മുംബൈ: രാജ്യത്തെ ഏറ്റവും ചിലവേറിയ നഗരമെന്ന പേര് മുംബൈ ഒരിക്കൽ കൂടി ശരിവെക്കുന്നു. മുംബൈയിലെ പരേലിൽ 700 ചതുരശ്ര അടി മാത്രമുള്ള രണ്ട് ബെഡ്റൂം (2 BHK) ഫ്ലാറ്റിന് മാസം ഒരു ലക്ഷം രൂപ വാടക നൽകുന്ന സോഫ്റ്റ്വെയർ എഞ്ചിനീയർമാരുടെ വീഡിയോയാണ് ഇപ്പോൾ സോഷ്യൽ മീഡിയയിൽ ചർച്ചയാകുന്നത് (Mumbai High Rent Debate Parel). ഇൻഫ്ലുവൻസർ ആര്യ കോത്താരി ഇൻസ്റ്റാഗ്രാമിൽ പങ്കുവെച്ച വീഡിയോയിലൂടെയാണ് ഈ ഫ്ലാറ്റ് വിശേഷങ്ങൾ പുറത്തുവന്നത്.
പരേൽ പോലുള്ള പ്രധാന ബിസിനസ് കേന്ദ്രങ്ങൾക്ക് അടുത്തുള്ള പ്രൈം ഏരിയയായതിനാലാണ് ഇത്രയും ഉയർന്ന വാടക നൽകേണ്ടി വരുന്നത്. പ്രതിമാസ മെയിന്റനൻസ് ഫീസും ഈ ഒരു ലക്ഷം രൂപയിൽ ഉൾപ്പെടുന്നുണ്ടെന്ന് താമസക്കാർ വീഡിയോയിൽ വ്യക്തമാക്കുന്നു. ഫ്ലാറ്റിലിരുന്നാൽ ദൂരെയുള്ള വിമാനത്താവളത്തിൽ വിമാനങ്ങൾ ഇറങ്ങുന്നതും പൊങ്ങുന്നതും കാണാം എന്നതാണ് ഈ വീടിന്റെ തങ്ങൾക്ക് ഏറ്റവും പ്രിയപ്പെട്ട കാര്യമെന്ന് ഇവർ പറയുന്നു. ഏകദേശം 23 വയസ്സുള്ള തങ്ങൾക്ക് ദക്ഷിണ മുംബൈയിൽ താമസിക്കാൻ ഇതിലും നല്ലൊരു ഇടം കിട്ടാനില്ലെന്നാണ് ഇവരുടെ പക്ഷം.
View this post on Instagram
മുംബൈയിലെ യാത്രാദൂരത്തെക്കുറിച്ചും ഇവർ രസകരമായി സംസാരിക്കുന്നുണ്ട്. ബന്ദ്രയിലോ മറ്റോ താമസിക്കുന്ന സുഹൃത്തുക്കളുമായി ബന്ധം നിലനിർത്തുക എന്നത് മുംബൈയിലെ ട്രാഫിക് കാരണം വലിയ വെല്ലുവിളിയാണെന്ന് ഇവർ തമാശരൂപേണ പറയുന്നു. എന്നാൽ വീഡിയോ പുറത്തുവന്നതോടെ വാടകയുടെ കാര്യത്തിൽ സോഷ്യൽ മീഡിയയിൽ വലിയ വാദപ്രതിവാദങ്ങളാണ് നടക്കുന്നത്.
കൊൽക്കത്ത പോലുള്ള നഗരങ്ങളിൽ ഇതേ സൗകര്യമുള്ള വീടിന് 13,000 രൂപ മാത്രമേ വരൂ എന്ന് ചിലർ കമന്റ് ചെയ്തപ്പോൾ, ഫ്ലാറ്റിലെ വാർഡ്രോബുകൾക്ക് വലിപ്പം കുറവാണെന്നായിരുന്നു മറ്റ് ചിലരുടെ കണ്ടെത്തൽ. മുംബൈയിലെ താമസസൗകര്യങ്ങൾ സാധാരണക്കാർക്ക് അപ്രാപ്യമായി മാറുന്നതിന്റെ തെളിവാണ് ഇത്തരം ഉയർന്ന വാടക നിരക്കുകളെന്ന് ഭൂരിഭാഗം പേരും അഭിപ്രായപ്പെട്ടു.
