ഹൈദരാബാദ്: അന്തമാൻ നിക്കോബാർ ദ്വീപസമൂഹങ്ങളുടെ പേര് മാറ്റി ‘ആസാദ് ഹിന്ദ്’ എന്നാക്കണമെന്ന് ആവശ്യപ്പെട്ട് മുൻ എംപിയും തെലങ്കാന ജാഗൃതി അധ്യക്ഷയുമായ കെ. കവിത (K Kavitha) പ്രധാനമന്ത്രി നരേന്ദ്ര മോദിക്ക് കത്തയച്ചു. നേതാജി സുഭാഷ് ചന്ദ്രബോസിന്റെ 129-ാം ജന്മദിനമായ ‘പരാക്രമ ദിവസി’നോട് അനുബന്ധിച്ചാണ് കവിത ഈ ആവശ്യം ഉന്നയിച്ചത്. 1943-ൽ നേതാജിയുടെ നേതൃത്വത്തിലുള്ള ആസാദ് ഹിന്ദ് ഗവൺമെന്റ് ബ്രിട്ടീഷ് ഭരണത്തിൽ നിന്ന് മോചിപ്പിച്ച ആദ്യ ഇന്ത്യൻ പ്രദേശമാണിതെന്ന് അവർ കത്തിൽ ചൂണ്ടിക്കാട്ടി.
നേതാജി സുഭാഷ് ചന്ദ്രബോസിന്റെ ചരിത്രപരമായ നേട്ടങ്ങളെയും ആസാദ് ഹിന്ദ് ഫൗജിന്റെ പോരാട്ടവീര്യത്തെയും ബഹുമാനിക്കാനുള്ള നടപടിയായി ഇതിനെ കാണണമെന്ന് കവിത ആവശ്യപ്പെട്ടു. 2018-ൽ റോസ്, നീൽ, ഹാവ്ലോക്ക് എന്നീ വ്യക്തിഗത ദ്വീപുകളുടെ പേര് മാറ്റിയെങ്കിലും, ദ്വീപസമൂഹത്തിന് മൊത്തത്തിലുള്ള പേര് ഇന്നും കൊളോണിയൽ കാലഘട്ടത്തെ ഓർമ്മിപ്പിക്കുന്നതാണെന്ന് അവർ പറഞ്ഞു. ബ്രിട്ടീഷുകാർ നൽകിയ പേരുകൾ മാറ്റുന്നതിൽ ബിജെപി സർക്കാർ കാണിക്കുന്ന താൽപ്പര്യം ഈ കാര്യത്തിലും ഉണ്ടാകണമെന്ന് കവിത എൻഡിടിവിയോട് പറഞ്ഞു.
1947-ന് മുമ്പ് തന്നെ നേതാജി ഈ ദ്വീപുകളിൽ ദേശീയ പതാക ഉയർത്തിയിട്ടുണ്ടെന്നും ഇത് ഇന്ത്യയുടെ പരമാധികാരത്തിന്റെ ആദ്യ അടയാളമാണെന്നും കവിത പറഞ്ഞു. അന്തമാൻ നിക്കോബാർ എന്ന പേര് മാറ്റി ആസാദ് ഹിന്ദ് എന്നാക്കുന്നത് യുവാക്കൾക്ക് വലിയ ഊർജ്ജവും പ്രചോദനവും നൽകുമെന്നും കവിത കൂട്ടിച്ചേർത്തു. ഇതിനായി ഭരണഘടനാപരവും ഭരണപരവുമായ നടപടികൾ എത്രയും വേഗം ആരംഭിക്കണമെന്ന് അവർ കേന്ദ്ര സർക്കാരിനോട് അഭ്യർത്ഥിച്ചു.
On the 129th birth anniversary of Netaji Subhas Chandra Bose, former MP K. Kavitha has written to PM Narendra Modi requesting that the Andaman and Nicobar Islands be renamed ‘Azad Hind.’ She highlighted that in 1943, Netaji declared these islands the first liberated Indian territory from British rule, hoisting the national flag long before 1947. While some individual islands were renamed in 2018, Kavitha argued that the collective name remains a colonial vestige. She emphasized that renaming the entire archipelago would be a fitting tribute to the legacy of the Azad Hind Fauj and Netaji’s vision for a sovereign India.
