‘ദി കേരള സ്റ്റോറി 2’ എന്ന സിനിമയിലെ ദൃശ്യങ്ങൾ കേരളത്തെ തെറ്റായി ചിത്രീകരിക്കുന്നു എന്ന വിമർശനം ശക്തമാകുന്നതിനിടെ, സംസ്ഥാനത്തെ വൈവിധ്യമാർന്ന ഭക്ഷണസംസ്കാരം പങ്കുവെച്ച് നടൻ പ്രകാശ് രാജ് (Prakash Raj Beef Fry Post). കേരളത്തിലെ പ്രശസ്തമായ ബീഫ് വിഭവങ്ങളുടെ ചിത്രങ്ങൾ പങ്കുവെച്ചുകൊണ്ടാണ് താരം സിനിമയുടെ പ്രമേയത്തോടുള്ള തന്റെ വിയോജിപ്പ് പ്രകടിപ്പിച്ചത്.
കേരളത്തിലെ ഭക്ഷണരീതികൾ വെറും സ്വാദ് മാത്രമല്ലെന്നും അത് നൂറ്റാണ്ടുകളായുള്ള സാംസ്കാരിക ചരിത്രത്തിന്റെ ഭാഗമാണെന്നും പ്രകാശ് രാജ് അഭിപ്രായപ്പെട്ടു. സിനിമയുടെ ട്രെയിലറിൽ മതവികാരം വ്രണപ്പെടുത്തുന്ന രീതിയിലുള്ള ദൃശ്യങ്ങൾ ഉണ്ടെന്ന് ആരോപിച്ച് കേരളത്തിൽ പ്രതിഷേധം പുകയുന്ന സാഹചര്യത്തിലാണ് പ്രകാശ് രാജിന്റെ ഈ ഇടപെടൽ. സസ്യാഹാരമായ സദ്യയും മാംസാഹാരങ്ങളും ഇവിടെ ഒരേപോലെ ആസ്വദിക്കപ്പെടുന്നുണ്ടെന്നും ഇതാണ് കേരളത്തിന്റെ യഥാർത്ഥ ഐക്യമെന്നും അദ്ദേഹം സമൂഹമാധ്യമങ്ങളിൽ കുറിച്ചു.
The real #KeralaStory is how… “In its mouth-watering culinary journey, Kerala’s yummy Syrian Christian beef fry and the coconut beef have added legacy, history and culture to the recipe.” Please try n relish 😜😜😜😜 #justasking pic.twitter.com/PdbYT0m0N2
— Prakash Raj (@prakashraaj) February 21, 2026
സിനിമയുടെ രണ്ടാം ഭാഗം പുറത്തിറങ്ങുന്നത് തടയണമെന്നാവശ്യപ്പെട്ട് വിവിധ സംഘടനകൾ രംഗത്തെത്തിയിട്ടുണ്ട്. ഇതിനിടെ ഹൈക്കോടതിയും വിഷയത്തിൽ ഇടപെട്ടിട്ടുണ്ട്. പ്രകാശ് രാജിന്റെ പോസ്റ്റ് നിമിഷങ്ങൾക്കകം വൈറലാവുകയും നിരവധി പേർ ഇതിനെ അനുകൂലിച്ചും പ്രതികൂലിച്ചും രംഗത്തെത്തുകയും ചെയ്തു. കേരളത്തിലെ ബീഫ് ഫെസ്റ്റിവലുകൾ ഉൾപ്പെടെയുള്ള പ്രതിഷേധങ്ങൾ ദേശീയതലത്തിൽ ചർച്ചയാകുന്ന സാഹചര്യത്തിൽ പ്രകാശ് രാജിന്റെ വാക്കുകൾക്ക് വലിയ രാഷ്ട്രീയ പ്രാധാന്യമുണ്ട്.
