ന്യൂഡൽഹി: പശ്ചിമേഷ്യൻ സംഘർഷം അവസാനിപ്പിക്കാൻ അമേരിക്കയുമായി ചർച്ച നടത്തുന്നുവെന്ന വാർത്തകൾ ഇറാൻ നിഷേധിച്ചതോടെ രാജ്യാന്തര വിപണിയിൽ എണ്ണവില വീണ്ടും ഉയർന്നു. സമാധാന ചർച്ചകൾ നടക്കുന്നുണ്ടെന്ന യുഎസ് പ്രസിഡന്റ് ഡൊണാൾഡ് ട്രംപിന്റെ അവകാശവാദത്തെത്തുടർന്ന് 15 ശതമാനത്തോളം ഇടിഞ്ഞ വിലയാണ് ഇപ്പോൾ തിരിച്ചു കയറുന്നത്. (Oil prices surge again after Iran denies Trump’s claim)
സമാധാന ചർച്ചകളെക്കുറിച്ചുള്ള ട്രംപിന്റെ പ്രസ്താവനയ്ക്ക് പിന്നാലെ എണ്ണവില ബാരലിന് 100 ഡോളറിൽ താഴെ എത്തിയിരുന്നു. ഇറാൻ ഈ അവകാശവാദം തള്ളിയതോടെ വില വീണ്ടും വർദ്ധിച്ചു. ഇന്ത്യ പ്രധാനമായും ആശ്രയിക്കുന്ന ബ്രെന്റ് ക്രൂഡിന്റെ വില ഇപ്പോൾ ബാരലിന് 103 ഡോളറിന് മുകളിലാണ്.
മിഡിൽ ഈസ്റ്റിലെ സംഘർഷത്തിന് ശാശ്വത പരിഹാരം കാണാൻ ഇറാനുമായി ഫലപ്രദമായ ചർച്ചകൾ ആരംഭിക്കുമെന്ന് ട്രംപ് നേരത്തെ സൂചിപ്പിച്ചിരുന്നു. ചർച്ചകൾക്ക് മുന്നോടിയായി ഇറാന്റെ ഊർജ്ജ നിലയങ്ങൾക്കും അടിസ്ഥാന സൗകര്യങ്ങൾക്കും നേരെയുള്ള ആക്രമണങ്ങൾ അഞ്ച് ദിവസത്തേക്ക് നിർത്തിവെക്കാൻ ഉത്തരവിട്ടതായും അദ്ദേഹം അവകാശപ്പെട്ടിരുന്നു. എന്നാൽ ഈ വാദങ്ങൾ ഇറാൻ പൂർണ്ണമായും തള്ളിയതാണ് വിപണിയിൽ വീണ്ടും അസ്ഥിരതയുണ്ടാക്കിയത്.
