ബാകു: പശ്ചിമേഷ്യയിൽ ആരംഭിച്ച് അതിവേഗം പടരുന്ന ഇറാൻ-ഇസ്രായേൽ യുദ്ധത്തിന്റെ അലയൊലികൾ അയൽരാജ്യമായ അസർബൈജാനിലേക്കും ( Iran Missile Attack Azerbaijan). അസർബൈജാന്റെ അധീനതയിലുള്ള നഖ്ചിവൻ മേഖലയിലെ അന്താരാഷ്ട്ര വിമാനത്താവളത്തിന് നേരെ വ്യാഴാഴ്ച ഇറാനിൽ നിന്ന് മിസൈൽ, ഡ്രോൺ ആക്രമണമുണ്ടായി. ഇറാൻ അതിർത്തിയിൽ നിന്ന് കേവലം 10 കിലോമീറ്റർ മാത്രം അകലെയുള്ള വിമാനത്താവളത്തിനാണ് നാശനഷ്ടങ്ങൾ സംഭവിച്ചത്.
ആക്രമണത്തെത്തുടർന്ന് വിമാനത്താവളത്തിന് സമീപം വൻ തീപിടുത്തമുണ്ടായി. സംഭവത്തിൽ രണ്ട് സിവിൽ പൗരന്മാർക്ക് പരിക്കേറ്റതായും ഔദ്യോഗിക റിപ്പോർട്ടുകളുണ്ട്. ഇറാൻ അതിർത്തിയിൽ നിന്ന് വിക്ഷേപിച്ച ഡ്രോണുകളിൽ ഒന്ന് വിമാനത്താവളത്തിന് സമീപവും മറ്റൊന്ന് ഒരു സ്കൂളിന് സമീപവുമാണ് പതിച്ചതെന്ന് അസർബൈജാൻ വിദേശകാര്യ മന്ത്രാലയം സ്ഥിരീകരിച്ചു. വിമാനത്താവളത്തിന് സമീപം കറുത്ത പുക ഉയരുന്ന ദൃശ്യങ്ങൾ ഇതിനോടകം പുറത്തുവന്നിട്ടുണ്ട്.
സംഭവത്തിൽ ഇറാനോട് അടിയന്തര വിശദീകരണം തേടിയ അസർബൈജാൻ, ആക്രമണത്തിനെതിരെ ശക്തമായി പ്രതികരിക്കാൻ തങ്ങൾക്ക് അവകാശമുണ്ടെന്ന് മുന്നറിയിപ്പ് നൽകി. കഴിഞ്ഞ ഏതാനും ദിവസങ്ങളായി പശ്ചിമേഷ്യയിൽ നടക്കുന്ന യുഎസ്-ഇസ്രായേൽ വ്യോമാക്രമണങ്ങൾക്കിടെ ഇറാൻ നടത്തുന്ന ഇത്തരം നീക്കങ്ങൾ മേഖലയിലെ സംഘർഷം കൂടുതൽ രാജ്യങ്ങളിലേക്ക് വ്യാപിക്കുന്നതിന്റെ തെളിവാണ്. തുർക്കിയെ ലക്ഷ്യം വെച്ച് ഇറാൻ അയച്ച മിസൈൽ കഴിഞ്ഞ ദിവസം നാറ്റോ വെടിവെച്ചിട്ടിരുന്നു.
Summary: Tensions in the Middle East have spilled over into the Caucasus as missiles and drones launched from Iran struck the Nakhchivan International Airport in Azerbaijan on Thursday.
