സിനിമയെ വെല്ലുന്ന അതിജീവനത്തിന്റെയും സ്നേഹത്തിന്റെയും കഥയുമായി ഒരുകൂട്ടം വളർത്തുനായ്ക്കൾ ഇന്റർനെറ്റിൽ തരംഗമാകുന്നു (Corgi Leads Dogs Escape). ഇറച്ചി വിപണിയിലേക്കായി കടത്തിക്കൊണ്ടുപോയ ട്രക്കിൽ നിന്ന് സാഹസികമായി രക്ഷപ്പെട്ട ഏഴ് നായ്ക്കൾ, 17 കിലോമീറ്റർ ദൂരം ഒരുമിച്ച് സഞ്ചരിച്ച് തങ്ങളുടെ ഉടമസ്ഥരുടെ അടുത്തേക്ക് തിരിച്ചെത്തി.
ചൈനയിലെ ജിലിനിലാണ് ഈ വിസ്മയിപ്പിക്കുന്ന സംഭവം റിപ്പോർട്ട് ചെയ്തിരിക്കുന്നത്. ഒരേ ഗ്രാമത്തിലെ മൂന്ന് വീടുകളിൽ നിന്നായി മോഷ്ടിക്കപ്പെട്ട ഗോൾഡൻ റിട്രീവർ, ലാബ്രഡോർ, കൊർഗി, ജർമ്മൻ ഷെപ്പേർഡ് ഇനത്തിൽപ്പെട്ട നായ്ക്കളാണ് ട്രക്കിന്റെ കൂട് തകർത്ത് ചാടി രക്ഷപ്പെട്ടത്. ഹൈവേയിലൂടെയും പാടങ്ങളിലൂടെയും രണ്ട് ദിവസം നീണ്ട യാത്രയിൽ ഈ ഏഴ് പേരും പരസ്പരം വേർപിരിയാതെ ഒന്നിച്ചു നീങ്ങിയത് അതിശയിപ്പിക്കുന്ന കാഴ്ചയായിരുന്നു.
Seven dogs stolen from their owners have gone viral after escaping their captors and making their way home
The group is believed to have travelled around 17 km together led by a corgi across highways and fields pic.twitter.com/WylRTMWnwU
— Dexerto (@Dexerto) March 23, 2026
ഈ കൊച്ചു സംഘത്തെ മുന്നിൽ നിന്ന് നയിച്ചത് ബുദ്ധിശക്തിക്ക് പേര് കേട്ട ഒരു കൊർഗി നായയായിരുന്നു. ഇടയ്ക്കിടെ പിന്നിലേക്ക് തിരിഞ്ഞു നോക്കി മറ്റുള്ളവർ കൂടെയുണ്ടെന്ന് ഉറപ്പുവരുത്തിയായിരുന്നു ഇതിന്റെ യാത്ര. സംഘത്തിന്റെ വശങ്ങളിൽ കാവൽക്കാരനെപ്പോലെ ഒരു ഗോൾഡൻ റിട്രീവർ നടന്നപ്പോൾ, കൂട്ടത്തിൽ കാലിന് പരിക്കേറ്റ ഒരു ജർമ്മൻ ഷെപ്പേർഡിന്റെ വേഗതയ്ക്കനുസരിച്ചാണ് മറ്റുള്ളവർ തങ്ങളുടെ നടത്തം ക്രമീകരിച്ചത്. ഹൈവേയിലൂടെ ഈ നായ്ക്കൾ പോകുന്നത് കണ്ട ലു എന്ന വ്യക്തിയാണ് ദൃശ്യങ്ങൾ പകർത്തി സോഷ്യൽ മീഡിയയിൽ പങ്കുവെച്ചത്. വീഡിയോ വൈറലായതോടെ വോളന്റിയർമാരും ഡ്രോണുകളും ഉപയോഗിച്ച് ഇവയെ കണ്ടെത്താൻ ശ്രമം തുടങ്ങി. മാർച്ച് 19-ഓടെ ഏഴ് നായ്ക്കളും തങ്ങളുടെ വീടുകളിൽ സുരക്ഷിതമായി തിരിച്ചെത്തിയെന്ന് അധികൃതർ സ്ഥിരീകരിച്ചു. ചൈനയിലെ ഡൗയിൻ പ്ലാറ്റ്ഫോമിൽ മാത്രം 23 കോടിയിലധികം ആളുകളാണ് ഈ വീഡിയോ കണ്ടത്.
Video pic.twitter.com/bc2znpVqUX
— +233Music (@GHClassicks) March 23, 2026
