ചെന്നൈ: തമിഴ്നാട് നിയമസഭാ തെരഞ്ഞെടുപ്പിൽ എൻ ഡി എ സഖ്യമുണ്ടാകുമെന്ന വാർത്തകൾ തള്ളി നടൻ വിജയ്യുടെ പാർട്ടിയായ തമിഴക വെട്രി കഴകം. ബിജെപിയുമായി യാതൊരുവിധ സഖ്യത്തിനും സാധ്യതയില്ലെന്നും അവരാണ് തങ്ങളുടെ പ്രധാന പ്രത്യയശാസ്ത്ര ശത്രുവെന്നും പാർട്ടി ജോയിന്റ് ജനറൽ സെക്രട്ടറി വ്യക്തമാക്കി.(BJP is an ideological enemy, Vijay’s TVK rejects NDA alliance)
പാർട്ടിയുമായി ബന്ധപ്പെട്ട് സോഷ്യൽ മീഡിയയിലും മാധ്യമങ്ങളിലും പ്രചരിക്കുന്ന അടിസ്ഥാനരഹിതമായ കിംവദന്തികൾ പ്രവർത്തകർ വിശ്വസിക്കരുതെന്നും അദ്ദേഹം അഭ്യർത്ഥിച്ചു. ബിജെപി ടിവികെയുടെ രാഷ്ട്രീയ ശത്രുവാണെന്ന് നേരത്തെ തന്നെ വ്യക്തമാക്കിയിട്ടുള്ളതാണ്. അതിനാൽ എൻഡിഎ സഖ്യത്തിലേക്കെന്ന വാർത്തകൾക്ക് അടിസ്ഥാനമില്ല.
ജനങ്ങളുടെ യഥാർത്ഥ പ്രശ്നങ്ങളിൽ നിന്ന് ശ്രദ്ധ തിരിക്കാനാണ് ഇത്തരം ഊഹാപോഹങ്ങൾ പടച്ചുവിടുന്നത്. ഔദ്യോഗിക പ്രഖ്യാപനങ്ങൾ വരുന്നതുവരെ പാർട്ടി അംഗങ്ങൾ ക്ഷമയോടെ കാത്തിരിക്കണമെന്നും കുമാർ പറഞ്ഞു. വിജയ്യുമായി ബന്ധപ്പെട്ട് ബിജെപി കേന്ദ്രങ്ങൾ ചർച്ചകൾക്ക് ശ്രമിക്കുന്നുണ്ടെന്ന റിപ്പോർട്ടുകൾക്കിടയിലാണ് ടിവികെയുടെ ഈ ശക്തമായ പ്രതികരണം വന്നിരിക്കുന്നത്.
