തിരുവനന്തപുരം: നിയമസഭാ തിരഞ്ഞെടുപ്പിൽ യുഡിഎഫ് 81 മുതൽ 86 സീറ്റുകൾ വരെ നേടി അധികാരം തിരിച്ചുപിടിക്കുമെന്ന് ലോക്പോൾ സർവേ (Lokpoll Pre-poll Survey Kerala 20260. ഭരണകക്ഷിയായ എൽഡിഎഫിന് 51 മുതൽ 59 സീറ്റുകൾ വരെ മാത്രമേ ലഭിക്കൂ എന്നാണ് പ്രവചനം. എൻഡിഎയ്ക്ക് പരമാവധി രണ്ട് സീറ്റുകൾ വരെ ലഭിക്കാമെന്നും സർവേ വ്യക്തമാക്കുന്നു. ഫെബ്രുവരി 9 മുതൽ 24 വരെ 42,000 പേരിൽ നിന്ന് ശേഖരിച്ച വിവരങ്ങളുടെ അടിസ്ഥാനത്തിലാണ് ഈ റിപ്പോർട്ട്.
സർവേയിലെ പ്രധാന കണ്ടെത്തലുകൾ
യുഡിഎഫിന് 43-45 ശതമാനവും എൽഡിഎഫിന് 39-41 ശതമാനവും വോട്ട് ലഭിക്കുമെന്ന് സർവേ പറയുന്നു. ബിജെപിയുടെ വോട്ട് വിഹിതം 13-15 ശതമാനമായിരിക്കും. ശബരിമല സ്വർണ്ണക്കൊള്ളയുമായി ബന്ധപ്പെട്ട അഴിമതി ആരോപണങ്ങളും സർക്കാരിന്റെ വിശ്വാസ്യത തകർത്ത ക്രമക്കേടുകളും എൽഡിഎഫിന് വിനയാകും. ക്ഷേമപദ്ധതികളെക്കാൾ അഴിമതി ആരോപണങ്ങൾ വോട്ടർമാരെ സ്വാധീനിക്കുന്നു.
മുസ്ലീം, ക്രിസ്ത്യൻ വോട്ടുകൾ കൂട്ടത്തോടെ യുഡിഎഫിലേക്ക് മാറാൻ സാധ്യതയുണ്ട്. കൂടാതെ കേരള കോൺഗ്രസ് (എം)-ലെ ആഭ്യന്തര പ്രശ്നങ്ങളും യുഡിഎഫിന് ഗുണകരമാകും.
മേഖലാടിസ്ഥാനത്തിലുള്ള പ്രവചനം
| മേഖല | എൽഡിഎഫ് (സീറ്റുകൾ) | യുഡിഎഫ് (സീറ്റുകൾ) | എൻഡിഎ (സീറ്റുകൾ) |
| വടക്കൻ കേരളം | 11 – 16 | 32 – 37 | 0 |
| മധ്യ കേരളം | 18 – 23 | 30 – 35 | 0 |
| തെക്കൻ കേരളം | 19 – 23 | 13 – 17 | 0 – 2 |
തിരിച്ചടിയാകുന്ന ഘടകങ്ങൾ
തെക്കൻ കേരളത്തിലെ പരമ്പരാഗത വോട്ടുബാങ്കുകളായ നെൽക്കർഷകർ, കശുവണ്ടി തൊഴിലാളികൾ, സർക്കാർ ജീവനക്കാർ എന്നിവർക്കിടയിലുള്ള അതൃപ്തി എൽഡിഎഫിന് വലിയ ആഘാതമേൽപ്പിക്കും. അതേസമയം, ബിജെപിക്ക് തിരുവനന്തപുരത്തെ ചില പോക്കറ്റുകളിൽ മാത്രമാണ് മുന്നേറ്റം പ്രവചിക്കുന്നത്. ദുർബലമായ പ്രാദേശിക നേതൃത്വം പാർട്ടിയുടെ വളർച്ചയ്ക്ക് തടസ്സമാണെന്നും ലോക്പോൾ വിലയിരുത്തുന്നു.
Story Summary: According to the Lokpoll pre-poll survey, UDF is expected to win 81-86 seats and reclaim power in the Kerala Assembly elections. LDF is projected to win 51-59 seats, while NDA might secure 0-2 seats. The survey, conducted among 42,000 people, cites anti-incumbency, corruption allegations, and a shift in minority votes as key factors favoring UDF.
