തിരുവനന്തപുരം: നഗരൂരിൽ പോലീസ് വാഹനത്തിന് നേരെ അതിക്രമം കാണിക്കുകയും ഉദ്യോഗസ്ഥരെ അസഭ്യം പറയുകയും ചെയ്ത സംഭവത്തിൽ ഒമ്പത് സി.പി.എം – ഡി.വൈ.എഫ്.ഐ പ്രവർത്തകർക്കെതിരെ പോലീസ് കേസെടുത്തു (Nagaroor Police Block Case). ഡി.വൈ.എഫ്.ഐ പ്രവർത്തകരായ രതീഷ്, വിഷ്ണു എന്നിവരെ ആറ്റിങ്ങൽ ഡിവൈ.എസ്.പിയുടെ സ്ക്വാഡ് ഇതിനോടകം അറസ്റ്റ് ചെയ്തിട്ടുണ്ട്.
പ്രദേശത്തെ കോൺഗ്രസിന്റെ ‘പുതുയുഗ യാത്ര’യുടെ ഫ്ലക്സ് ബോർഡുകൾ നശിപ്പിച്ച സംഭവത്തിൽ പോലീസ് കേസെടുത്തിരുന്നു. ഈ കേസിലെ പ്രതികൾക്ക് സ്റ്റേഷനിൽ ഹാജരാകാൻ നോട്ടീസ് നൽകി മടങ്ങുമ്പോഴാണ് നഗരൂർ ജംഗ്ഷന് സമീപം വെച്ച് പ്രവർത്തകർ പോലീസിനെ തടഞ്ഞത്.
ഔദ്യോഗിക കൃത്യനിർവ്വഹണം തടസ്സപ്പെടുത്തൽ, പോലീസ് ജീപ്പ് തടയൽ, ഉദ്യോഗസ്ഥരെ ഭീഷണിപ്പെടുത്തൽ തുടങ്ങിയ കുറ്റങ്ങൾ ചുമത്തിയാണ് കേസ്. പിടിയിലായ രണ്ട് പേർക്ക് പുറമെ മറ്റ് ഏഴ് പേർക്കായി പോലീസ് തിരച്ചിൽ ഊർജിതമാക്കിയിട്ടുണ്ട്.ആറ്റിങ്ങൽ ഡി.വൈ.എസ്.പിയുടെ നേതൃത്വത്തിലുള്ള പ്രത്യേക സംഘമാണ് കേസ് അന്വേഷിക്കുന്നത്. സംഭവത്തിന്റെ വീഡിയോ ദൃശ്യങ്ങൾ പരിശോധിച്ചാണ് മറ്റ് പ്രതികളെ തിരിച്ചറിയുന്നത്.
മന്ത്രി വീണാ ജോർജിന് നേരെയുണ്ടായ പ്രതിഷേധത്തിന് പിന്നാലെ ജില്ലയിൽ രാഷ്ട്രീയ സംഘർഷം നിലനിൽക്കുന്ന സാഹചര്യത്തിൽ ഇത്തരം നിയമലംഘനങ്ങളെ ഗൗരവത്തോടെ കാണാനാണ് പോലീസ് തീരുമാനം.
Story Summary: Two DYFI activists, Ratheesh and Vishnu, were arrested for blocking and threatening police officers at Nagaroor, Trivandrum. The incident occurred while police were returning after serving a notice regarding the destruction of Congress party’s ‘Puthuyuga Yathra’ flex boards. Cases have been registered against nine persons under non-bailable sections for obstructing official duty.
