റാഞ്ചി: ജാർഖണ്ഡിലെ ഗർവ ജില്ലയിൽ എട്ടുമാസം ഗർഭിണിയായ കാമുകിയെ കൊലപ്പെടുത്താൻ ശ്രമിച്ച യുവാവ് പിടിയിൽ (Jharkhand Golgappa Poisoning Attempt). സാകേത് കേഷരി (25) എന്ന യുവാവാണ് തന്റെ 23 വയസ്സുകാരിയായ കാമുകിയെ ക്രൂരമായി കൊലപ്പെടുത്താൻ ശ്രമിച്ചത്. ഭക്ഷണത്തിൽ വിഷം നൽകിയും കാട്ടിലെത്തിച്ച് ശ്വാസം മുട്ടിച്ചുമാണ് ഇയാൾ കൊലപാതകത്തിന് പദ്ധതിയിട്ടത്.
കഴിഞ്ഞ ആഴ്ചയാണ് സംഭവം നടന്നത്. ഗൊൽഗപ്പ കഴിക്കാൻ ആഗ്രഹം പ്രകടിപ്പിച്ച യുവതിക്ക് സാകേത് ഭക്ഷണം വാങ്ങി നൽകി. എന്നാൽ ഇതിൽ രഹസ്യമായി ഇയാൾ വിഷം കലർത്തിയിരുന്നു. ഗൊൽഗപ്പ കഴിച്ചതിന് പിന്നാലെ യുവതിക്ക് ഛർദ്ദിയും രക്തസ്രാവവും അനുഭവപ്പെട്ടു. ആശുപത്രിയിൽ കൊണ്ടുപോകാമെന്ന് പറഞ്ഞ് യുവതിയെ മോട്ടോർ സൈക്കിളിൽ കയറ്റി ഇയാൾ സമീപത്തെ ബൈരിയ വനത്തിലേക്ക് കൊണ്ടുപോയി. അവിടെ വെച്ച് യുവതിയെ ക്രൂരമായി മർദ്ദിക്കുകയും കഴുത്തുഞെരിച്ച് കൊല്ലാൻ ശ്രമിക്കുകയും ചെയ്തു. അബോധാവസ്ഥയിലായ യുവതി മരിച്ചെന്ന് കരുതി ഇയാൾ കടന്നുകളയുകയായിരുന്നു.
രാത്രി മുഴുവൻ വനത്തിനുള്ളിൽ ഒളിച്ചിരുന്ന യുവതി പിറ്റേന്ന് രാവിലെ വീട്ടിലെത്തി വിവരം അറിയിക്കുകയായിരുന്നു. ആറ് വർഷമായി പ്രണയത്തിലായിരുന്ന ഇവർക്ക് ഒരു കുട്ടിയുണ്ട്. ഗ്രാമവാസികളുടെ ഇടപെടലിനെത്തുടർന്ന് നേരത്തെ പിരിഞ്ഞെങ്കിലും വിവാഹം കഴിക്കാമെന്ന വാഗ്ദാനം നൽകി സാകേത് യുവതിയെ വീണ്ടും സമീപിക്കുകയായിരുന്നു. രാംകന്ദ പോലീസ് സ്റ്റേഷനിൽ യുവതി നൽകിയ മൊഴിയുടെ അടിസ്ഥാനത്തിൽ സാകേത് കേഷരിയെ പോലീസ് അറസ്റ്റ് ചെയ്തു. പ്രതിയെ നിലവിൽ ജുഡീഷ്യൽ കസ്റ്റഡിയിൽ വിട്ടിരിക്കുകയാണ്.
Summary: A 25-year-old man in Jharkhand’s Garhwa district was arrested for attempting to murder his eight-month-pregnant lover twice.
