ന്യൂഡൽഹി: ഇറാന്റെ ഉപരോധം നിലനിൽക്കുന്ന ഹോർമൂസ് കടലിടുക്ക് വഴി 54,000 ടണ്ണിലധികം എൽ.പി.ജി ശേഖരവുമായി ഇന്ത്യൻ കപ്പൽ രാജ്യത്തേക്ക് തിരിച്ചു (LPG ship Shivalik India). ഇന്ത്യയും ഇറാനും തമ്മിലുള്ള ഉന്നതതല നയതന്ത്ര ചർച്ചകൾക്ക് പിന്നാലെയാണ് കപ്പലുകൾക്ക് സുരക്ഷിത പാത അനുവദിക്കാൻ ഇറാൻ തയ്യാറായത്.ഇന്ത്യയിലെ ഇറാൻ അംബാസഡർ മുഹമ്മദ് ഫത്താലി ഇന്ത്യയുമായുള്ള സൗഹൃദം ഊന്നിപ്പറയുകയും ഇന്ത്യൻ കപ്പലുകൾക്ക് സുരക്ഷിത പാത ഉറപ്പുനൽകുകയും ചെയ്തു. ഇതിന്റെ ഫലമായാണ് മാസങ്ങളായി തുടരുന്ന പ്രതിസന്ധിക്ക് അയവ് വരുന്നത്.
ഇന്ത്യയുടെ പ്രകൃതിവാതക ഇറക്കുമതിയുടെ വലിയൊരു ഭാഗം കൈകാര്യം ചെയ്യുന്ന ഖത്തർ എനർജി, ഇറാൻ ആക്രമണത്തെത്തുടർന്ന് ഉൽപ്പാദനം നിർത്തിവെച്ചിരിക്കുകയാണ്. ഇത് ഏഷ്യൻ വിപണിയിൽ വലിയ ക്ഷാമത്തിന് കാരണമായിരുന്നു.പ്രതിസന്ധി മറികടക്കാൻ പ്രകൃതിവാതക വിതരണത്തിന് കേന്ദ്ര സർക്കാർ പുതിയ മാർഗ്ഗനിർദ്ദേശങ്ങൾ പുറപ്പെടുവിച്ചു. സിലിണ്ടറുകൾക്കായി പൊതുജനങ്ങൾ പരിഭ്രാന്തരാകേണ്ടതില്ലെന്നും വിതരണം ഉടൻ സാധാരണ നിലയിലാകുമെന്നും അധികൃതർ അറിയിച്ചു.
യു.എസ്-ഇസ്രായേൽ വ്യോമാക്രമണത്തിൽ ഇറാന്റെ മുൻ പരമോന്നത നേതാവ് ആയത്തുള്ള അലി ഖാംനഈ കൊല്ലപ്പെട്ടതോടെയാണ് പശ്ചിമേഷ്യയിൽ സംഘർഷം അതിരൂക്ഷമായത്. ഇതിനെത്തുടർന്ന് ഇറാൻ ഹോർമൂസ് കടലിടുക്ക് അടയ്ക്കുകയും ആഗോള ഊർജ്ജ വിപണി പ്രതിസന്ധിയിലാവുകയും ചെയ്തിരുന്നു.
ശിവാലിക്കിന് പിന്നാലെ രണ്ടാമത്തെ കപ്പലും ഉടൻ ഹോർമൂസ് വഴി ഇന്ത്യയിലേക്ക് പുറപ്പെടുമെന്നാണ് വിവരം. ഈ കപ്പലുകൾ ഇന്ത്യൻ തുറമുഖങ്ങളിൽ എത്തുന്നതോടെ കേരളമുൾപ്പെടെയുള്ള സംസ്ഥാനങ്ങളിലെ പാചകവാതക ക്ഷാമം ഗണ്യമായി കുറയും.
Story Summary: The Indian LPG ship ‘Shivalik’, carrying over 54,000 tonnes of gas, has successfully crossed the Strait of Hormuz following diplomatic talks between India and Iran. Despite the ongoing conflict and Iran’s blockade of the strait, the Iranian ambassador confirmed safe passage for Indian vessels. This move is expected to provide much-needed relief to the severe LPG shortage in India.
