അഹമ്മദാബാദ്: പണത്തോടുള്ള ആർത്തിയും കടബാധ്യതയും ഒരു കുടുംബ സുഹൃത്തിനെപ്പോലെ കഴിഞ്ഞിരുന്ന വീട്ടമ്മയുടെ ജീവനെടുത്ത വാർത്തയുടെ ഞെട്ടലിലാണ് പാലൻപുർ (Gujarat Palanpur Murder Case). മാർച്ച് 22 മുതൽ കാണാതായ ശാന്തിബെന്നിന്റെ മൃതദേഹം ആളൊഴിഞ്ഞ കെട്ടിടത്തിന്റെ ബേസ്മെന്റിൽ നിന്നാണ് കണ്ടെത്തിയത്.മുഖ്യപ്രതിയായ രേഖ കഴിഞ്ഞ 15 വർഷമായി ശാന്തിബെന്നിന്റെ വീട്ടിലെ വിശ്വസ്തയായ ജോലിക്കാരിയായിരുന്നു. പിന്നീട് സ്വന്തമായി ഫർണീച്ചർ ബിസിനസ് തുടങ്ങിയപ്പോൾ ശാന്തിബെൻ ഇവരെ അകമഴിഞ്ഞ് സഹായിച്ചു.
ബിസിനസ് ആവശ്യങ്ങൾക്കായി 790 ഗ്രാം സ്വർണ്ണവും രണ്ടുലക്ഷം രൂപയും ശാന്തിബെൻ രേഖയ്ക്ക് കടം നൽകിയിരുന്നു. എന്നാൽ കാലമേറെ കഴിഞ്ഞിട്ടും ഇത് തിരികെ നൽകാൻ രേഖ തയ്യാറായില്ല. പണം തിരികെ ചോദിച്ചു തുടങ്ങിയതോടെയാണ് രേഖയും കുടുംബവും കൊലപാതകം ആസൂത്രണം ചെയ്തത്.
മാർച്ച് 22-ന് പണം നൽകാമെന്ന് പറഞ്ഞ് രേഖ ശാന്തിബെന്നിനെ തന്റെ ഫർണീച്ചർ ഷോപ്പിലേക്ക് വിളിച്ചുവരുത്തി. അവിടെവെച്ച് മയക്കുമരുന്ന് നൽകി ബോധരഹിതയാക്കിയ ശേഷം രേഖയും ഭർത്താവും മറ്റ് രണ്ട് സഹായികളും ചേർന്ന് ബൈക്കിന്റെ കേബിൾ ഉപയോഗിച്ച് കഴുത്തുഞെരിച്ച് കൊലപ്പെടുത്തി.
മരണം ഉറപ്പാക്കിയ ശേഷം മൃതദേഹം ചാക്കിലാക്കി ബൈക്കിൽ കൊണ്ടുപോയി ആളൊഴിഞ്ഞ കെട്ടിടത്തിൽ ഉപേക്ഷിക്കുകയായിരുന്നു.
രേഖയുടെ ഭർത്താവടക്കം ഒളിവിലുള്ള മറ്റ് മൂന്ന് പ്രതികൾക്കായി പോലീസ് ലുക്ക്ഔട്ട് നോട്ടീസ് പുറപ്പെടുവിച്ചിട്ടുണ്ട്. സിസിടിവി ദൃശ്യങ്ങളും ഫോൺ രേഖകളും കേന്ദ്രീകരിച്ച് നടത്തിയ അന്വേഷണമാണ് പ്രതികളിലേക്ക് വേഗത്തിൽ എത്തിച്ചേരാൻ പോലീസിനെ സഹായിച്ചത്.
Short Story Summary:
A former domestic help, Rekha Rathod, and an accomplice were arrested in Palanpur, Gujarat, for the brutal murder of 65-year-old Shantiben Akhediwala. Shantiben had lent Rekha 790 grams of gold and ₹2 lakh for her furniture business. To avoid repayment, Rekha lured Shantiben to her shop on March 22, drugged her, and strangled her using a bike cable with the help of her husband and associates. The body was found stuffed in a sack at an abandoned building. Police are searching for three others, including Rekha’s husband.
