ഇറാന്റെ നതാൻസ് ആണവനിലയത്തിന് നേരെ വീണ്ടും ആക്രമണം; പ്രവേശന കവാടത്തിന് കേടുപാടുകൾ സംഭവിച്ചു, ആണവ വികിരണ ഭീഷണി നിലവിലില്ലെന്ന് IAEA | IAEA Natanz Nuclear Facility Damage

ടെഹ്‌റാൻ: ഇറാന്റെ ഭൂഗർഭ ആണവനിലയമായ നതാൻസ് ഫ്യൂവൽ എൻറിച്ച്‌മെന്റ് പ്ലാന്റിന്റെ പ്രവേശന കവാടത്തിലെ കെട്ടിടങ്ങൾക്ക് കേടുപാടുകൾ സംഭവിച്ചതായി അന്താരാഷ്ട്ര ആണവോർജ്ജ ഏജൻസി അറിയിച്ചു ( IAEA Natanz Nuclear Facility Damage). ഏറ്റവും പുതിയ സാറ്റലൈറ്റ് ചിത്രങ്ങൾ പരിശോധിച്ച ശേഷമാണ് ഏജൻസി ഇക്കാര്യം വ്യക്തമാക്കിയത്. കഴിഞ്ഞ വർഷം ജൂണിൽ ഇസ്രായേലും അമേരിക്കയും നടത്തിയ 12 ദിവസത്തെ യുദ്ധത്തിനിടയിൽ ഈ പ്ലാന്റിന് വലിയ രീതിയിലുള്ള നാശനഷ്ടങ്ങൾ സംഭവിച്ചിരുന്നു. ആ ആക്രമണ പരമ്പരയുടെ തുടർച്ചയായാണ് ഇപ്പോഴത്തെ നീക്കങ്ങളും വിലയിരുത്തപ്പെടുന്നത്.

Based on the latest available satellite imagery, IAEA can now confirm some recent damage to entrance buildings of Iran’s underground Natanz Fuel Enrichment Plant (FEP). No radiological consequence expected and no additional impact detected at FEP itself, which was severely… pic.twitter.com/7CS7BRZo1s

— IAEA – International Atomic Energy Agency ⚛️ (@iaeaorg) March 3, 2026

നിലവിലെ ആക്രമണത്തിൽ ആണവ വികിരണ ഭീഷണി നിലവിലില്ലെന്ന് IAEA വ്യക്തമാക്കി. പ്രവേശന കവാടത്തിലെ കെട്ടിടങ്ങളെയാണ് ആക്രമണം ബാധിച്ചതെങ്കിലും, ഭൂഗർഭത്തിലുള്ള പ്രധാന പ്ലാന്റിന് കൂടുതൽ നാശനഷ്ടങ്ങൾ ഉണ്ടായതായി ഇതുവരെ കണ്ടെത്തിയിട്ടില്ല. കഴിഞ്ഞ വർഷം നടന്ന യുദ്ധത്തിൽ നതാൻസ് ഉൾപ്പെടെ മൂന്ന് പ്രധാന ആണവ കേന്ദ്രങ്ങളെയാണ് അമേരിക്കയും ഇസ്രായേലും ലക്ഷ്യം വെച്ചിരുന്നത്. ഇറാന്റെ ആണവ ശേഷി തകർക്കുക എന്ന ലക്ഷ്യത്തോടെയുള്ള സൈനിക നീക്കങ്ങൾ ഇപ്പോഴും തുടരുകയാണ്.

ഇറാൻ പരമോന്നത നേതാവ് വധിക്കപ്പെട്ടതിന് പിന്നാലെ രാജ്യത്തിന്റെ വിവിധ ഭാഗങ്ങളിൽ ഇസ്രായേൽ വ്യോമാക്രമണം ശക്തമാക്കിയിട്ടുണ്ട്. മീനാബിലെ സ്കൂളിന് നേരെയും ഹമദാനിലെ ജനവാസ മേഖലകൾക്ക് നേരെയും നടന്ന ആക്രമണങ്ങൾക്ക് പിന്നാലെ അതീവ സുരക്ഷയുള്ള ആണവനിലയങ്ങൾക്ക് നേരെയും നീക്കങ്ങൾ ഉണ്ടാകുന്നത് യുദ്ധത്തിന്റെ വ്യാപ്തി വർദ്ധിപ്പിക്കുന്നു. ഇറാന്റെ വ്യോമപ്രതിരോധ സംവിധാനങ്ങളെ തകർക്കാൻ ഇസ്രായേൽ വ്യോമസേന നടത്തുന്ന ഓപ്പറേഷന്റെ ഭാഗമായാണ് ഈ നീക്കമെന്നാണ് കരുതപ്പെടുന്നത്.