ഇസ്ലാമാബാദ്: പാകിസ്താൻ ഉപപ്രധാനമന്ത്രിയും വിദേശകാര്യ മന്ത്രിയുമായ ഇഷാഖ് ദാർ റെഡ് കാർപെറ്റിൽ കാലിടറി വീഴുന്ന ദൃശ്യങ്ങൾ സോഷ്യൽ മീഡിയയിൽ വൈറലാകുന്നു (Ishaq Dar Red Carpet Fall Video). പശ്ചിമേഷ്യയിലെ സംഘർഷങ്ങൾ ലഘൂകരിക്കുന്നതിനായുള്ള ഉന്നതതല ചർച്ചകൾക്കായി ഇസ്ലാമാബാദിലെത്തിയ ഈജിപ്ഷ്യൻ വിദേശകാര്യ മന്ത്രി ബദർ അബ്ദെലാത്തിയെ സ്വീകരിക്കുന്നതിനിടെയാണ് സംഭവം.
അതിഥിയെ സ്വീകരിക്കാനായി മുന്നോട്ട് നീങ്ങുന്നതിനിടെ പെട്ടെന്ന് നിയന്ത്രണം നഷ്ടപ്പെട്ട ഇഷാഖ് ദാർ റെഡ് കാർപെറ്റിൽ വീഴുകയായിരുന്നു. ഉടൻ തന്നെ സുരക്ഷാ ഉദ്യോഗസ്ഥർ അദ്ദേഹത്തെ താങ്ങി എഴുന്നേൽപ്പിച്ചു. വീഴ്ചയിൽ മന്ത്രിക്ക് പരിക്കുകളൊന്നുമില്ലെന്നും നിശ്ചയിച്ച പ്രകാരം യോഗം നടന്നുവെന്നും അധികൃതർ പിന്നീട് അറിയിച്ചു.
പാകിസ്താൻ, ഈജിപ്ത്, തുർക്കി, സൗദി അറേബ്യ എന്നീ രാജ്യങ്ങളിലെ വിദേശകാര്യ മന്ത്രിമാർ പങ്കെടുത്ത നിർണ്ണായകമായ ചതുർരാഷ്ട്ര യോഗത്തിനിടെയായിരുന്നു ഈ അപ്രതീക്ഷിത സംഭവം. അമേരിക്കയും ഇറാനും തമ്മിലുള്ള യുദ്ധം അവസാനിപ്പിക്കാനായി ഇസ്ലാമാബാദിൽ സമാധാന ചർച്ചകൾക്ക് വേദിയൊരുക്കാൻ പാകിസ്താൻ ശ്രമിക്കുന്നതിനെക്കുറിച്ചും യോഗത്തിൽ ചർച്ച ചെയ്തു. മുസ്ലീം ഉമ്മത്തിന്റെ ഐക്യം ഈ ഘട്ടത്തിൽ അത്യന്താപേക്ഷിതമാണെന്നും യുദ്ധം ആർക്കും ഗുണകരമല്ലെന്നും യോഗത്തിന് ശേഷം ഇഷാഖ് ദാർ പ്രതികരിച്ചു.
نائب وزیراعظم اسحاق ڈار دفتر خارجہ میں مہمان وزرا خارجہ کا استقبال کرتے ہوئے فرش پر گر گئے۔ شکر ہے محفوظ رہے!!! pic.twitter.com/v82rMi3KOp
— Nadir Baloch (@BalochNadir5) March 29, 2026
