കോട്ടയം: കേരള രാഷ്ട്രീയം ഉറ്റുനോക്കുന്ന പാലാ മണ്ഡലത്തിൽ വരാനിരിക്കുന്ന നിയമസഭാ തിരഞ്ഞെടുപ്പ് കേവലമൊരു പോരാട്ടത്തിനപ്പുറം കേരള കോൺഗ്രസ് എമ്മിലെ നിർണ്ണായക അധികാര മാറ്റത്തിന്റെ വേദിയാകുമെന്ന് സൂചനകൾ. കെ.എം. മാണിയുടെ പാരമ്പര്യമുള്ള മണ്ഡലം തിരിച്ചുപിടിക്കാൻ ഇത്തവണ ജോസ് കെ. മാണിക്ക് പകരം ഭാര്യ നിഷാ ജോസ് കെ. മാണി രംഗത്തിറങ്ങുമെന്ന ചർച്ചകളാണ് രാഷ്ട്രീയ വൃത്തങ്ങളിൽ സജീവമാകുന്നത്.(Assembly elections, Will Nisha Jose K Mani contest in Pala?)
അടുത്ത തിരഞ്ഞെടുപ്പ് ലക്ഷ്യമിട്ട് പാലായിലെ സാമൂഹിക-സാംസ്കാരിക പരിപാടികളിൽ നിഷാ ജോസ് കെ. മാണി ഇപ്പോൾ സജീവമാണ്. 2021-ലെ തോൽവി കണക്കിലെടുത്ത് സുരക്ഷിതമായ ഒരു നീക്കമെന്ന നിലയിൽ നിഷയെ മത്സരിപ്പിക്കാനാണ് ജോസ് പക്ഷത്തിന്റെ ആലോചനയെന്നാണ് സൂചന.
നിഷയുടെ സ്ഥാനാർത്ഥിത്വ വാർത്തകൾ പുറത്തുവരുന്നതിനിടെ അതിനെ പ്രതിരോധിക്കാൻ മന്ത്രി റോഷി അഗസ്റ്റിൻ നടത്തുന്ന നീക്കങ്ങളും ശ്രദ്ധേയമാണ്. പാലായിൽ ജോസ് കെ. മാണി തന്നെ മത്സരിക്കും, അതിലെന്ത് സംശയം എന്നാണ് വാർത്താസമ്മേളനത്തിനിടെ ജോസിന്റെ കയ്യിൽ നിന്നും മൈക്ക് വാങ്ങി റോഷി പറഞ്ഞത്.
