തായ്പേയ്: ഇറാനിലെ ജനങ്ങൾ സ്വാതന്ത്ര്യത്തിനും ജനാധിപത്യത്തിനും വേണ്ടി നടത്തുന്ന പോരാട്ടങ്ങളെ പിന്തുണയ്ക്കുന്നതായി തായ്വാൻ വിദേശകാര്യ മന്ത്രാലയം ചൊവ്വാഴ്ച അറിയിച്ചു (US Israel Iran Strike Taiwan Backing). അമേരിക്കയും ഇസ്രായേലും ഇറാനിൽ നടത്തുന്ന സൈനിക നീക്കങ്ങൾക്ക് പരോക്ഷ പിന്തുണ നൽകിക്കൊണ്ടാണ് തായ്വാന്റെ ഈ പ്രസ്താവന. ഇറാൻ ജനതയ്ക്ക് ഉടൻ തന്നെ മനുഷ്യാവകാശങ്ങളും ജനാധിപത്യവും ആസ്വദിക്കാൻ കഴിയുമെന്ന് പ്രതീക്ഷിക്കുന്നതായി വിദേശകാര്യ മന്ത്രാലയ വക്താവ് സിയാവോ കുവാങ്-വെയ് പറഞ്ഞു.
തായ്വാൻ നേരിടുന്ന ചൈനീസ് ഭീഷണിയും ഇസ്രായേൽ നേരിടുന്ന സുരക്ഷാ വെല്ലുവിളികളും സമാനമാണെന്ന് തായ്വാൻ പ്രസിഡന്റ് ലായ് ചിംഗ്-ടെ നേരത്തെ നിരീക്ഷിച്ചിരുന്നു. ഇതിന്റെ അടിസ്ഥാനത്തിൽ ഇസ്രായേലിനെ തങ്ങളുടെ പ്രധാന ജനാധിപത്യ പങ്കാളിയായാണ് തായ്വാൻ കാണുന്നത്. ഖത്തർ, യുഎഇ ഉൾപ്പെടെയുള്ള ഗൾഫ് രാജ്യങ്ങൾക്ക് നേരെ ഇറാൻ നടത്തിയ ഡ്രോൺ-മിസൈൽ ആക്രമണങ്ങളെ തായ്വാൻ ശക്തമായി അപലപിച്ചു. ഭീകരവാദത്തെ ഇല്ലാതാക്കാനാണ് അമേരിക്കയും ഇസ്രായേലും ശ്രമിക്കുന്നതെന്ന് തായ്വാൻ ഡെപ്യൂട്ടി ഫോറിൻ മിനിസ്റ്റർ ഫ്രാൻസ്വ വു പാർലമെന്റിൽ വ്യക്തമാക്കി.
ഇറാൻ- ഇസ്രായേൽ യുദ്ധത്തിൽ തായ്വാൻ പോലെയുള്ള രാജ്യങ്ങൾ പരസ്യമായി രംഗത്തെത്തുന്നത് ആഗോള രാഷ്ട്രീയത്തിൽ വലിയ മാറ്റങ്ങൾക്ക് കാരണമാകും. ഇറാൻ പരമോന്നത നേതാവ് ഖമേനിയുടെ വധത്തിന് പിന്നാലെ ടെഹ്റാനിലെ തന്ത്രപ്രധാന കേന്ദ്രങ്ങളിൽ ആക്രമണം തുടരുകയാണ്.
ഇറാനുമായി തായ്വാന് ഔദ്യോഗിക നയതന്ത്ര ബന്ധമില്ലെങ്കിലും, അമേരിക്കയാണ് തായ്വാന്റെ ഏറ്റവും വലിയ അന്താരാഷ്ട്ര പിന്തുണക്കാരും ആയുധ വിതരണക്കാരും. ഇറാൻ-ഇസ്രായേൽ സംഘർഷം കാരണം ഇന്ത്യൻ ഓഹരി വിപണിയിൽ നിന്ന് നിക്ഷേപകർക്ക് 7.8 ലക്ഷം കോടി രൂപയുടെ നഷ്ടമുണ്ടായതും എണ്ണവില കുതിച്ചുയരുന്നതും സാധാരണക്കാരുടെ ജീവിതത്തെ ബാധിച്ചു തുടങ്ങിയിട്ടുണ്ട്. യുദ്ധം വരും ആഴ്ചകളിലും തുടരുമെന്ന അമേരിക്കൻ പ്രസിഡന്റ് ഡൊണാൾഡ് ട്രംപിന്റെ പ്രസ്താവന പ്രവാസികളുടെ സുരക്ഷയിൽ വലിയ ചോദ്യചിഹ്നമായി മാറുന്നു.
