ലോകത്തിലെ ആദ്യത്തെ ആർട്ടിഫിഷ്യൽ ഇന്റലിജൻസ് നടി ടില്ലി നോർവുഡ് തന്റെ ആദ്യ മ്യൂസിക് വീഡിയോ പുറത്തിറക്കി (AI Actress Tilly Norwood). ഓസ്കാർ പുരസ്കാര ചടങ്ങിന് തൊട്ടുമുൻപായി റിലീസ് ചെയ്ത “ടേക്ക് ദി ലീഡ്” എന്ന വീഡിയോയിൽ 18 മനുഷ്യർ അണിയറയിൽ പ്രവർത്തിച്ചിട്ടുണ്ടെങ്കിലും, പ്രേക്ഷകർക്കിടയിൽ നിന്ന് വലിയ വിമർശനമാണ് വീഡിയോ ഏറ്റുവാങ്ങുന്നത്. എഐ സാങ്കേതികവിദ്യ സിനിമയിൽ മനുഷ്യർക്ക് പകരമാകുന്നതിനെക്കുറിച്ചുള്ള ചർച്ചകൾക്കിടയിലാണ് ഈ റിലീസ്.
ഒരു പോപ്പ് ഗാനത്തിന്റെ ശൈലിയിൽ ചിത്രീകരിച്ചിരിക്കുന്ന വീഡിയോയിൽ ടില്ലി നോർവുഡ് സ്റ്റേഡിയങ്ങളിൽ പാടുന്നതായും ടോക്ക് ഷോകളിൽ പ്രത്യക്ഷപ്പെടുന്നതായും കാണാം. പിങ്ക് ഡോൾഫിനുകൾക്കൊപ്പം പറക്കുന്നതും ഇൻഫ്ലേറ്റബിൾ ഫ്ലമിംഗോയിൽ സഞ്ചരിക്കുന്നതുമെല്ലാം വീഡിയോയിലെ വിചിത്രമായ കാഴ്ചകളാണ്. എഐ നിർമ്മിതമായ ഒന്നാണെങ്കിലും അതിൽ “മനുഷ്യസ്പർശം” ഉണ്ടെന്ന് വരുത്തിത്തീർക്കാനാണ് വരികളിലൂടെ ശ്രമിക്കുന്നത്. എന്നാൽ, ഈ ശ്രമം തികച്ചും പരാജയപ്പെട്ടുവെന്നാണ് സോഷ്യൽ മീഡിയയുടെ വിലയിരുത്തൽ. വീഡിയോയ്ക്ക് ഇതുവരെ 23,000 വ്യൂസ് മാത്രമേ ലഭിച്ചിട്ടുള്ളൂ. “മനുഷ്യന്റെ സർഗ്ഗാത്മകത ഇതിൽ എവിടെയും കാണാനില്ല”, “തികച്ചും വിരസമായ സൃഷ്ടി” എന്നിങ്ങനെയാണ് ഇൻസ്റ്റാഗ്രാമിലെ കമന്റുകൾ. കോസ്റ്റ്യൂം ഡിസൈനർമാർ, പ്രൊഡക്ഷൻ സ്റ്റാഫ് തുടങ്ങി 18 മനുഷ്യർ ഈ എഐ നടിയുടെ വീഡിയോയ്ക്ക് പിന്നിൽ പ്രവർത്തിച്ചിട്ടുണ്ടെന്ന് ഡിസ്ക്ലൈമറിൽ പറയുന്നു.
നടിയും സാങ്കേതിക വിദഗ്ദ്ധയുമായ എലൈൻ വാൻ ഡെർ വെൽഡൻ ആണ് ടില്ലി നോർവുഡിനെ ലോകത്തിന് മുന്നിൽ അവതരിപ്പിച്ചത്. സ്കാർലറ്റ് ജോഹാൻസണെയോ നതാലി പോർട്ട്മാനെയോ പോലുള്ള ഒരു വലിയ താരമായി ടില്ലിയെ വളർത്താനാണ് താൻ ആഗ്രഹിക്കുന്നതെന്ന് എലൈൻ മുൻപ് പറഞ്ഞിരുന്നു. എഐ മനുഷ്യരെ മാറ്റിസ്ഥാപിക്കാനല്ല, മറിച്ച് പുതിയൊരു സർഗ്ഗാത്മക ഉപകരണമായി ഉപയോഗിക്കാനാണെന്നാണ് ഇവരുടെ പക്ഷം. എന്നാൽ ഹോളിവുഡിലെ നിരവധി താരങ്ങൾ ഈ നീക്കത്തിനെതിരെ പ്രതിഷേധവുമായി രംഗത്തെത്തിയിട്ടുണ്ട്.
View this post on Instagram
