ഹൈദരാബാദ്: രാജ്യത്ത് ഡിജിറ്റൽ അറസ്റ്റ് തട്ടിപ്പുകൾ വർദ്ധിച്ചുവരുന്നതിനിടെ ഹൈദരാബാദിൽ വിരമിച്ച ജില്ലാ ജഡ്ജിക്ക് ഒരു കോടിയിലധികം രൂപ നഷ്ടമായി. സ്ത്രീകടത്ത് ഉൾപ്പെടെയുള്ള നിയമവിരുദ്ധ പ്രവർത്തനങ്ങളിൽ ജഡ്ജിയുടെ മൊബൈൽ നമ്പർ ഉൾപ്പെട്ടിട്ടുണ്ടെന്ന് ഭീഷണിപ്പെടുത്തിയാണ് സൈബർ തട്ടിപ്പുകാർ പണം തട്ടിയത് (Digital Arrest Scam Hyderabad). ഹൈദരാബാദിലെ മൽക്കാജ്ഗിരി സ്വദേശിയായ 69-കാരനാണ് തട്ടിപ്പിനിരയായതെന്ന് പോലീസ് തിങ്കളാഴ്ച അറിയിച്ചു.
ഏകദേശം ഒരാഴ്ച മുമ്പാണ് തട്ടിപ്പുകാർ വിരമിച്ച ജഡ്ജിയെ ഫോണിൽ ബന്ധപ്പെട്ടത്. അന്വേഷണ ഉദ്യോഗസ്ഥരെന്ന വ്യാജേന സംസാരിച്ച ഇവർ, ഗുരുതരമായ കുറ്റകൃത്യങ്ങളിൽ പങ്കുണ്ടെന്ന് വിശ്വസിപ്പിച്ച് അദ്ദേഹത്തെ ഭയപ്പെടുത്തുകയായിരുന്നു. തുടർന്ന് കേസിൽ നിന്ന് ഒഴിവാക്കാമെന്ന് വാഗ്ദാനം നൽകി ഒരു കോടിയിലധികം രൂപ വിവിധ അക്കൗണ്ടുകളിലേക്ക് ട്രാൻസ്ഫർ ചെയ്യിപ്പിച്ചു. പണം നൽകിയ ശേഷമാണ് താൻ വഞ്ചിക്കപ്പെട്ടുവെന്ന് അദ്ദേഹം തിരിച്ചറിഞ്ഞത്. മൂന്ന് ദിവസം മുമ്പ് നൽകിയ പരാതിയുടെ അടിസ്ഥാനത്തിൽ പോലീസ് അന്വേഷണം ആരംഭിച്ചിട്ടുണ്ട്.
നിയമവശങ്ങൾ നന്നായി അറിയാവുന്ന ഒരു മുൻ ജഡ്ജി പോലും എങ്ങനെ ഇത്തരമൊരു കെണിയിൽ വീണു എന്ന ചോദ്യത്തിന്, തട്ടിപ്പുകാരുടെ ഭീഷണിയും സമ്മർദ്ദവും ആരെയും ഭയപ്പെടുത്തുന്ന രീതിയിലാണെന്ന് പോലീസ് മറുപടി നൽകി. ഔദ്യോഗിക വേഷം ധരിച്ചും പോലീസ് സ്റ്റേഷൻ പശ്ചാത്തലമാക്കിയും വീഡിയോ കോളിലൂടെയാണ് പലപ്പോഴും ഇത്തരം ‘ഡിജിറ്റൽ അറസ്റ്റുകൾ’ നടക്കുന്നത്. നിയമവിരുദ്ധ പ്രവർത്തനങ്ങളിൽ കുടുങ്ങുമെന്ന് ഭയപ്പെടുത്തി ഇരകളെ മാനസികമായി തളർത്തി പണം തട്ടുന്നതാണ് ഇവരുടെ രീതി.
Summary: A 69-year-old retired district judge in Hyderabad fell victim to a “digital arrest” scam, losing over Rs 1 crore. Fraudsters impersonating law enforcement officials threatened him, claiming his phone number was linked to human trafficking.
