം. ഇത് തികഞ്ഞ ക്രൂരതയാണെന്ന് സോഷ്യൽ മീഡിയ ഉപയോക്താക്കൾ ആരോപിക്കുന്നു.
ഇതൊരു പ്രമേയമല്ല മറിച്ച് ക്രൂരതയാണെന്നും മീനിനെ വെള്ളത്തിൽ നിന്ന് മാറ്റുമ്പോൾ അത് പെട്ടെന്ന് ചാവുകയല്ല പകരം മിനിറ്റുകളോളം ശ്വാസം കിട്ടാതെ പിടയുകയാണെന്നും ഇൻസ്റ്റാഗ്രാമിലെ ഒരു പോസ്റ്റിൽ വിമർശനമുയർന്നു. കസ്റ്റമേഴ്സിനെ ആകർഷിക്കാനുള്ള വില കുറഞ്ഞ വിദ്യയാണിതെന്നും അലങ്കാരത്തിനായി നിസ്സഹായരായ ജീവികളെ പീഡിപ്പിക്കുന്നത് നിർത്തണമെന്നും പലരും അഭിപ്രായപ്പെട്ടു. മൃഗക്ഷേമ പ്രവർത്തകരും ഈ പ്രവണതയ്ക്കെതിരെ രംഗത്തെത്തിയിട്ടുണ്ട്. ലക്ഷ്വറി ഹോട്ടലുകൾ ഇത്തരം കാര്യങ്ങളിൽ ഉത്തരവാദിത്തം കാണിക്കണമെന്നും ക്രിയേറ്റിവിറ്റി എന്ന പേരിൽ ജീവികളെ ഉപദ്രവിക്കുന്നത് അവസാനിപ്പിക്കണമെന്നുമാണ് ഉയരുന്ന ആവശ്യം. സംഭവത്തിൽ റെസ്റ്റോറന്റ് അധികൃതർ ഇതുവരെ ഔദ്യോഗികമായി പ്രതികരിച്ചിട്ടില്ല.
Summary: A popular luxury restro-bar in Mumbai, Alta Stella, co-owned by actor Sanjay Dutt, is facing backlash for serving cocktails with live fish inside the glass as part of its presentation. Viral videos showed the fish inside the drinks, with some clips even showing the glass being set on fire for a flaming effect. Social media users and animal rights activists have condemned the practice as inhumane and an act of animal cruelty, urging the management to stop using live creatures for aesthetic appeal.
