കൊൽക്കത്ത: ഇന്ത്യൻ ക്രിക്കറ്റിലെ എക്കാലത്തെയും മികച്ച ക്യാപ്റ്റൻ ആരാണെന്ന ദീർഘകാലത്തെ ചർച്ചകൾക്ക് വിരാമമിട്ട് മുൻ ക്യാപ്റ്റൻ സൗരവ് ഗാംഗുലി (Sourav Ganguly on MS Dhoni). തന്നെയും എം.എസ്. ധോണിയെയും താരതമ്യം ചെയ്തപ്പോൾ ധോണിയാണ് മികച്ച ക്യാപ്റ്റനെന്ന് ഗാംഗുലി നിസംശയം വ്യക്തമാക്കി. ഒരു സ്വകാര്യ ചാനൽ സംഘടിപ്പിച്ച പരിപാടിയിൽ സംസാരിക്കുകയായിരുന്നു അദ്ദേഹം.
“മഹേന്ദ്ര സിംഗ് ധോണി തന്നെയാണ് മികച്ച ക്യാപ്റ്റൻ. ധോണി ഇന്ത്യയ്ക്ക് ലോകകപ്പ് നേടിത്തന്നു, എന്നാൽ എനിക്ക് റണ്ണറപ്പ് ആകാനേ കഴിഞ്ഞുള്ളൂ. വൈറ്റ് ബോൾ ക്രിക്കറ്റിലെ അസാമാന്യ പ്രതിഭയുള്ള ക്യാപ്റ്റനായിരുന്നു അദ്ദേഹം,” ഗാംഗുലി പറഞ്ഞു. 2003-ൽ ഗാംഗുലിക്ക് കീഴിൽ ഇന്ത്യ ലോകകപ്പ് ഫൈനലിൽ എത്തിയെങ്കിലും കിരീടം നേടാനായിരുന്നില്ല. എന്നാൽ 2011-ൽ ധോണിക്ക് കീഴിൽ ഇന്ത്യ ലോകചാമ്പ്യന്മാരായി.
ജാർഖണ്ഡ് പോലെയുള്ള ചെറിയൊരു സ്ഥലത്തുനിന്ന് വന്ന് ഇത്ര വലിയ ഇതിഹാസമായി മാറിയതിൽ തനിക്ക് അഭിമാനമുണ്ടെന്ന് ഗാംഗുലി കൂട്ടിചേർത്തു. മുംബൈ, ഡൽഹി, ബെംഗളൂരു തുടങ്ങിയ നഗരങ്ങളെപ്പോലെ അത്രയധികം ക്രിക്കറ്റ് താരങ്ങളെ വളർത്തിയെടുക്കാത്ത മേഖലകളിൽ നിന്നാണ് താനും (ബംഗാൾ) ധോണിയും വരുന്നത്. ധോണിയുടെ വളർച്ച ആ പ്രദേശത്തെ യുവാക്കൾക്ക് വലിയ ആത്മവിശ്വാസം നൽകിയെന്നും അദ്ദേഹം നിരീക്ഷിച്ചു. 2004-ൽ ഗാംഗുലി ക്യാപ്റ്റനായിരിക്കുമ്പോഴാണ് ധോണി ഇന്ത്യൻ ടീമിൽ അരങ്ങേറ്റം കുറിക്കുന്നത്.
2007-ലെ ടി20 ലോകകപ്പ്, 2011-ലെ ഏകദിന ലോകകപ്പ്, 2013-ലെ ചാമ്പ്യൻസ് ട്രോഫി എന്നിവ ഇന്ത്യയ്ക്ക് നേടിത്തന്ന ഏക ക്യാപ്റ്റനാണ് ധോണി. തന്റെ പിൻഗാമിയായി വന്ന ധോണിയുടെ ഈ നേട്ടങ്ങളെ ഗാംഗുലി നിറഞ്ഞ മനസ്സോടെയാണ് പ്രശംസിച്ചത്.
